Փաստ ինֆո

Արտահերթ ընտրություններ անցկացնելու մասին իշխանությունների հայտարարությունն ի սկզբանե հնչեցվել էր հրաժարականի օրակարգը շեղելու և քաղաքական օրակարգը այլ գաղափարով լցնելու նպատակով: Փաշինյանը հասկանում էր, որ ընդդիմադիրների մոտ կարող էր դա տարաձայնություններ առաջացնել: «Փաստինֆո»-ի հետ զրույցում նման տեսակետ է հայտնել քաղտեխնոլոգ Վիգեն Հակոբյանը՝ անդրադառնալով «Իմ քայլը» խմբակցության՝ արտահերթ ընտրությունների գաղափարից հրաժարվելու մասին հայտարարությանը:

Քաղտեխնոլոգը կարծում է՝ Փաշինյանը հույս ուներ, թե իր սցենարով արտահերթ ընտրությունների գաղափարը չի ընդունվի.

«Արտահերթ ընտրություններ անցկացնելու անհրաժեշտության մասին նշել են բոլոր քաղաքական ուժերը, այստեղ խոսքը տարբեր մոդելների մասին է: Խորհրդարանական և արտախորհրդարանական ընդդիմությունը ժամանակավոր կառավարության կողմնակից են, որը որոշ ժամանակ հետո պետք է անցկացնի արտահերթ ընտրություններ: Նիկոլ Փաշինյանը առաջարկում է ընտրություններ անցկացնել հիմա՝ գործող վարչակազմի կողմից»,-ասաց քաղտեխնոլոգը՝ նկատելով, որ տարաձայնությունը ոչ թե արտահերթ ընտրություններ անցկացնելու շուրջ էր, այլ՝ մեթոդոլոգիայի:

Զրուցակիցն արձանագրում է՝ արտահերթ ընտրություններ անցկացնելու շուրջ քաղաքական դաշտում կա կոնսենսուս.

«Նիկոլ Փաշինյանը ուղղակի հույս ուներ, որ քաղաքական նոր օրակարգ կլինի: Փաշինյանը, եթե համարենք հույսը դնում է վարչական ռեսուրսի վրա, շատ արագ հասկացավ, որ այդ վարչական ռեսուրս էլ առանձնապես մեծ չէ իր մոտ, և ինքը լիակատար չի վերահսկում վարչական ռեսուրսներին՝ Եռաբլուրի օպերացիան և Սյունիք գնալու անհաջողությունը դա ցայտուն կերպով ցույց տվեց»,-ասաց փորձագետը:

Վիգեն Հակոբյանը կարծում է, որ Ռոբերտ Քոչարյանի հայտարարությունը՝ ընտրություններին մասնակցելու մտադրության մասին, լրիվ խառնեց Փաշինյանի ծրագրերը, քանի որ, ըստ փորձագետի, դա նշանակում է եթե արտախորհրդարանական ուժերից որևէ մեկն էլ չմասնակցի ընտրություններին, ապա Քոչարյանը դառնում է կոնսոլիդացիայի միջուկը ընդդիմության մեջ:
«Կարծում եմ՝ այս գործոնների պայմաններում Փաշինյանը հասկացավ, որ արտահերթ ընտրությունների անցկացումը բավականին կասկածելի արդյունք է խոստանում»,-ասաց Վիգեն Հակոբյանը:

Անդրադառնալով «Իմ քայլի» այն պնդմանը, որ հասարակության շրջանում ընտրությունների պահանջարկ չկա, փորձագետը նկատում է.
«Փաստացի ազգի էլիտան պահանջում է Փաշինյանի հրաժարականը, եթե մենք պատկերացնում ենք, որ պետք է հազարավոր մարդիկ դուրս գան և պահանջեն արտահերթ ընտրություններ, ապա վստահեցնում եմ, այդ դեպքում գործը չի հասնի ընտրություններին: Էլիտան և քաղաքական կառույցներն են արտացոլում են հասարակության պահանջը, առավել ևս, երբ դրանց միանում է պետության և ժողովրդի վերնախավի պահանջը»,-ասաց Վիգեն Հակոբյանը:

Քաղտեխնոլոգը վստահեցնում է, արտահերթ ընտրություններին հրաժարվելով, իշխանությունը նվազեցնում է խաղաղ պայքարի հնարավորությունները.

«Եթե քաղաքական պատուհանը փակում ես, ապա խաղաղ պայքարի հնարավորությունները մի կողմից պակասում են, մյուս կողմից ավելանում են այլ ռեսուրսներ, այլ խաղի կանոններ են ստացվում և այդ պարագայում ցանկացած սխեմա կարող է լինել: Երբ շատ տարբերակներ չես ունենում կոնսոլիդացիան լինում է այն տարբերակի շուրջ, որը մնացել է»,-եզրափակեց զրուցակիցը:

Աղբյուր` Փաստինֆո