Փաստ ինֆո

«Այն, որ հրապարակում համախմբված ընդդիմությունը ցանկանում է ամեն կերպ իշխանափոխության հասնել հենց Սահմանադրական ճանապարհով, խոսում է իրավական պետություն ունենալու հեռանկարի և մտահոգության մասին: Սրանից երեք տարի առաջ, դեռևս ընդդիմության դիրքերից իշխանության համար պայքարող խունտան իշխանության եկավ հակասահմանադրական ճանապարհով և իր իշխանության ողջ ընթացքում կատարեց, մեծամասամբ, հենց հակասահմանադրական քայլեր: Հակապետական մտածողությամբ օժտված մի խումբ, մոլորյալների մի ավելի մեծ խմբի հետ միասին, լցվեցին փողոցները, ամբողջովին կաթվածահար արեցին պետական համակարգը, բացահայտ շանտաժի միջոցով զավթեցին պետության ղեկը, ինչի արդյունքում մենք ունեցանք այն, ինչ ունենք: Հետևաբար, գիտակցելով հակասահմանադրական քայլերի ողջ հետևանքները, պարզ է, որ ընդդիմության դիրքերից հանդես եկող քաղաքական ուժը չի ցանկանում այդ ճանապարհով գնալ»,- ասում է գրականագետ Սերժ Սրապիոնյանը, «Փաստինֆո»-ի հետ զրույցում քննարկելով ներքաղաքական դաշտի վերջին ժամերի լարված զարգացումները:

Սրապիոնյանը նկատում է՝ հավանաբար սրանից երեք տարի առաջ իշխանության ղեկին գտնվողները կարծում էին, թե սա ժամանակավոր աղետ է, որ իշխանությունը զավթելու մոլուցքով տարված խունտան, անպայմանորեն և շատ արագ տապալելու է պետություն կառավարելու ծանր բեռը, հետևաբար, արյունահեղությունից խուսափելու համար, նրանք կամովին լքեցին իշխանությունը, բայց ժամանակը ցույց տվեց, որ դավաճանական վարքով աչքի ընկնող նոր իշխանությունը շատ հեռուն գնացող պլաններ ուներ, ինչի արդյունքը ունեցանք ողբերգական պատերազմ, կորցրեցինք Արցախի տարածքների զգալի մասը, իսկ հիմա, ըստ գրականագետի, արդեն կանգնած ենք նաև պետականության կորստի առաջ. «Մենք հասել ենք նրան, որ ստեղծված իրավիճակում իշխանության սխալների մասին բարձրաձայնող բոլոր մարդիկ և քաղաքական ուժերը, մինչև անգամ՝ ընդդիմության միասնական թեկնածուն, պիտակավորվում են որպես պետական դավաճաններ և մեկուսարաններում են հայտնվում:

Այն աղետալի վիճակը, որում մենք հիմա հայտնվել ենք՝ և´ պատերազմի հետևանքների, և´ զոհվածների աննախադեպ թվի, և´ գերեվարածների ու անհետ կորածների առումով, ինչպես նաև՝ ՀՀ սահմանների վերաձևակերպման տեսակետից մեզ դրել է միջազգային հանրության ուշադրության կենտրոնում: Հետևաբար, օրվա իշխանություններին հեռացնելու սահմանադրական ճանապարհները հնարավորություն կտան խուսափել հետագա անցանկալի զարգացումներից, որը կարող է հանդես գալ նույն այդ միջազգային հանրության տարատեսակ ճնշումների տեսքով: Մի բան հստակ է՝ այս խունտան, պետության բարձրագույն աթոռը զբաղեցնող անհավասարակշիռ անձի գլխավորությամբ, երկար դիմանալ չի կարող: Այն աղետները, որ նրանք ամեն օր բերում են այս պետության գլխին՝ հայի ու հայկականի նկատմամբ իրենց անթաքույց ատելությամբ, թշնամու հետ գաղտնի գործարքների գնալու բազմաթիվ օրինակներով և դրանց հետևանքներով, մեզ անդունդի եզրին են հասցրել, ավելին՝ մենք հայտնվել ենք բառացիորեն՝ լինել – չլինելու վտանգի առաջ»,- ասում է Սերժ Սրապիոնյանը:

Վերջինս հռետորական հարց է բարձրացնում ՝ արդյո՞ք ընդդիմությունն իրավունք ունի՞ զայրացած, համբերությունը կորցրած և պատերազմից հյուծված և հուսահատված քաղաքացիներին մղել բախումների, անգամ, եթե նա դա անելու է դավաճան իշխանություններին հեռացնելու նպատակով, ընդ որում՝ այն ոստիկանների դեմ, որոնց շարքերում, ըստ օդում կախված, բայց խիստ հավաստի լուրերի, կան հայերենին հրաշալի տիրապետող օտարազգի տարրեր. «Վերջին մեկուկես տարվա ընթացքում այս իշխանությունը հատուկ նպատակով, ոստիկանության շարքերը համալրել է անխելք, ցաքուցրիվ, անհայրենիք մարդկանց տեսակով, որը, հաստատ, ընդունակ է կրակելու արժանապատվության և հայրենիքի ապագայի մտահոգությամբ փողոց դուրս եկած հայի վրա: Ասենք թե, այդ բախումը եղավ, հիմա հարց է ծագում ՝ արդյո՞ք այս ճանապարհով մենք փրկում ենք երկիրը, թե՞ այն տանում ենք ավելի խորը կործանման ճանապարհով: Չէ՞ որ այսօր փողոց դուրս եկած ընդդիմության և նրա ղեկավարների նպատակն, ի վերջո, երկիրը փրկության տանելն է՝ Հայաստանի հանդեպ ամենաոխերիմ թշնամու ճանկերից՝ ներքին թուրքից, այսինքն՝ օրվա իշխանություններից:

Շնորհիվ այս խունտայի, ողջ Հայաստանը վերածել է աղետի գոտու՝ տնտեսությամբ, կրթական համակարգով, քայքայված բանակով, կորցրած Արցախով, վտանգված արտաքին սահմաններով և, ի վերջո՝ բարոյականությամբ: Եվ ամենասարսափելին այն է, որ այս խունտայի մեջ ոմանք դեռևս չեն տեսնում այն վտանգը, որը տեսանելի է թուրք ադրբեջանական տանդեմի մեջ: Ուշքի գալու իմաստով, սա, թերևս, ամենավտանգավորն է: Հենց այս նպատակով էլ ես շեշտում եմ, որ այս իշխանությունն ամենավտանգավոր և աղետալի փորձանքն է՝ կախված Հայաստանի և հայ ժողովրդի լինելիության գլխին, որից ժամ առաջ ազատագրվելու խնդիրը, թերևս այս պահի մեր ներքաղաքական կյանքի հիմնական գերխնդիրն է»,- ամփոփելով զրույցն, ասում է գրականագետ Սերժ Սրապիոնյանը:

Հեղինակ՝ Նվարդ Մանվելյան

Աղբյուր` Փաստինֆո