Փաստ ինֆո

Կապիտուլյացիա ստորագրած, հազարավոր զինվոր զոհաբերած և Հայրենիքը կորցրած ուժը կարողանում է իր կամքը թելադրել ընդդիմությանը և փորձում է այդ ճգնաժամին իր համար ընդունելի լուծում տալ,- «Փաստինֆո»-ի հետ զրույցում ասել է քաղաքագետ Հրանտ Մելիք-Շահնազարյանը՝ նշելով, որ արտահերթ ընտրությունների անցկացումը կարելի է համարել մեծ բացթողում:

«Մենք տեսանք, որ կապիտուլյացիա ստորագրած, հազարավոր զինվոր զոհաբերած և Հայրենիքը կորցրած ուժը կարողանում է իր կամքը թելադրել ընդդիմությանը, և փորձում է այդ ճգնաժամին իր համար ընդունելի լուծում տալ՝ արտահերթ ընտրությունների շոու կազմակերպելով: Ես ասում եմ շոու, քանի որ այս իրավիճակում Հայաստանը պատրաստ չէ ընտրությունների: Մենք պետք է հասկանանք, որ ընտրություններով չէ, որ լուծվելու են անվտանգային լրջագույն հարցերը, ճիշտ հակառակը, ընտրությունները մեզ ևս մի քանի ամսով դուրս են մղում տարածաշրջանային զարգացումներից: Այդ ընթացքում, համոզված եմ, որ լինելու են աշխարհաքաղաքական նոր որոշումներ, որոնք դեմ են լինելու մեր պետական շահերին և իրենց մեջ նոր ռիսկեր են պարունակելու:Ընտրությունները այն օրակարգը չէ, որը մեզ պետք էր»,- շեշտեց քաղաքագետը:

Այդուհանդերձ, Հայաստանը գնում է դեպի արտահերթ ընտրություններին, որին մասնակցելու հայտ են ներկայացրել ընդդիմադիր դաշտի հիմնական դերակատարները՝ ՀՀ երկրորդ նախագահը, ԱԱԾ նախկին տնօրենի ղեկավարած «Հայրենիք» կուսակցությունը, ՀՅԴ-ն, ԲՀԿ-ն։ Ավելին, նախօրեին ՀՀ երրորդ նախագահի գլխավորած ՀՀԿ-ն եւս հայտարարեց, որ կմասնակցի ընտրություններին, ընդ որում քաղաքական դաշինք ձեւավորելով «Հայրենիքի» հետ։ Ասել է, թե ընդդիմադիր դաշտում նշմարվում են մի քանի բեւեռ՝ ընդդեմ գործող իշխանությունների, սակայն Մելիք-Շահնազարյանը համոզված է, որ իրական ընդդիմադիր ուժերը թեեւ մրցելու են միմյանց հետ, բայց նաեւ դաշնակիցներ են լինելու և համատեղ ուժերով կանեն ամեն ինչ, որպեսզի հեռացնեն այս դավաճան իշխանությանը:

«Ես կարծում եմ, որ Հայաստանում ժողովրդի ընդդիմադիր դաշտը սեգմենտավորված է: Այնպես չէ, որ եթե նախկին նախագահներից մեկը չմասնակցեր, ձայները ավտոմատ գնալու էին մյուսին: Շատ հնարավոր է, որ Սերժ Սարգսյանի, կամ Ռոբերտ Քոչարյանի ընտրողները պարզապես չգնային և չքվեարկեին մյուսի օգտին, եթե իրենց ֆավորիտը չմասնակցի ընտրություններին: Այսպես շանս կա, որ ամեն մեկն իր սեգմենտը կհավաքի և արդյունքում դա կարտահայտվի համագործակցության տեսքով, այդ ձայները կգումարվեն, եւ կհաջողվի հեռացնել այս իշխանությանը»,- նշեց քաղաքագետը:

Նրա գնահատմամբ՝ Նիկոլ Փաշինյանը փորձելու է անել ամեն հնարավոր բան, որպեսզի մնա երկրի ղեկավար:

«Փաշինյանն ամեն ինչ կանի, որ կեղծի ընտրությունները: Նա անգամ փորձել է կեղծել պատերազմի արդյունքները: Բայց դրանով հանդերձ դժվար է ասել, որ նա կպարտվի, կամ կհաղթի: Այս ճգնաժամային իրավիճակում ևս մեկ քաղաքական ցնցում, իսկ ընտրությունները կարելի է ցնցում համարել, կարող է բերել անկանխատեսելի արդյունքների»,- նկատեց Մելիք-Շահնազարյանը:

Քաղաքագետը հավելեց, որ այս ընտրությունները կործանարար են լինելու մեր երկրի համար, մի շարք պատճառներով:
«Նախ և առաջ, դա քաղաքական հերթական ցնցումն է և դա հերթական առիթ է բաժանարար գծեր անցկացնել քաղաքացիների միջև:

Իսկ այդ իրավիճակում պետությունը պետք է լուծի իր անվտանգային խնդիրները, սահմանների հստակեցման հետ հարցեր կան: Նաև առկա են մի շարք սոցիալական խնդիրներ ` անտուն մնացած մարդկանց հարցերը, վիրավորներ և այլն: Բացի դրանից, Հայաստանի համար կենսական նշանակություն ունեցող պրոցեսը պետք է տեղի ունենա դավաճանի ղեկավարության ներքո: Իշխանությունները շարունակելու են իրենց դավաճանական քայլերն անել նաև այս ընթացքում: Այս ամեն ինչը կործանարար ռիսկեր է պարունակում իր մեջ և մեր ժողովրդի վերականգնման փուլը հետաձգվելու է առնվազն մեկ-երկու տարով», - եզրափակեց Մելիք-Շահնազարյանը:

Հեղինակ՝  Անի Մշեցյան

Աղբյուր` Փաստինֆո