Փաստ ինֆո

Նիկոլ Փաշինյանի կողմից կապիտուլյացիոն ակտի ստորագրումից հետո՝ նոյեմբերի 9-ի լույս 10-ի գիշերը, Կառավարության շենք մուտք գործած Սերգեյ Խառատյանը և Էդգար Գրիգորյանը կշարունակեն մնալ կալանավորված։ Երևանի ընդհանուր իրավասության դատարանը՝ դատավոր Արմինե Մելիքսեթյանի նախագահությամբ, մերժել է նրանց 15 մլն դրամ գրավի դիմաց ազատ արձակելու մասին պաշտպանների միջնորդությունը։ Պաշտպան Ալեքսանդր Կոչուբաևը «Փաստինֆո»-ի հետ զրույցում ասաց, որ դատարանի որոշումը դեռևս չեն ստացել, սակայն այն կանխատեսելի էր, քանի որ գործի շուրջ արտաիրավական զարգացումներ կան ։ 

«Մեզ համար արդեն մտահոգիչ է այն, ինչ տեղի ունենում։ Նշանակված ժամերից արդեն երկու դեպքով մեկ ժամ ուշացումով է սկսվում նիստը, ընդ որում այն պարագայում, երբ դատարանը ծանրաբեռնված չէ այլ գործերով։ Այսինքն, գտնվելով խորհրդակցական սենյակում, դատարանը ենթարկվում է ճնշումների և պատվեր է իջեցվում»,- նշեց նա՝ հավելելով, որ չի հասկանում տրամաբանությունը, քանի որ անձն իրեն վերագրվող գործողությունները վերապահումներով ընդունում է, չկան այնպիսի վկաներ, ում վրա կարող են ապօրինի ազդեցություն գործել, գործողությունների ամբողջ շղթան արձանագրված է տեսախցիկներով և տեսախցիկի ձայնագրության վրա ազդելն իրատեսական չէ, քանի որ այն արդեն ամրագրված է, գտնվում է դատարանի վարույթում։
Ըստ փաստաբանի՝ գործ ունեն ոչ այդքան քրեական հետապնդման, որքան՝ իջեցված պատվերով գործի հետ, մեղադրանքը ծայրաստիճան անորոշ և վերացական է։

«Մեզ համար առհասարակ անհասկանալի է՝ ինչից պաշտպանվել»,- նշեց նա՝ հավելելով, որ դատարանը վախենում է գնահատականներ տալ այն մասին, որ առկա չեն կալանավորման հիմքերը, ուստի՝ մնում է միայն մեկ տարբերակ՝ գործ ունենք քաղաքական պատվերի հետ։
Նրա խոսքերով՝ պաշտպանական կողմը ներկայացրել էր 15 մլն ՀՀ դրամի չափով գրավի միջնորդություն, որը մերժվեց։ Ընդ որում՝ գրավի միջնորդությունը մերժվում է արդեն երկրորդ անգամ, նախորդ անգամ գրավի չափ էր առաջարկվել 12 ՀՀ մլն դրամը։
Փաստաբանի գնահատմամբ՝ գրավի առաջին միջնորդությունը դատարանը մերժել էր անհեթեթ հիմնավորումներով, գտել էր, թե դատակոչում կան բազմաթիվ անձինք, որոնք հարցաքննված չեն և ամբաստանյալները, մնալով ազատության մեջ, կարող են անօրինական ազդեցություն ունենալ նրանց վրա։ Մինչդեռ՝ այդ վկաները, ըստ փաստաբանի, կրկնում են Սերգեյ Խառատյանի ցուցմունքները։

«Սերգեյ Խառատյանն ինքն իրենով է ցուցմունք տվել և հայտնել, որ այդ տեսանյութի մեջ պատկերված անձն ինքն է։ Ընդամենն այդ երկու վկան ևս տեսել և ճանաչել են Սերգեյ Խառատյանին, տվել նույնաբովանդակ ցուցմունք»,- նշեց Կոչուբաևը՝ հավելելով, որ նման պայմաններում այդ որակումը ծիծաղելի է. «Ազդի, որ ինչ լինի՞։ Առկա չէ ազդեցության օբյեկտը, ազդեցության ողջամիտ շարժառիթը, քանի որ այն վկաները, ում վրա ենթադրաբար պետք է ազդեցություն ունենար Սերգեյ Խառատյանը՝ նույն ցուցմունքներն են տալիս։ Այսինքն՝ պետք է ազդի, որ իր դեմ ցուցմունք տան»։

