Փաստ ինֆո

Խոսում ենք ժողովրդավարությունից, բայց դրանից հեռացել ենք: Այն ինչ ցանել են, դա էլ պետք է հնձեն, ժամանակին իրենք են ցանկացածին վիրավորել: Այս մասին «Փաստինֆո»-ի հետ զրույցում ասաց ԱԺ անկախ պատգամավոր Սոֆյա Հովսեփյանը՝ անդրադառնալով «Իմ քայլ»-ի շրջանառած նախագծին, որով վարչապետին, պատգամավորներին վիրավորելու, զրպարտելու դեպքում սահմանված տուգանքը մի քանի անգամ կբարձրացվի, իսկ վիրավորանքը կրկնելու դեպքում անձը քրեական պատասխանատվության կենթարկվի:

Պատգամավորի արձանագրմամբ՝ ազատ խոսքը միշտ եղել է առաջնահերթություն, և բնակչությունը ինչ մտածել, ասել է, այնպես չէ, դա լավ բան է, ընդհակառակը՝ շատ տհաճ երևույթ է, բայց դա պետք է ոչ թե տուգանքներով լինի, այլ՝ կրթությամբ։ «Պետք է մարդու կրթությունը  փոխեն, որպեսզի վիրավորելու փոխարեն կարողանան ավելի զուսպ, գրագետ իրենց խոսքը ներկայացնեն»,- նշել է պատգամավորը եւ ավելացրել. «Այսօր, եթե պատգամավորներն ի վիճակի չեն իրենց խոսքը զուսպ ներկայացնել, ապա մենք ինչ պիտի  ակնկալենք այն մարդկանցից, ովքեր համապատասխան գիտելիքներ չունեն առավել կոռեկտ արտահայտվելու առումով»,-ասաց պատգամավորը:

 Սոֆյա Հովսեփյանը նկատում է, որ սա իշխանության պաշտպանության ձևերից մեկն է.

«Չի կարելի մարդուն վախեցնել , պետք է ազատ արտահայտվի: Ժամանակին այսօրվա պատգամավորներն են նույն կերպ վարվել, երբ մերժում էին նախկին իշխանությանը: Ցավալի է, որ մենք ականատես ենք լինում նաև պատգամավոր եղած ժամանակահատվածում ոչ կոռեկտ խոսելաոճին»,-ասաց տիկին Հովսեփյանը՝ ընդգծելով, որ նախ պետք է օրինակ ծառայել, հետո նոր սովորեցնել:

« Մարդկանց պետք է սովորեցնել, այլ ոչ թե վախեցնել կամ տուգանել: Սա ինձ համար անընդունելի գործելաոճ է, երբ փորձում են վախեցնելով լուծումներ գտնել»,-ասաց պատգամավորը::

Սոֆյա Հովսեփյանը, անդրադառնալով նախագծի այն կետին, որով վիրավորանքը կրկնելու դեպքում անձը հնարավոր է քրեական պատասխանատվության ենթարկվի, ասաց.

«Լուրջ հանցագործներին չեն կարողացել ձերբակալեն, որոնց մեղադրել են կոռուպցիայի, թալանի և մարդասպանության համար: Ձերբակալել քաղաքացիներին այն բանի համար, որ նա կարող է վիրավորել պատգամավորին կամ ոչ պատշաճ արտահայտվի, դա նշանակում է, որ երկրի կեսին պետք է կալանավորեն»:

Պատգամավորի խոսքով՝ իշխանության գործառույթը պետք է լինի հասկանալ՝ ինչ խնդիր է ծագել երկրում և ինչ լուծում պետք է տալ, այլ ոչ թե նայեն՝ ով իրենց ինչ ասեց.

 «Ասում են այն, ինչի արժանանում եք՝ ձեր ոչինչ չանելով»,-ընդգծեց պատգամավորը:

Մեր այն դիտարկմանը, թե արդյոք անհրաժեշտություն չկա ևս մեկ նախագիծ մշակել, որը կվերահսկի պատգամավորների կամ վարչապետի հաղորդած տեղեկությունը, Սոֆյա Հովսեփյանը կարծում է, որ սրանով պատգամավորները կկաշկանդվեն և  կվերացվի նրանց վերահսկողական գործառույթը.

«Եթե քաղաքական գործիչը տարբեր հարցերում պետք է գերկաշկանդված լինի և խնդիրը տեսնելուց չբարձրաձայնի, ապա այստեղ վերահսկողական գործառույթն էլ է կորում:

Պատգամավորը տեսնում է խնդիր, ուսումնասիրում է և հաղորդում է տալիս, որ կա այս խնդիրը, կարող է դա զրպարտություն դիտարկվի այն դեպքում, երբ պետք էր կոնկրետ իրավապահ մարմիններն աշխատեին: Ստացվում է՝ պետք է պատգամավորի նկատմամբ զրպարտության հոդված կիրառվի, եթե կան ակնհայտ խնդիրներ և այդ խնդիրները այս կամ այն ճանապարհով կոծկվում էին և չեն դիտարկվում: Ստացվում է թիրախավորվելու է պատգամավորը, այստեղ վերահսկողական գործիքը, եթե կիրառվի դ դառնալու  է լուրջ խնդիր: Շատ հարցեր են լինում, երբ տեսնում ես ակնհայտ պաշտոնական դիրքի չարաշահում, որպես պատգամավոր դրա մասին խոսում ես, կարող է դա շատ հեշտությամբ իրավապահ մարմինների և դատախազության ոչ պատշաճ գործունեության արդյունքում դառնա զրպարտություն»,-ասաց տիկին Հովսեփյանը:

Աղբյուր` Փաստինֆո