Փաստ ինֆո

Նոյեմբերի 5-ին՝ ժամը 20։50-ի սահմաններում Բաղրամյան պողոտայում տեղի ունեցած խոշոր ավտովթարի դեպքի առթիվ հարուցվել է քրեական գործ։ ՔԿ դեպարտամենտի տեղեկատվության և հասարակայնության հետ կապերի բաժնի պետ Ռիմա Եգանյանը «Փաստինֆո»-ի հարցին ի պատասխան հայտնեց, որ Երևան քաղաքի քննչական վարչության ճանապարհատրանսպորտային հանցագործությունների քննության բաժնում հարուցվել է քրեական գործ՝ ՀՀ քրեական օրենսգրքի 242-րդ հոդվածի 3-րդ մասի հատկանիշներով, այն է՝ ճանապարհային երթևեկության անվտանգության ապահովմանն ուղղված պահանջները կամ ճանապարհային երթևեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ: 

Նրա փոխանցմամբ՝ ավտովթարի հետևանքով 4 անձ մահացել է տեղում, իսկ ավտոմեքենայի վարորդները և ուղևորներից երկուսը տեղափոխվել են Երևան քաղաքի տարբեր բժշկական կենտրոններ։

Նշենք, որ մարմնական վնասվածք ստացած անձանցից մեկը՝ 10-ամյա տղան, սկզբում տեղափոխվել է «Սուրբ Աստվածամայր», այնուհետև՝ «Նորք Մարաշ» բժշկական կենտրոն:

«Քրեական գործով էական նշանակություն ունեցող հանգամանքներ պարզելու նպատակով նշանակվել են փորձաքննություններ, իսկ ավտովթարի մասնակից մեքենաները տեղափոխվել են Ճանապարհային ոստիկանության հատուկ պահպանվող տարածք»,- հայտնեցին ՔԿ-ից։

Ավելի վաղ հայտնել ենք, որ երեկ՝ նոյեմբերի 5-ի երեկոյան Երևան քաղաքի Բաղրամյան պողոտայում «Մերսեդսես», «Սուզուկի» և «Օպել» մակնիշի ավտոմեքենաների մասնակցությամբ խոշոր ավտովթար է եղել։

Աղբյուր` Փաստինֆո