Փաստ ինֆո

«Իմ քայլ»-ի պատգամավորներն ուզում են այնպիսի ընտրակարգ ձևավորեն, որ գործող վարչապետը կատարի գործող շոգեքարշի դերը, իրենք էլ վագոններում նստած հայտնվեն հաջորդ ԱԺ-ում։ Այս մասին «Փաստինֆո»-ի հետ զրույցում ասաց քաղտեխնոլոգ Արմեն Բադալյանը։

Նշենք, որ ԱԺ «Իմ քայլը» խմբակցությունը հակված է փոփոխություններ կատարել Ընտրական օրենսգրքում և արտահերթ ընտրությունների գնալ համամասնական ընտրակարգով։ Մինչդեռ ԸՕ փոփոխություններն անընդունելի է համարում «Լուսավոր Հայաստան» խմբակցությունը։ Նրանց պնդմամբ ձեռք է բերվել պայմանավորվածություն, որ հունիսի 20-ին տեղի են ունենալու ընտրություններ և դրանից հետո որևէ խաղի կանոն փոխելը նշանակում է պայմանավորվածություն խախտել;

Նրա խոսքով ԱԺ «Իմ քայլը» խմբակցությունը կողմ է Ընտրական օրենսգրքի փոփոխություններին, քանի որ մարզերում չունի հեղինակավոր գործիչներ, որոնք վարկանիշային ընտրակարգով kկարողանան ձայն բերել․ «Բոլորը գիտեն, որ իրենց համար ձայն բերողը վարչապետն է։ Այդ թիմում առավել ամուր է սորոսական թևը, որը պետք է կարողանա դիրքերն ամրապնդել և վարչապետի ուսերին նստած մտնել խորհրդարան»,-նշեց Արմեն Բադալյանը՝ ընդգծելով, որ ոչ միայն սորոսականները, այլ «Իմ քայլ»-ի մյուս պատգամավորներն էլ գիտեն, որ առանց վարչապետի անգամ զրո ձայն չեն ստանա։

«Դրա համար ուզում են ձևավորել ընտրակարգ, որտեղ շոգեքարշի դերը կկատարի գործող վարչապետը։ Այսինքն նա ամեն գնով կցանկանա իշխանություն ունենալ և չի բացառվում, որ վարչական ռեսուրս կկիրառի, իսկ պատգամավորները վագոններում նստած կհայտնվեն ԱԺ-ում և ավելի նվիրված կլինեն վարչապետին։ Սա է «Իմ քայլ»-ի նպատակը»,-նշեց քաղտեխնոլոգը։

Ինչ վերաբերում է «Լուսավոր Հայաստան» խմբակցությանը, ապա Արմեն Բադալյանի կարծիքով տրամաբանական կլիներ, եթե նրանք նույնպես կողմ լինեին ԸՕ փոփոխություններին, քանի որ մարզերում խիստ մեծ վարկանիշ ունեցող գործիչներ․ «Չի բացառվում, որ ԼՀԿ-ն այլ քաղաքական ուժերին աջակցություն իրականացնելու համար է պաշտպանում վարկանիշային ընտրակարգը։ Երբ ընտրական գործընթացը սկսվի, այդ ժամանակ կիմանաք՝ որ ուժերի համար էր այս գործընթացը»,-նշեց քաղտեխնոլոգը։

Վերջինս ընդգծեց՝ կան քաղաքական ուժեր, որոնք մարզերում բավականին ակտիվ են, կարող են վարկանիշային թեկնածուներ ունենալ, հայտնվել խորհրդարանում և նրանց համար գործող ԸՕ-ն ավելի ձեռնտու է։

Հարցին՝ հնարավո՞ր է ԼՀԿ-ն այդ ուժի հետ դաշինքով մասնակցի արտահերթ ընտրություններին, քաղտեխնոլոգն ասաց․ «Կարող է չստացվի այդպես։ Ամենատարբեր զարգացումները կարող են տեղի ունենալ, տարբեր ձևաչափեր կարող են լինել»։

Անդրադառնալով «Լուսավոր Հայաստան» խմբակցության ղեկավար Էդմոն Մարուքյանի այն հայտարարությանը, որ ԸՕ փոփոխություններով խախտվում է ձեռք բերված պայմանավորվածությունը, Արմեն Բադալյանը նկատեց՝ խնդիրը հիմնականում խմբակցության հետ է կապված, այլ ոչ վարչապետի և ընտրական օրենսգրքում փոփոխությունների պահանջը սորոսականներինն է։

«Քանի որ Հայաստանում գործ ունենք իշխանության հետ, որը րոպեն մեկ կարող է պայմանավորվածություններ խախտել, ապա չի բացառվում, որ խախտվեն բոլոր պայմանավորվածությունները և ընդհանրապես հունիսի 20-ի ընտրությունները տեղի չունենան»,-նշեց քաղտեխնոլոգը։

Աղբյուր` Փաստինֆո