Փաստ ինֆո

ԱԺ նախկին պատգամավոր Մանվել Գրիգորյանի եղբորորդու՝ Հրանտ Գրիգորյանի վերաբերյալ քրեական գործի վերաբացումը կառաջացնի իրավաբանական քաոս։ Այս մասին «Փաստինֆո»-ի հետ զրույցում ասաց Հրանտ Գրիգորյանի պաշտպան Հովսեփ Սարգսյանը։

Նշենք, որ խոսքը գնում է 26 տարի առաջ կատարված Մհեր Պողոսյանի մահվան դեպքի մասին, որը Վերաքննիչ դատարանի որոշմամբ պետք է ուղարկվի նոր քննության։ Վերաքննիչ դատարանի որոշման դեմ վճռաբեկ բողոք էր ներկայացրել Հրանտ Գրիգորյանի փաստաբանը, սակայն դատարանը մերժել էր վարույթ ընդունել բողոքը։ Այլ կերպ ասած՝ դատարանի որոշումը մտել է օրինական ուժի մեջ և գործը կվերաբացվի, սակայն փաստաբան Հովսեփ Սարգսյանը «Փաստինֆո»-ի հետ զրույցում հայտնեց իր մտահոգությունն առ այն, որ գործի նյութերը վաղուց ոչնչացվել են, ուստի՝ չկա քրեական գործ, որը պետք է քննվի։

Սարգսյանը Վերաքննիչ և Վճռաբեկ դատարանների, ինչպես նաև ՀՀ դատախազության քայլերը որակեց որպես պոպուլիստական, քանի որ դա իրատեսական քրեական դատավարության հետ որևէ առնչություն չունի։

«Թող մեր հանրահայտ իրավաբանները, դատավորները, դատախազներն ասեն՝ առանց քրեական գործի քննությունն ինչպե՞ս է կատարվելու։ Կարո՞ղ են առանց քննության մարդու մեղավորության հարց լուծել։ Թող հանրությանը բացատրեն՝ քրեական գործի բացակայության պայմաններում ինչպե՞ս են քննություն իրականացնելու։ Այդ հարցերի պատասխանները ոչ Վերաքննիչ, ո՛չ Վճռաբեկ դատարանները չեն տվել»,- ասաց Սարգսյանը՝ ընդգծելով, որ գործ չկա, որ վերաբացվի, դատական ակտն է վերացվել։

«Ամբողջ քրեական դատավարությունը, Սահմանադրությունը, հարակից օրենքները, բոլորը խոսում են քրեական գործի մասին, որը, որպես այդպիսին գոյություն չունի՝ մեռել է, դիակ է, այրվել է, ոչնչացվել է, գոյություն չունի։ Նոր վարույթ պետք է լինի, սակայն նոր վարույթի սահմաններում չեն կարող որևէ բան ձեռնարկել։ Նույնիսկ պատճենները չկան»,- ասաց Սարգսյանը՝ հավելելով, որ պահպանված է միայն չորս դատավարական որոշում, որը որևէ ապացուցողական նշանակություն չունեն, զրո նշանակություն ունեն։

Նրա խոսքով՝ տպավորություն է, թե Վերաքննիչ դատարանում գործի քննությանը ներկա չեն եղել, իսկ Վճռաբեկ դատարանն ընդհանրապես չի անդրադարձել բարձրացված հարցերին։

Ինչ վերաբերում է նոր երևան եկած հանգամանքներին, փաստաբանը հայտնեց, որ նոր երևան եկած հանգամանք, որպես այդպիսին, գոյություն չունի, սակայն պետք էր դատական ակտը բեկանել, քանի որ այդ անձը ԱԺ նախկին պատգամավոր էր և Մանվել Գրիգորյանի եղբորորդին։ Ինչ վերաբերում է Մանվել Գրիգորյանի հետ հարաբերություններին, փաստաբանը տեղեկացրեց, որ Հրանտ Գրիգորյանի և Մանվել Գրիգորյանի հարաբերություններն արդեն տևական ժամանակ է, ինչ լարված են։

Փաստաբանը չբացառեց, որ հետագայում Հրանտ Գրիգորյանը հարկ եղած դեպքում կդիմի ՄԻԵԴ՝ վերականգնելու իր իրավունքները։ Փաստաբանը վստահեցնում է՝ խախտվում են Հրանտ Գրիգորյանի Կոնվենցիայով ամրագրված ՝ ազատության և անձնական անձեռնմխելիության և արդար դատաքննության իրավունքները։

