Փաստ ինֆո

Լևոն Տեր-Պետրոսյանի հայտարարությունը պարզապես սեփական հոգեզավակին փրկելու խղճուկ փորձ էր, նա փորձում է Փաշինյանի մեղքը և պատասխանատվությունը կիսել մնացած քաղաքական ուժերի ներկայացուցիչների հետ: «Փաստինֆո»-ի հետ զրույցում ասաց քաղաքագետ Հրանտ Մելիք-Շահնազարյանը՝ անդրադառնալով առաջին նախագահի այսօրվա հայտարարությանը, որ Փաշինյանը պատերազմում պարտության միակ պատասխանատուն չէ.

«Այն ուժերը, որոնք հայդատականությունը, պահանջատիրությունը և ոչմիթիզականությունը դարձրել էին հայության ազգային դավանանքը, ընդ որում, նույնքան անքննելի, որքան Աստվածաշունչը: Պատկերավոր ասած՝ թվարկածս բոլոր ուժերը, Նիկոլ Փաշինյանի եզրափակիչ դերակատարությամբ, փայլուն կերպով իրականացրին Վազգեն Սարգսյանի երկու «պատվիրանները». ա. «Արյունով նվաճված հողը թղթով չեն հանձնում», այսինքն՝ հանձնում են ավելի մեծ արյունով, ինչը և տեղի ունեցավ: բ. «Փոխզիջման կգնանք այն ժամանակ, երբ հարկադրված կլինենք», իսկ հարկադրված լուծումը ոչ այլ ինչ է, եթե ոչ կապիտուլյացիա, ինչը նույնպես իրականություն դարձավ»,- հայտարարել է Լևոն Տեր-Պետրոսյանը:

Քաղաքագետի դիտարկմամբ՝ Լ.Տեր-Պետրոսյանը փորձում է ոչմիթիզականի պիտակ փակցնել իր ընդդիմախոսների վրա և մեղքը բարդել նրանց վրա, մինչդեռ, նրա կարծիքով, Հայաստանը երբեք չի ունեցել ոչմիթիզական իշխանություն.

«Լևոն Տեր-Պետրոսյանը հավատարիմ է իր ոճին՝ բոլորին ամեն ինչում մեղադրել և սեփական մեղքը չտեսնել: Նա տարիներ շարունակ եղել է Արցախի զգալի հատվածը թշնամուն ոչնչի դիմաց հանձնելու ջատագով: Նա հորինել է պիտակներ, որոնք փակցնում է իր քաղաքական ընդդիմադիրների վրա՝ կոչելով նրանց ոչմիթիզական և փորձում է մեղքը բարդել նրանց վրա » ,-ասաց զրուցակիցը ընդգծելով՝ Հայաստանը երբեք չի ունեցել ոչմիթիզական քաղաքական իշխանություն, Հայաստանի բոլոր իշխանություններն էլ մշտապես պատրաստ են եղել փոխզիջումային տարբերակով հարցի կագավորմանը, իսկ փոխզիջում ասելով հասկացել են Արցախի մի շարք շրջանների հանձնումը Ադրբեջանին.

«Այնպես, որ Տեր-Պետրոսյանի մեղադրանքը նախկին իշխանությունների հասցեին տեղին չէ և շահարկումների դաշտից է: Լևոն Տեր-Պետրոսյանը փորձում է պաշտպանել իր հոգեզավակ Նիկոլ Փաշինյանին՝ շեղելով մարդկանց կարծիքը և համոզել, որ Փաշինյանը այլ քաղաքական ուժերի պրոյեկտն է, այլ ոչ թե իր: Նա փորձում է Փաշինյանի մեղքը և պատասխանատվությունը կիսել մնացած քաղաքական ուժերի ներկայացուցիչների հետ: Ամբողջ խնդիրը կայանում է նրանում, որ Հայաստանը երբեք չի ունեցել դավաճան իշխանություն։ Այո՛, նախկին իշխանությունները շատ սխալներ են գործել, ոչ միշտ են լիարժեք օգտագործել պետության ռեսուրսները, բայց երբեք ոչ մի իշխանության չեն մեղադրել դավաճանության մեջ, դա բացառապես եղել է Նիկոլի վարքագիծը, հիմա փորձել այդ դավաճանությունը քողարկել տարբեր պատրվակներով, թե նախկին իշխանությունները պատրաստ չեն եղել զիջումների, սա պարզապես սեփական հոգեզավակին փրկելու խղճուկ փորձ է Տեր-Պետրոսյանի կողմից »,-ասաց Շահնազարյանը:

Որոշ ժամանակ առաջ Տեր-Պետրոսյանը նախկին նախագահներին առաջարկում էր համատեղ հանդես գալ, իսկ հիմա պարտության մեջ մեղադրում է նաև նախկին նախագահներին և պնդում է, որ պարտության մեջ Նիկոլ Փաշինյանը միակ մեղավորը չէր:

Հարցին՝ ի վերջո ո՞ր դաշտում է փորձում Լևոն Տեր-Պետրոսյանը դիրքավորվել, քաղաքագետը նկատեց, որ նա միշտ էլ եղել է Փաշինյանի պաշտպանի դերում.

