Փաստ ինֆո

Երեկ ամբողջ օրը իշխանությունը մեղադրում էր լրատվամիջոցներին խուճապ տարածելու մեջ, իսկ երեկոյան ասել են ավելին, քան ասում էին լրատվամիջոցները, միաժամանակ նշելով, որ ճգնաժամանյին իրավիճակ է: Ավելի շատ խուճապ տարածել, քան իրենց վարքագծով և իրարամերժ հայտարարություններով ուղղակի անհնար է։ Այս մասին մամուլի ասուլիսի ժամանակ ասաց քաղաքագետ Հրանտ Մելիք-Շահնազարյանը՝ խոսելով երեկ Սյունիքում տեղի ունեցած իրադարձությունների մասին։ 

«Այն ինչ երեկ տեղի է ունեցել Սյունիքում և Գեղարքունիկում տեղավորվում է այն տրամաբանության մեջ, որը պարտադրվել է Հայաստանին կապիտուլյացիոն ակտով: Ինչպես նաև նրանով, որ Հայաստանում իշխում է դավաճանների իշխանությունը, որն ի վիճակի չէ պաշտպանելու հայ ժողովրդի և հայկական պետությունների շահերը։ Իշխանությունը փորձում է այս խնդիրը լուծել Ռուսաստանի օգնությամբ»,-շեշտեց Մելիք-Շահնազարյանը:

Շահնազարյանի կարծիքով, խնդիրը լուծելու համար, Ռուսաստանը պետք է տեսնի հայկական կողմի վճռականությունը` իր տարածքները պաշտպանելու առումով, ինչն այս պահին, ըստ քաղաքագետի՝ չի արվում: Հրանտ Մելիք-Շահնազարյանը նկատեց, որ բոլոր պաշտոնական տեղեկությունները աչքի են ընկնում հակասություններով և ստի չափաբաժինը այդ հաղորդագրություններում չափազանց մեծ է: Ըստ քաղաքագետի, Երևանի թողտվությամբ Բաքուն փորձում է մի քանի խնդիր լուծել:

«Առաջինը` ունենալ գերիշխող դիրք մեր տարածաշրջանում, որը Հարավային Կովկասի բոլոր տրանսպորտային ուղիների սիրտը և կիզակետը կարող է դառնալ, խոսքը մասնավորապես Սյունիքի մասին է: Իրենք փորձում են իրենց դիրքերը այնտեղ բարելավել և ունենալ բարձրունքներ, ստանալ այնպիսի իրավիճակ, որի առկայության պարագայում, ամեն պահի կարող են կյանքի կոչել Ալիևի սպառնալիքը և եթե Հայաստանը թույլ չտա շահագործել Մեղրիի միջանցքը, նրանք կստիպեն դա անել»,- ասաց Մելիք-Շահնազարյանը:

Քաղաքագետի դիտարկմամբ, Ադրբեջանը ամրապնդում է իրեն Քարվաճառի և Քաշաթաղի շրջաններում: «Այս տարածքները, որոնք կապիտուլյանտի ստորագրությամբ հանձնվել էին թշնամում, Ադրբեջանը չէր կարողացել յուրացնել: Նրանք փաստացի այնտեղ անգամ հնարավորություն չունեին նորմալ մուտք գործել, մշտապես օգտվել են ռուս խաղաղապահների օգնությունից: Այսինքն, մի քանի ամիս շարունակ այս տարածքը անտեր էր, հիմա նրանք փորձում են այնտեղ ամրապնդվել, իրավիճակը շտկել: Այսինքն, այս պահի դրությամբ նրանք գրավում են հայկական Քարվաճառի և Քաշաթաղի շրջանները: Նաև լուծում են Սյունիքի հանդեպ վերահսկողություն սահմանելու հարցը»,- նշեց քաղաքագետը հավելելով, որ Հայաստանի իշխանությունն ի պատասխան այս ամենի ոչինչ չի անում, բացի ադրբեջանցիներին խնդրելուց, որ հետ գնան բարձրունքներից:

Շահնազարյանը նշեց, որ թուրքը վաղուց անցել է Հայաստանի սահմաններից ներս:  

«Ես ուզում են նշել, որ Հայաստանը այն չէ, ինչ որ գծված է եղել խորհրդային տարբեր քարտեզներով: Սահմաններն էլ այդ գծագրությունների հետ երբեք չեն համընկել, փաստացի դա եղել են ադմինիստրատիվ սահմաններ ԽՍՀՄ-ի ժամանակ: Մենք չպետք է Հայաստան ասելով հասկանանք այն, ինչ ժամանակին սովետական պաշտոնյաները պատկերացել են որպես ադմինիստրատիվ տարածք խորհրդային միության ներսում»,- նկատեց քաղաքագետը:

Աղբյուր` Փաստինֆո