Փաստ ինֆո

ՀԱՊԿ գլխավոր քարտուղարի նամակը հուշում է, որ ՀԱՊԿ-ի կողմից զգուշացում եղել է որոշակի վտանգների մասին։ Դժվար է գնահատական տալ՝ սա պետական մակարդակի դավաճանություն է, թե գործ ունենք դիլետանտ կառավարման համակարգի հետ, որն ուղղակի զբաղվել է պոպուլիզմով ու ամեն ինչ սրան հանգեցրել։ «Փաստինֆո»-ի հետ զրույցում այս մասին ասաց անվտանգության հարցերի փորձագետ Արմեն Մանվելյանը։

Հիշեցնենք, որ Վատիկանում Հայաստանի նախկին դեսպան Միքայել Մինասյանը ֆեյսբուքյան իր ուղիղ եթերում բացահայտումների շարքով տեղեկացրել է, որ պատերազմից 26 օր առաջ ՀԱՊԿ գլխավոր քարտուղար Ստանիսլավ Զասը գաղտնի նամակ է գրել Հայաստանի անվտանգության խորհրդի քարտուղար Արմեն Գրիգորյանին եւ նկարագրել սպասվող պատերազմը:

Փորձագետի խոսքով իրար հետևից շրջանառության մեջ մտնող փաստերը հանգեցնում են մի բանի, որ գործող իշխանությունների կողմից քաոսային վիճակ է ստեղծվել, ինչն էլ հանգեցրել է խայտառակ պարտության և մեր հայրենիքի մի մասի կորուստին։

«Մի քանի բան կա, որ հստակ է։ Նախ՝ այս պատերազմը հրահրել է հենց հայկական կողմն իր տասնյակ սխալներով։ Առաջին ազդանշանը Խաչատուրովի ձերբակալումն էր այն ժամանակ, երբ նա ՀԱՊԿ-ի գլխավոր քարտուղարն էր։ ՀԱՊԿ-ի գլխավոր քարտուղարի պաշտոնից ազատվելուց հետո նրան չձերբակալեցին և նույնիսկ 15 րոպե բանտում չի եղել։ Դա արդեն ցույց է տալիս, որ նպատակը ոչ թե Յուրի Խաչատուրով անձին ձերբակալելն էր, այլ նպատակը ՀԱՊԿ-ի ղեկավարի, տվյալ դեպքում Ռուսաստանի դեմ քայլն էր։ Հասկանալի է, որ սա առաջին ազդանշանն էր և՛ Ադրբեջանին, և՛ այն ուժերին, որոնք վաղուց ռևանշի համար առիթի են սպասում։ ՀԱՊԿ-ի նամակում կա նաև Հայաստանում գործող ինչ-որ գործակալական ցանցի և ահաբեկչական խմբավորումների մասին հիշատակում։ Այսինքն եթե այս ամենն իրականությանը մոտ է, ապա հզոր գործակալական ցանց է աշխատել և զբաղվել երկրի պառակտմամբ ու ոչնչացմամբ։ Այդ ցանցին ներգրավված են եղել Ադրբեջանը և Թուրքիան՝ շատ լավ իմանալով ինչ է կատարվում երկրում»,-ասաց փորձագետը՝ նշելով, որ բանակի թուլացումը, գեներալների հեռացումը բանակից հանգեցրեց այս ամենին և հստակ է, որ երկիրը, պետությունը թուլացնելու միտում է եղել։

