Փաստ ինֆո

Դեռ փետրվարին, լրագրողի հարցին, թե՝ մտածու՞մ եք մեծ քաղաքականություն վերադառնալու մասին, ՀՀ 2-րդ նախագահ Ռոբերտ Քոչարյանը պատասխանել էր՝ ես քաղաքականության մեջ եմ: 

Իրականում, 2018 թվականին, այն պահից, երբ 300.1 հնարված հոդվածով սահմանադրական կարգի տապալման անհեթեթ մեղադրանք առաջադրվեց նրա նկատմամբ, նա արդեն իսկ քաղաքական լուրջ գործոն դարձավ:

Ասել, թե մինչ այդ Ռ. Քոչարյանը քաղաքական գործընթացներից ընդհանրապես անտեղյակ էր, ճիշտ չի լինի, քանի որ նա պարբերաբար հոդվածների և հարցազրույցների միջոցով անդրադառնում էր երկրում տեղի ունեցող քաղաքական և տնտեսական գործընթացներին: Ընդ որում, նաև մինչ օտար ուժերի ջանքերով իրականացված գունավոր հեղաշրջումն էր նա իր դիտարկումներն անում, տեսակետներ հայտնում, որոնք առավելաբար վերաբերվում էին երկրի տնտեսական քաղաքականությանը:

Եվ ահա գունավոր հեղաշրջման թավշյա առաջնորդը իշխանության ղեկին հայտնվելով և Մարտի 1-ի գործի բացահայտումը դարձնելով պետության թիվ մեկ խնդիրը՝ իր ձևակերպած խնդրի մեղավոր էլ կամայականորեն նշանակելով Քոչարյանին, այդպիսով իսկ նրան դեմոնացնելով և իբր հակադրելով թավշյա առաջնորդին, ՀՀ երկրորդ նախագահի երկրորդ վերադարձի սկիզբը դրեց:

Եվ դրեց հիմնավորապես, քանզի դեմոնացումից հերոսացում մեկ քայլ է: Եվ քանի որ այս դեպքում մենք գործ ունեինք իրական հերոսի հետ՝ կուռ և կանոնիկ՝ պետական գործչի իր առաջնորդական դրսևորումներով, հարցը ծայրահեղացվեց՝ կամ-կամի հանգույն:

Ռոբերտ Քոչարյանի դատավարությունը որքան ձգձգվում էր, այնքան նրա կերպարի պլյուսներն ավելանում էին: Եվ դա անում էր հենց Փաշինյանը: Անխոս՝ ակամա էր անում, բայց նրա ցանկացած նենգադավ արարք՝ ուղղված Ռ. Քոչարյանի դեմ, ավելի ուժեղացնում ու ամրացնում էր քաղաքական հետապնդման ենթարկվող նախագահի կամքը: Իսկ արցախյան պատերազմը ծրագրված տանուլ տալու, ազգը պարտության տանելու, մի ողջ սերունդ թշնամուն մատաղ անելու՝ ինչ է, թե՝ ինքը դավաճան չկոչվի՝ անմեղսունակի մտագարությունը ուղղակիորեն նրան անկարող, անհավասարակշիռ գերագույն գլխավորից վերաորակեց որպես ազգակործան և հող հայրենին թշնամուն հանձնող դավաճանի:

Փաշինյանն անձամբ և հետևողականորեն է Ռոբերտ Քոչարյանին վերադարձրել մեծ քաղաքականություն, այլ հարց, որ դա արել է պետություն և պետականություն արժեքներից գաղափար չունենալու արդյունքում: Իսկ իր ձեւավորած Սահմանադրական դատարանի որոշմամբ ամրագրելով առաջադրված մեղադրանքի հակաիրավական լինելը՝ ապացուցեց Ռոբերտ Քոչարյանի՝ քաղաքական հալածանքների ենթարկվելու թեզը, մաքրեց նրան՝ նախորդ «հանցավոր ռեժիմի» դատարանի կողմից արդարացվելու պիտակներից, քանի որ արդարացվել է նոր իշխանությունների ՍԴ-ի կողմից ու ապահովեց Քոչարյանի համար բարձր վարկանիշ։

Աղբյուր` Փաստինֆո