Փաստ ինֆո

Դեռևս վաղաժամ է խոսել դիակների փոխանակման մասին, պետք է տեսնենք՝ արդյոք կարողանում է այս զինադադարը բարելավել իրավիճակը, ապա միայն խոսենք այդ հարցերի մասին։ Այս մասին «Փաստինֆո»-ի հետ զրույցում ասաց ԱՀ նախագահի արտաքին հարցերով խորհրդական Դավիթ Բաբայանը։

Ինչպես արդեն տեղեկացրել ենք` ԱՄՆ-ում տեղի ունեցած բանակցությունների արդյունքում հայտարարվեց, որ հումանիտար հրադադարի մասին պայմանավորվածություն է ձեռք բերվել, որն ուժի մեջ պետք է մտներ այսօր առավոտյան՝ տեղական ժամանակով՝ 08:00-ին, սակայն Ադրբեջանը կոպտորեն խախտելով ԱՄՆ-ում ձեռք բերված հումանիտար հրադադարի մասին պայմանավորվածությունը, ժամը 08:45-ի սահմաններում հրետանային կրակ է վարել Արցախի հյուսիս-արևելյան մարտական դիրքերի ուղղությամբ, իսկ 09:10-ի սահմաններում թիրախավորեց հարավարևելյան ուղղությամբ դիրքերը: Ավելի ուշ՝ ժամը 11-ի մոտակայքում, գնդակոծվեց Մարտունի քաղաքը՝ ռազմական ավիացիայի կիրառմամբ, իսկ ժամը 17-ից հետո մարտեր սկսվեցին շփման գծի ամբողջ երկայնքով։

«Փաստինֆո»-ի հաղորդմամբ` սա հումանիտար հրադադարի երրորդ փորձն է. առաջին երկրորդ փորձերը` հոկտեմբերի 10-ին ու 18-ին ձախողվել են, քանի որ Ադրբեջանը դրանք խախտել է:

Բաբայանի խոսքով՝ տեղ-տեղ Ադրբեջանը շարունակում է խախտել զինադադարի ռեժիմը, հրթիռակոծել բնակավայրերը, դիրքերը, որոշ հատվածներում փորձ է կատարում առաջխաղացում իրականացնել, իհարկե, ՊԲ-ն կասեցնում է այդ ամենը։

Բաբայանը գտնում է, որ հոկտեմբերի 26-ին ուժի մեջ մտած զինադադարը միգուցե մի քիչ ավելի շատ շանսեր ունի երկար պահպանվելու, որովհետև , նախ և առաջ կարմիր գիծն արդեն հատվում է, ռազմական գործողությունները կարող են դառնալ իսկապես տարածաշրջանային և գլոբալ առճակատում։ Բացի դա՝ մարդասիրական առումով ևս հրադադարը պահանջված է։ Բաբայանի կարծիքով՝ հրադադարի արդեն երրորդ պայմանավորվածությունը խախտելը կլինի ոչ այլ ինչ, քան ահաբեկչություն՝ միջազգային հանրության նկատմամբ։

«Այդ պարագայում՝ ինչու՞ են նախարարների հանդիպմանը համաձայնում, ինչու են վեր կենում և գնում, եթե չի պահպանվելու։ Ինչն է պատճառը։ Ձե՞ռք են առնում՝ Ռուսաստանին, Ֆրանսիային։ Սա արդեն լինելու է այն կարմիր գիծը, որն այս անգամ ևս խախտելու դեպքում, հույս ունեմ, մեծ տերությունները չեն հանդուրժելու այսպիսի ահաբեկչական և լկտի պահվածքը ։ Դրանից հետո մնալու է միայն մեկ բան՝ միջամտություն դրսից, որի հավանականությունը, ըստ էության, մեծ է» ,- նշեց Բաբայանը։

Ըստ նրա՝ պետք է հարվածներ հասցվեն Ադրբեջանին, ահաբեկիչներին, տարբեր ձևերով և, որ այլ տարբերակ չի մնում։ ԱՄՆ նախագահական ընտրությունների շեմին Թրամփի միջնորդությամբ ձեռք բերված պայմանավորվածությունը խախտելն անհարգալից վերաբերմունք է նաև ԱՄՆ-ի նկատմամբ։

«Սա պետք է մնա անպատասխա՞ն։ Եթե մնում է անպատասխան՝ այլ հարց է։ Դա արդեն Ամերիկայի ներքին խնդիրն է, արդեն ինչ է ստացվում, որ ինքն ի վիճակի չէ ինչ-որ Ալիևի սանձազերծի»,- նշեց Բաբայանը։

Հիշեցնենք, որ միջազգային հանրության արձագանքից հետո էլ Թուրքիան շարունակում է մասնակցել ռազմական գործողություններին, օրեր առաջ հայտնի դարձավ, որ Թուրքիայից ևս 1200 հատուկ ջոկատային է տեղափոխվել Արցախյան ճակատ, ավելին՝ Թուրքիայի նախագահ Էրդողանը, կարծես թե, սկսել է թիրախավորել նաև այլ պետությունների ղեկավարներին՝ ըստ էության չվախենալով նաև հնարավոր սանկցիաներից։

Բաբայանը, անդրադառնալով այս հանգամանքին, նշեց. «Երբ Մակրոնին է վիրավորում, երբ գնում են և Ամերիկայի վրա մատ է թափ տալիս և ասում՝ պատժամիջոցներ կիրառեք, եթե այդպիսի տղամարդ եք։ Փաստորեն՝ այդպես է ստացվում։ Երբ Սուրբ Սոֆիայի տաճարը մզկիթի է վերածվում, երբ Էրդողանը հայտարարում է, որ Հիտլերն իր համար որպես ամենաէֆեկտիվ կառավարման մոդելն է, միջազգային հանրությունից բոլորը լալկված նստած են, այդպես է լինելու։ Հետո Իսրայելի որոշ պաշտոնյաներ այդպիսի մարդուն զենք են մատակարարում։ Իհարկե, սա է լինելու հետևանքը»։

Բաբայանը ևս մեկ անգամ ընդգծեց, որ Թուրքիան Թուրքիա է, ցեղասպան երկիր է։

Հիշեցնենք, որ սեպտեմբերի 27-ին Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքիան, վարձկան-ահաբեկիչներ՝ Սմերչ, Պոլոնեզ, թուրքական Կասիրգա եւ այլ զինատեսակներով հրթիռակոծելով խաղաղ բնակավայրերը, այդ թվում մայրաքաղաք Ստեփանակերտը։ ՀՀ ԱԳՆ-ն հայտարարել է, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։ Հայաստանում եւ Արցախում սեպտեմբերի 27-ին հայտարարվել է ռազմական դրություն և ընդհանուր զորահավաք։

Աղբյուր` Փաստինֆո