«Անգամ այն ժամանակ, երբ նա առաջարկում էր նախկին նախագահների համագործակցություն, որպես դրա գին առաջարկում էր թողնել, որ Փաշինյանը հեռանա, առանց պատասխանատվություն կրելու ազատ արձակել նրան՝ երաշխիքներ տալու գաղափարով:Սա է Լեւոն Տեր-Պետրոսյանի խնդիրը՝ փրկել դավաճան, կապիտուլյանտին: Այդ փրկության ճանապարհին պետք էր համագործակցել Սերժ Սարգսյանի, Ռոբերտ Քոչարյանի հետ և ինքը դրան պատրաստ էր: Երբ տեսավ այդ ճանապարհը չի ստացվում, հիմա էլ փորձում է մարդկանց ուշադրությունը շեղել, այլ գաղափարներ առաջ բերել և այդ կերպ հարցը լուծել: Ակնհայտ է, որ Տեր-Պետրոսյանի նպատակը Փաշինյանին փրկելն է և մեղքը ուրիշների վրա բարդելը »,-ասաց Շահնազարյանը:

Քաղաքագետի դիտարկմամբ՝ նրա հայտարարությունը նաև հասարակության զայրույթը մեղմելու փորձ էր, քանի որ, եթե պարզվում է, որ մեղավոր է ոչ միայն Փաշինյանը,այլ բոլոր իշխանությունները, բացի Լեւոն Տեր-Պետրոսյանից, դա հանրության մեջ առաջացնելու է ոչ թե մեղավորներին պատժելու ցանկություն, այլ՝ խորը հիասթափություն.

«Բոլորը մեղավոր չեն լինում, ամեն ինչն ունի իր հստակ պատասխանատուն: Եթե փորձես պատասխանատուին թաքցնել ուրիշի մեջքի ետևում, բնականաբար, հանրությունն էլ հիասթափվելու է և դրանից բացի այլ զգացողություն չի ունենալու»,-ասաց քաղաքագետը:
Երեկ «Լուսավոր Հայաստան» խմբակցության համագումարի ժամանակ կուսակցության ղեկավար Էդմոն Մարուքյանը հայտարարել էր՝ Եթե այս վիճակը խորանա, ես չեմ բացառում, որ ոչ մի ընտրություն էլ տեղի չունենա:

Մեր դիտարկմանը, որ հենց Էդմոն Մարուքյանն էր առաջարկել ընտրությունների օրակարգը, սակայն հիմա փորձում է ետ կանգնել այդ օրակարգից, քաղաքագետը նկատեց, որ վերջինս տեսնում է, հնարավոր է ընտրություններում Փաշինյանը չկարողանան հաղթանակ ապահովել և փորձում է օրակարգ փոխել.

«Էդմոն Մարուքյանն էլ Լեւոն Տեր-Պետրոսյանի նման բազում ծառայություններ է մատուցում այս իշխանություններին: Երբ Մարուքյանը տեսնում է, որ իրադարձություններն այն ընթացքն են ստանում, որ հնարավոր է ընտրություններում Փաշինյանը չկարողանան հաղթանակ ապահովել, փորձում է օրակարգ փոխել, ինչպես ժամանակին, երբ ՀՓՇ-ն մեծ թափ էր հավաքել, Մարուքյանը ծառայություն մատուցեց Փաշինյանին՝ առաջարկելով արտահերթ ընտրությունների միտքը, ասելով, որ միայն այդ ճանապարհով պետք է գնալ փոփոխության: Հիմա դաշտը գնում է այդ ճանապարհով, նա տեսնում է, որ Փաշինյանի համար ռիսկեր են առաջանում և փորձում է նորից օրակարգ փոխել, սա աջակցություն է Փաշինյանին, ուրիշ ոչինչ»,-ասաց Շահնազարյանը:

Անդրադառնալով ԼՀԿ ղեկավարի մեկ այլ պնդմանը՝ որ նախկին նախագահների ընտրություններին մասնակցելը նպաստում է Նիկոլ Փաշինյանի վերարտադրությանը, քաղաքագետն արձանագրեց, որ այս իրավիճակում Փաշինյանին մրցակից կարող են լինել բացառապես նախկին նախագահները և նրանց ղեկավարած քաղաքական թիմերը.

«Եթե Մարուքյանը կարծում է, որ նրանց չմասնակցելով Նիկոլը հեռացվելու է իշխանությունից, պատասխանատու կերպով հայտարարում եմ, սա մարդկանց մոլորեցնելու հերթական փորձ է »,-եզրափակեց զրուցակիցը:

Աղբյուր` Փաստինֆո