«Եթե վաղը Հայաստանի դեմ ՄԻԵԴ-ում նոր գործ կլինի, թող չասեն, թե չգիտեին այդ մասին, որովհետև բոլորը գիտեին՝ և՛ Վերաքննիչ դատարանի դատավոր Լուսինե Աբգարյանը, և՛ Վճռաբեկ դատարանի դատավոր Օհանյանը, և՛ դատախազները »,- ասաց նա՝ ընդգծելով, որ անգամ մեծ ցանկության դեպքում որևէ մեկը չի կարող որևէ բան անել Հրանտ Գրիգորյանին, քանի որ վաղեմության ժամկետները ևս անցել են, սակայն իրավական հետևանքները ժողովրդի համար են տխուր լինելու, քանի որ դա վատ նախադեպային որոշում է։ Անդրադառնալով դատախազության տարածած հաղորդագրությանը, որի համաձայն՝ սպանության հանգամանքը թաքցնելու նպատակով ՀՀ պաշտպանության փոխնախարարի ստորագրությամբ տրվել է գրություն, իբր Մ. Պողոսյանը զոհվել է մարտական գործողությունների ժամանակ և նրա անվամբ ՀՀ ՊՆ ԶՍՊ վարչությունում կազմվել է անձնական գործ, ապա ՀՀ նախագահ Ռ. Քոչարյանի կողմից Մ.Պողոսյանին հետմահու շնորհվել է արիության մեդալ, փաստաբանը հայտնեց, որ նման տեղեկանք կա, բայց այն բացարձակապես կապ չունի Հրանտ Գրիգորյանի հետ:

«Հրանտ Գրիգորյանի վերաբերյալ գործը երբևէ փորձ չի արվել թաքցնելու, ընդհակառակը՝ քրեական գործ է հարուցվել, գործի քննություն է կատարվել, արարք է վերաորակվել, գործը դատարան է ուղարկվել, մեղադրական դատավճիռ կայացվել։ Մի տողը մյուսին հակասում է»,- նշեց փաստաբանը։

Բացի դա՝ Սարգսյանը նշեց, որ որևէ ձեռնարկված օպերատիվ-հետախուզական միջոցառում չի իրականացվել։

«Դատախազական ի՞նչ պատշաճ վերահսկողության մասին է խոսքը։ Այն, որ դատախազը 1 տարի 6-7 ամիս հետո, դատավարական ժամկետների խախտմամբ բողոք է ներկայացրել, դա՞ է պատշաճ հսկողությունը»,- նշեց փաստաբանը։

Հիշեցնենք, որ 1994թ Աշտարակի նախկին ժողդատարանի կողմից կայացված դատավճռով Հրանտ Գրիգորյանը մեղավոր էր ճանաչվել 1961 թ ընդունված ՀՀ քրեական օրենսգրքի 259.1-րդ հոդվածի «Բ» կետով՝ զենքի հետ վարվելու կանոնների խախտմամբ Մհեր Պողոսյանին մահ պատճառելու համար և դատապարտվել է ազատազրկման՝ 1 տարի ժամկետով։ Դատավճիռը չի բողոքարկվել ու այն մտել է օրինական ուժի մեջ:

24 տարի անց` 2018թ հուլիսի 12-ին, Էդուարդ Պողոսյանը՝ Մհեր Պողոսյանի որդին, հանցագործության մասին հաղորդում է ներկայացրել` պնդելով, թե իր հայրն իրականում սպանության զոհ է դարձել. 1994 թ ապրիլի 16-ին Արմավիրի մարզի Ակնալիճ գյուղի տարածքում գործող ռեստորանային համալիրում վիճաբանության ընթացքում սպանել է Հրանտ Գրիգորյանը, սակայն դեպքի հանգամանքները խեղաթյուրելու արդյունքում Գրիգորյանը դատապարտվել է 1 տարվա ազատազրկման։

Հանցագործության մասին հաղորդման հիման վրա ՀՀ ոստիկանության Վաղարշապատի բաժնում հարուցվել է քրեական գործ՝ պաշտոնատար անձի կողմից անձնական այլ դրդումներով կամ խմբային շահերից ելնելով՝ պաշտոնական փաստաթղթերում ակնհայտ կեղծ տեղեկություններ կամ գրառումներ մտցնելու, կեղծում մտցնելու դեպքի առթիվ, որի նախաքննությունը կատարվել է ՀՀ ՔԿ զինվորական քննչական գլխավոր վարչությունում։ ՀՀ զինվորական կենտրոնական դատախազության զինվորական ծառայության դեմ ուղղված հատկապես կարևոր գործերով քննության նկատմամբ հսկողության բաժնի դատախազ Վ. Հարությունյանի որոշմամբ հարուցվել է վարույթ՝ նոր իհայտ եկած հանգամանքների հիման վրա։

2019թ փետրվարի 20-ին ՀՀ զինվորական դատախազ, ՀՀ գլխավոր դատախազի տեղակալ Վ. Հարությունյանի որոշմամբ վերաքննիչ բողոք է ներկայացվել՝ դատավճիռը նոր ի հայտ եկած հանգամանքների հիման վրա վերանայելու համար։ Վերաքննիչ քրեական դատարանը որոշել է քրեական գործն ուղարկել Առաջին ատյանի դատարան` նոր դատաքննության: Վերաքննիչ դատարանի որոշման դեմ փաստաբան Հովսեփ Սարգսյանը վճռաբեկ բողոք է ներկայացրել, որը վարույթ չի ընդունվել։

Հեղինակ՝ Իզաբել Սահակյան

Աղբյուր` Փաստինֆո