Փաստ ինֆո

Ռուբեն Վարդազարյանը հետապնդվում է այն բանի համար, որ փորձել է ապահովել դատական իշխանությունների անկախությունը: Այս մասին մամուլի ասուլիսի ժամանակ ասել է ԱԱԾ պահեստազորի սպաների միության խորհրդի անդամ, ԱԱԾ նախկին տնօրեն Արթուր Վանեցյանը՝ անդրադառնալով ԲԴԽ նախագահ Ռուբեն Վարդազարյանի դեմ հարուցված քրեական գործին եւ նրա լիազորությունները կասեցնելուն:

Նրա դիտարկմամբ՝ Վարդազարյանը փորձել է ապահովել դատական իշխանության անկախությունը ոչ միայն իշխանության ներկայացուցիչների ազդեցությունից, այլ նաեւ այլ մարդկանց, այդ թվում՝ ընդդիմադիրներից:

«Իրականում, Ռուբեն Վարդազարյանի մեղքը նրանում է, որ նա փորձում էր իրականացնել իր սահմանադրական լիազորությունները, ինչը չի բավարարել գործող իշխանություններին, քանի որ, նրանց քայլերը մշտապես միտված են ընդդիմախոսներին դատարանների միջոցով լռեցնելուն»,-շեշտել է ԱԱԾ նախկին ղեկավարը:

Իր հերթին Միքայել Համբարձումյանն ասել է, որ անձամբ է ճանաչում Ռուբեն Վարդազարյանին, և նրան փորձառու անձնավորություն է համարում:

«Ճակատագրի հեգնանք է, որ Վարդազարյանին մեղադրում են արդարադատությանը միջամտելու համար, իսկ թե ինչու եմ այդպես գնահատում, կարծում եմ, որ հասկացողը կհասկանա: Ես չեմ կարծում, որ Վարդազարյանի նման մարդը այսպիսի միամտություն կաներ եւ կփորձեր մի քանի ամսվա դատավորին միջամտություն աներ, որը գնահատվեր որպես արդարադատությանը միջամտություն: Վստահ եմ, որ Վարդազարյանն ունակ է պաշտպանվելու, եւ դեռ կտեսնենք՝ այդ գործը դատական հեռանկար կունենա, թե ոչ», - շեշտել է Համբարձումյանը:

Աղբյուր` Փաստինֆո