Փաստ ինֆո

Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, հեռացել է խորհրդակցական սենյակ՝ ՀՀ երկրորդ նախագահ Ռոբերտ Քոչարյանի, Արմեն Գևորգյանի նկատմամբ քրեական հետապնդումը ՀՀ ՔՕ 300.1-րդ հոդվածով դադարեցնելու մասին միջնորդության վերաբերյալ որոշում կայացնելու։

Ինչպես արդեն տեղեկացրել ենք՝ Ռոբերտ Քոչարյանի պաշտպան Հայկ Ալումյանը ներկայացրեց միջնորդությունը՝ ՀՀ քրեական օրենսգրքի 300.1-րդ հոդվածը հակասահմանադրական ճանաչելու ՍԴ որոշման հիմքով քրեական հետապնդումը դադարեցնելու վերաբերյալ։ Բացի դա՝ պաշտպանը միջնորդել է նաև վերացնել Ռոբերտ Քոչարյանի նկատմամբ ընտրված խափանման միջոց գրավը կամ նվազեցնել գրավի չափը։ Արմեն Գևորգյանի պաշտպան Էրիկ Ալեքսանյանը ևս միջնորդել է՝ դադարեցնել Արմեն Գևորգյանի նկատմամբ քրեական հետապնդումը ՀՀ ՔՕ 300.1-րդ հոդվածի մասով՝ արդարացման հիմքով և այդ մասով կարճել գործի վարույթը։

Մեղադրող դատախազ Գևորգ Բաղդասարյանը, առարկել է քրեական հետապնդումը դադարեցնելու միջնորդությանն ու, ըստ էության, քողարկված տեսքով ներկայացրել՝ ՍԴ դիմելու նպատակով քրեական գործի վարույթը կասեցնելու միջնորդությունը, որի մասին ավելի վաղ հայտնել էր։ Մասնավորապես, Բաղդասարյանը նշեց, որ ստեղծվել է իրավիճակ, երբ արգելափակվում է արդար դատաքննության իրավունքը և, որ դատավարական տարբեր փուլերում մեղադրյալի արարքը շարունակում է համապատասխանել ՀՀ ՔՕ չթույլատրված արարքին, եթե անգամ առկա են քրեական հետապնդումը բացառող հանգամանքներ։

Ըստ Բաղդասարյանի՝ ներկա իրավակարգավորումներով՝ քրեական հետապնդումը պետք է դադարեցվի՝ առանց որևէ վերապահման, այն դեպքում, երբ անձի գործողությունները ՀՀ Քրեական օրենսգրքով չթույլատրված արարքներ են պարունակում։

Դատախազը հայտարարեց, որ առկա իրավակարգավորումները, որոնք թույլ չեն տալիս վերաորակել արարքը, հակասում են Սահմանադրությանը, ուստի՝ առկա են հիմքեր, որ դատարանը դիմի ՍԴ՝ դրանց սահմանադրականության հարցը լուծելու համար։ Նրա դիտարկմամբ՝ ՀՀ ՔՕ 300.1-րդ հոդվածի հակասահմանադրական ճանաչվելու պայմաններում Ռոբերտ Քոչարյանին և Արմեն Գևորգյանին մեղսագրվում է այլ արարք ևս , ապա գտնում է, որ պաշտպանների միջնորդությունը պետք է մերժվի, իսկ Յուրի Խաչատուրովի և Սեյրան Օհանյանի նկատմամբ խափանման միջոցը պետք է վերացվի՝ խորհրդակցական սենյակում որոշում կայացնելուց հետո, քանի որ վերջիններս մեղսագրվում է միայն 300.1-րդ հոդվածը։ Դատախազ Պետրոս Պետրոսյանը միացավ գործընկերոջ դիրքորոշմանը։

Կողմերի դիրքորոշումը լսելուց հետո՝ դատարանը հեռացավ խորհրդակցական սենյակ՝ որոշում կայացնելու։ Դատարանի որոշումը կհրապարակվի ապրիլի 6-ին՝ ժամը 17։45-ին։

Հիշեցնենք՝ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու համար, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու համար։

Հեղինակ՝ Իզաբել Սահակյան

Աղբյուր` Փաստինֆո