Փաստ ինֆո

Թուրքիայի ճանապարհին Հայաստանը ընդամենը խոչընդոտ է, որին ուզում է վերացնել,-այս մասին «Փաստինֆո»-ի հետ զրույցում ասաց Հայաստանի մարդու իրավունքների առաջին պաշտպան, «Ընդդեմ իրավական կամայականությունների» ՀԿ նախագահ Լարիսա Ալավերդյանը։

Նշենք, որ սեպտեմբերի 27-ին վաղ առավոտից հակառակորդը ռազմական լայնածավալ գործողություններ է ձեռնարկել Արցախա-արբեջանական շփման գծի ողջ երկայնքով՝ թիրախավորելով և հրթիռակոծելով խաղաղ բնակավայրեր, այդ թվում՝ մայրաքաղաք Ստեփանակերտը։

«Փաստինֆո»-ի հետ զրույցում տիկին Ալավերդյանը նշեց, որ այս պատերազմը, ի տարբերություն ապրիլյանի, բոլորի համար կանխատեսելի էր․

«Նախ մի դիտարկում անեմ, բոլորը, այդ թվում լավատեսները գիտեին, որ սպասվում է այսպիսի հարձակում՝ ոչ ադրբեջանական, ոչ թուրքական ղեկավարության հայտարարությունները այս առումով կասկած չէին թողել։ Հուսամ, սա բանակի համար որոշակի ազդակ է եղել՝ նախապատրաստվելու համար։Այս պատերազմը այնքան անսպասելի չէր, որքան 2016թ-ի ապրիլյանը։ Ինչ վերաբերում է Ադրբեջանի սանձազերծած գործողություններին, ես կարծում եմ, որ Ադրբեջանը ոչ միայն խախտում է միջազգային մարդասիրական նորմերը, այլ՝ ցուցադրական հակադրում է իրեն դեռևս 20-րդ դարի կեսից ձևավորված միջազգային հումանիտար իրավունքին, այսինքն, նա ոչ թե ոտնահարում է միջազգային նորմերը, այլ ինքը իր նորմն է պարտադրում մեր տարածաշրջանում»,-նշեց զրուցակիցը։

Վերջինիս խոսքով մեր ղեկավարությունը դիվանագիտական և տեղեկատվական ճակատում չի ձեռնարկում ոչինչ, միջազգային հանրությանը պատշաճ կերպով իրազեկելու համար, ամեն բան կատարվում է միայն ռազմական ճակատում․

«Ես, բացի ոգևորված ճառերից, մեր ղեկավարության գործողություններում ուրիշ ոչինչ չեմ տեսել։ Ու՞մ են դիմել, ինչու՞ մինչ այժմ Հայաստանը չի դիմել ՄԱԿ-ի անվտանգության խորհրդին,թե՞ սպասում է Ադրբեջանը առաջինը դիմի և ներկայացնի, որ ագրեսիան Հայաստանն է սկսել, ինքը ընդամենը պատասխանում է։ Վստահեցնում եմ, Հայաստանը և Արցախը, նույնիսկ ամենաուժեղ բանակով, չեն կարող միայնակ կանգնեցնել Թուրքիա-Ադրբեջանը դե ֆակտո միությանը»։

Մեր զրուցակցի վստահեցմամբ՝ ամեն բան թողնվել է հայոց բանակի ուսերին, որն էլ այժմ միայնակ է ընդդեմ թուրք-ադրբեջանական տանդեմի։

Մեր այն հարցին, թե ինչպե՞ս կարելի է որակել հակառակորդի սանձազերծած ռազմական գործողությունները՝ ագրեսիա, թե՞՝ չհայտարարված պատերազմ, մեր զրուցակիցը պատասխանեց․«Այն ժողովրդի համար, որտեղ կան պայթյուններ, կան նոր զոհեր, մարդկանց տները քանդվում են, իրենք էլ ստիպված լքում են իրենց տները, դա, բուն իմաստով, պատերազմ է, բայց եթե մենք ուզում ենք, գործել միջազգային իրավունքի դաշտում, ապա այդտեղ ճիշտ է օգտագործել զինված ագրեսիա տերմինը, որն ունի բավականին լավ մշակված և ձևավորված նորմեր, որոնք հնարավորություն կտալ պատժել հակառակորդին»։

Վերջինիս հավաստիացմամբ՝ Հայաստանը պետք է դիմեն միջազգային հանրությանը, որպեսզի Ադրբեջանի հանդեպ սանկցիա կիրառվի, ինչպես մյուս երկրների դեպքում է կիրառվում։

«Աշխարհի աչքի առաջ տեղի է ունենում նման բան, ինչու՞ Հայաստանը պետք է միայնակ գործի։Պնդում եմ , առանց միջազգային հանրության Հայաստանը այս խնդիրը չի կարող լուծել»,-նշեց զրուցակիցը։

Անդրադառնալով Արցախի նախագահի՝ Թուրքիայի մասնակցության վերաբերյալ հայտարարությանը, Լարիսա Ալավերդյանը նշեց, որ Թուրքիան, ի սկզբանե, օգտվելով նրանից, որ ինքը միջազգային իրավունքի ոչ մի խոչընդոտ չունի, արել է և շարունակելու է անել իր սև գործը, քանի դեռ չկա միջազգային հանրության արձագանքը․

«Այս ուղղությամբ դիվանագիտական հարթակում պետք է մեծ աշխատանք տանենք, որ ՆԱՏՕ-ի կոչը չհնչի ուղղակի որպես կոչ, այլ հստակ արձագանք՝ ի՞նչպես եք դուք վերաբերվում այն փաստին, որ ձեր անդամ պետությունը մասնակցում է հարևան պետության ձեռնարկած ագրեսիային։ Այս փաստը պետք է կարողանա օգտագործվել միջազգային հարթակում, իսկ մենք մինչ օրս այս ուղղությամբ աշխատանք չենք կատարել»։

Ըստ մեր զրուցակցի՝ Թուրքիայի մասնակցությունը ռազմական գործողություններին անմիջական սպառնալիք են ոչ միայն Հայաստանի, այլ նաև ողջ տարածաշրջանի համար.

«Մենք Թուրքայի ճանապարհին ընդամենը խոչընդոտ ենք, որին ուզում է վերացնել։Եվ հենց այս դեպքում էլ սա, դա մեծ սպառնալիք է տարածաշրջանային անվտանգության համար, մենք երբևիցե այս մասշտաբների մարտահրավեր չենք ունեցել անցած դարասկզբից։ Պետք է հասկանանք, որ այն, ինչ ժամանակին չի հաջողվել Թուրքիային, նրանք ուզում են իրականացնել հիմա, քանի որ գտնում են, որ Սովետական միությունը ավելի ուժեղ էր,քան ՝ Ռուսաստանը և փորձում են ամեն կերպ թուլացնել Ռուսաստանին»։

Մեր զրուցակցի դիտարկմամբ՝ Թուրքիան ուզում է մոլորեցնել հանրությանը, թե բոլոր դեպքերում իրագործելու է պանթյուրքիզմի գաղափարը և հասնելու է մինչև անգամ Չինաստան․

«Բայց դա այդպես չէ, Կենտրոնական Ասիայի երկրները այդքան էլ թույլ չեն և չեն ենթարկվի Թուրքիային»,-վստահեցրեց Լարիսա Ալավերդյանը։

Աղբյուր` Փաստինֆո