Փաստ ինֆո

«Այսօր տեղեկություն տարածվեց այն մասին, որ Նիկոլ Փաշինյանը, հնարավոր է, կրկին մեկնի Մոսկվա: Ճիշտ է, Փաշինյանի խոսնակը այցի վերաբերյալ լուրերը հերքում է, սակայն, ցավոք, այս իշխանության օրոք մենք որևէ հերքման կամ հաստատման հավատալու հիմքեր ունենալ չենք կարող: Ի վերջո, վերջին պատերազմը մեզ ցույց տվեց, որ մենք 44 օր շարունակ հաղթում էինք և, հանկարծ, 45-րդ օրը, չհասցնելով հասկանալ, թե ինչպես պարտվեցինք, կապիտուլյացիայի խայտառակ համաձայնագիր ստորագրեցինք: Հետևաբար, այսօր էլ դժվար է ասել՝ այդ տեղեկությունը համապատասխանո՞ւմ է իրականությանը, թե՞ ոչ, մյուս կողմից, սա կարող է կապված լինել երեկ հայրենիք վերադարձած հինգը ռազմագերիների փաստով, որի դիմաց, չի բացառվում, որ հայկական կողմը հերթական ցավոտ զիջումների է գնալու»,- «Փաստինֆո»-ի հետ զրույցում ասել է քաղաքագետ Արա Վարդանյանը:

Հիշեցնենք՝ մամուլում այսօր լուրեր տարածվեցին այն մասին, որ ՀՀ-ում վարչապետ աշխատող Նիկոլ Փաշինյանը մեկօրյա այցով կրկին պատրաստվում է մեկնել Մոսկվա։ Թեև վարչապետի խոսնակ Մանե Գևորգյանը հերքել է այցի մասին տրածված լուրերն, այնուհանդերձ, ենթադրվում է, որ Փաշինյանը Մոսկվայում հերթական նվաստացուցիչ փաստաթուղթն է ստորագրելու:

Քաղաքագետ Արա Վարդանյանը նկատում է՝ եթե Փաշինյանը հերթական անգամ մեկնում է Մոսկվա և, եթե նա այնտեղ որևէ փաստաթուղթ է ստորագրելու, որը գաղտնի է պահվում, սա նշանակում է, որ, ամենամոտ ապագայում, մենք ականատես ենք լինելու հերթական դավադիր գործարքին, որը, սակայն, շատ բնութագրական է օրվա իշխանությանը և այդ իշխանության պարագլուխ Նիկոլ Փաշինյանի ձեռագրին. «Կարծում եմ, գիտակից որևէ մեկի համար այլևս գաղտնիք չէ այն իրողությունը, որ Նիկոլ Փաշինյանը ոչ թե մեր պետության ապագայով մտահոգ ղեկավար է, այլ Հայաստանի Հանրապետությունում Ադրբեջանի արտակարգ և լիազոր դեսպանը: Նա այլևս չի ներկայացնում Հայաստանի Հանրապետությունը, այդ հանրապետության ժողովրդին և մեր պետության ու Արցախի շահը: Ի վերջո, մենք արդեն ականատես ենք եղել այն փաստին, որ Փաշինյանի և Ալիևի կարծիքները համընկնում են ինչպես Շուշիի հարցում, այնպես էլ նաև ՀՀ երկրորդ և երրորդ նախագահների պարագաներում: Այս ամենից պետք է հետևություն անել, որ Փաշինյանի օրակարգը ոչ թե Հայաստանի Հանրապետության և Արցախի շահերին ծառայելն է, այլ թշնամական Թուրքիայի և Ադրբեջանի ազգակործան ծրագրերի իրականացումը, որի վառ դրսևորումը պատերազմի դավադիր պարտությունն էր: Ասեմ ավելին՝ Փաշինյանը համառորեն չի հեռանում, որովհետև դեռ անելիքներ ունի: Ի վերջո, բոլորովին պատահական չէ այն հանգամանքը, որ այդ մարդու անունը կնքել են հողատու…»,- ասում է քաղաքագետը:

Ամփոփելով զրույցը՝ Արա Վարդանյանը կոչով դիմում է ժողովրդին՝ գիտակցելով և հասկանալով Հայաստանի հետ պատահած և դեռ սպասվելիք աղետները, ակտիվ մասնակցություն բերել փետրվարի 20-ին կայանալիք միացյալ ընդդիմության հանրահավաքին, օր առաջ հեռացնելու դավադիր և դավաճան իշխանությանը և կանխելու Նիկոլ Փաշինյանի գլխավորությամբ վերջիններիս ազգակործան և աղետաբեր քաղաքականությունը:

Հեղինակ՝ Նվարդ Մանվելյան

Աղբյուր` Փաստինֆո