Փաստաբանը համոզմունք հայտնեց առ այն, որ գործ ունեն արտաիրավական գործընթացի հետ, ինչի մասին վկայում է նաև գործով ավելի վաղ կայացված Վերաքննիչ դատարանի որոշումը, երբ բողոքարկվել էր մեղադրյալի նկատմամբ ընտրված խափանման միջոց կալանավորումն անփոփոխ թողնելու մասին որոշումը, սակայն Վերաքննիչ քրեական դատարանի դատավորը պարզաբանել է, որ որոշել էր 5 մլն դրամի չափով գրավ կիրառել, սակայն խորհրդակցական սենյակից մեկ ժամ ուշացումով գալուց հետո նշել է, որ «ձեռքը չի գնում»։ Փաստաբանը կարծում է, որ նույնն էլ այս պարագայում է։

«Վստահ եմ՝ ներքին համոզմամբ առնվազն վստահ է, որ այլ խափանման միջոց պետք է կիրառվի կամ առհասարակ որևէ խափանման միջոց չկիրառվի, բայց «ձեռքը չի գնում»։ Իսկ թե ինչու ձեռքը չի գնում՝ կարծում եմ ունի հայտնի պատճառներ»,- նշեց նա՝ հավելելով, որ չի ցանկանում մտնել «գագիկջհանգիրյանական» իրավաբանության մեջ և ասել, թե ինչու մյուս գործերով կալանավորումները վերացվել են, իսկ այս դեպքում՝ ոչ։

«Խոսում ենք բացառապես նույն զանգվածային անկարգության մասին, որի շրջանակներում մեկ դրվագով «քաշելուց բռնակն է պոկվել», մյուս դեպքում՝ Արարատ Միրզոյանին սարսափելի ծեծի են ենթարկել»,- ասաց փաստաբանը՝ արձանագրելով, որ Արարատ Միրզոյանին նույն զանգվածային անկարգության համատեքստում դաժան ծեծի ենթարկելը չի հանգեցնում կալանավորումը որպես խափանման միջոցի կիրառման, իսկ բռնակը քաշելը հանգեցնում է, ընդ որում՝ սա այն դեպքում, երբ բռնակը քաշող անձն ընդունում է դա, իսկ մեղադրանքում այլ բան չկա։

«Սա Ջհանգիրյանին բնորոշ իրավաբանություն է, բայց եթե զուգահեռներ տանենք, իրականում անհասկանալի է, թե ինչու նույն գործի մեկ այլ դրվագով հարաբերակցության մեջ ավելի ծանր հանցագործության մեջ մեղադրվող անձը պետք է գտնվի ազատության մեջ, իսկ բռնակ պոկողը՝ ոչ»,- նշեց Կոչուբաևը՝ ընդգծելով, որ պետք է չմոռանալ, որ գործով տուժողի կարգավիճակում են Նիկոլ Փաշինյանը և նրա մամուլի խոսնակը, ուստի՝ հասկանալի է, թե ինչու են անձինք գտնվում կալանքի տակ ։

Հիշեցնենք, որ մի խումբ քաղաքացիների ՀՀ կառավարության շենք, կառավարական առանձնատուն մուտք գործելուց հետո՝ Ն.Փաշինյանը հայտարարել է, թե հափշտակվել է օծանելիք, համակարգիչ, ժամացույց եւ այլ իրեր, սակայն դիվանագիտական անձնագրերի հափշտակության մասին որեւէ խոսք չի եղել։ Դեպքի առթիվ հարուցված քրեական գործով նախաքննությունը կատարվում է ԱԱԾ-ում, որից անջատված մասը մի քանի մեղադրյալների մասով ուղարկվել է դատարան։

Հեղինակ՝ Իզաբել Սահակյան

Աղբյուր` Փաստինֆո