Անդրադառնալով դիտարկմանը, որ Նիկոլ Փաշինյանը աշխարհի որոշ ուժերի համար լավ տարբերակ է եղել իշխանության գալու և ծրագրերն իրականացնելու համար՝ Արմեն Մանվելյանն ասաց․ «Չերչիլն ասել է, որ պետության ոչնչացման համար ոչ այնքան դավաճաններ են պետք, ինչքան հիմարներ։ Իհարկե, դավաճանության փաստ կա։ Համոզված եմ, որ եղել է համակարգված դավաճանություն, բայց հիմարներին բերեցին իշխանության, որոնք պետք է իրականացնեին տարբեր կեղծ օրակարգեր, կեղծ արժեհամակարգեր, նախկին-ներկա բաժանեին, ինչը ձեռք էր տալիս հենց այդ աշխարհաքաղաքական կենտրոններին, որոնց նպատակը Հայաստանի թուլացումը, Արցախի հանձնումն էր։ Այսինքն` դիլետանտ իշխանությունը կատարեց այն օրակարգը, որը դրսին էր պետք»,-նշեց Արմեն Մանվելյանը։

Անդրադառնալով վարչապետի հարցազրույցում հնչեցրած այն արտահայտությանը, որ սահմանային ճշգրտումները տեղի են ունենում բանավոր ըմբռնման հիման վրա՝ Արմեն Մանվելյանը նկատեց՝ երբ առաջին անգամ շրջանառության մեջ դրվեց նոյեմբերի 9-ի եռակողմ հայտարարությունը, այնտեղ նշված էր, որ Ղազախի շրջանի հայկական կողմի վերահսկողության տակ գտնվող տարածքները պետք է հանձնվեն Ադրբեջանին, սակայն երկրորդ տարբերակում այն չկար․ «Ղազախը Տավուշի սահմանամերձ շրջանն է, և այդ մասը վերջնական տարբերակում չկա։ Համոզված եմ, որ Նիկոլ Փաշինյանը խնդրել է այդ մասը հանել, բայց շատ հնարավոր է՝ բանավոր համաձայնությամբ ամբողջ սահմանագծի ճշգրտումն արվում է՝ ինչպես ադրբեջանցիներն են ուզում։ Հետևաբար` համոզված եմ, որ Սյունիքի հանձնումից հետո Տավուշի հանձնման գործընթացը կսկսվի, ինչը շատ վտանգավոր է։ Ժամանակին Գորիսից Կապան գնացող մարդիկ կորում էին, իսկ հետո այդ մարդկանց կտրտած մարմիններն էին գտնում։ Երբ Տավուշի սահմանները գծվում էին՝ հաշվի էին առնվում անվտանգության սկզբունքները, այլ ոչ թե սովետական ինչ-որ սահմանային գոտի։ Փաստորեն այսօր այդ անվտանգության գոտին հանձնել ենք»,-ասաց փորձագետը։

Վերջինս ընդգծեց՝ սա ոչ թե ապագայի համար մեր անվտանգությունը կապահովի, այլ կլինի նոր պատերազմի հիմք, ընդ որում ավելի անբարենպաստ պայմաններով։ Արմեն Մանվելյանի խոսքով Նիկոլ Փաշինյանն ու իր քաղաքական թիմը պետության կործանման քաղաքական գործընթացն են սկսել․ «Այդ սահմանազատումը Սյունիքով չի ավարտվելու, սա դեռ տեղափոխվելու է Նախիջևանի ուղղությամբ, նաև Տավուշում է լինելու, Վարդենիսում։ Ամբողջ դժբախտությունն այն է, որ իշխանությունը զավթած անձինք այսօր խոսում են Նախիջևանով Ռուսաստան գնալու մասին, մինչդեռ հակառակ կողմը հստակ ասում է, որ դիվանագիտական հարաբերություններ երբեք չի հաստատի Հայաստանի հետ, բացի այդ նկրտումներ ունի Զանգեզուրի, Սևանի, Երևանի նկատմամբ։ Թուրքիան ասում է, որ պատրաստ է հարաբերություններ սկսի, երբ իր պահանջները կկատարվեն, այդ թվում ցեղասպանությունն ընդունելու պահանջից կհրաժարվենք։ Այս մարդը փաստորեն Անկարա-Բաքու դաշինքի կամակատարը, ներկայացուցիչն է Հայաստանում»,-ամփոփեց փորձագետը։

Աղբյուր` Փաստինֆո