Փաստ ինֆո

ԵՊՀ ռեկտորի ժամանակավոր պաշտոնակատար Գեղամ Գևորգյանն այսօր մամուլի ասուլիս էր հրավիրել՝ ներկայացնելու իր պաշտոնավարման ընթացքում բուհի ձեռքբերումները, ուսման վարձերի հետ կապված խնդիրը, ինչպես նաև դասապրոցեսի կազմակերպման հիմնական սկզբունքները։

Անդրադառնալով այն հարցին, թե արդյոք կորոնավիրուսի համավարակի հետևանքով ստեղծված տնտեսական այս իրավիճակում բարոյական է ուսման վարձավճարների բարձրացումը, հատկապես այն պարագայում, երբ ուսումնական պրոցեսի արդյունավետությունը հիմա հարցականի տակ է՝Գևորգյանը պատասխանեց.

«Կրթության արդյունավետությունը կամաց-կամաց կդադարի հարցականի տակ լինել, քանի որ այն թերությունները, որ կային անցած կիսամյակ, այս տարի շտկվելու են։ Այն առարկաները, որոնք պահանջում են առկա շփում, լինելու են առկա՝ բոլոր կուրսերում անխտիր։ Բացի այդ, ուսման վարձը այնպիսի բան է, որ չի կարելի ամեն օր փոխել։ Ինչ վարձավճարով ուսանողն ընդունվում է, դրանով էլ ավարտում է։ Այսինքն՝ այսօր բարձրացած վարձերը վերաբերում են միայն առաջին կուրսեցիներին։ Կխնդրեմ նաև բարոյական խրատներ չտալ, պետք է խոսել օրենքներով։ Եկեք, դուք նշեք, թե ի՞նչն է էժանացել այս ընթացքում»

Խոսելով համավարակի ընթացքում մարդկանց կրած կորուստների մասին՝ ռեկտորի պաշտոնակատարը թվարկեց համալսարանի կորուստները։

«Ուրեմն, մոտավորապես 180 մլն չստացված գումար ունենք։ Այս կիսամյակ, նախորդ տարվա նույն ընթացքի համեմատ 40 մլն ավելի զեղչ ենք արել։ Ծաղկաձորի բազայում էլ ենք ծախսեր արել, թեև այն տրամադրվել էր կորոնավիրուսի դեմ պայքարին։ Այդտեղ մոտավորապես 5 մլն դրամի կոմունալ ծախս է եղել, բայց այդ գումարը մենք պետությունից չենք պահանջել։ Բացի այն, որ 5 մլն էլ ենք տվել համավարակի դեմ պայքարի ֆոնդին։ Նաև տարածքի վարձակալության, ուսանողական հանրակացարանի վարձի գումարները չենք ստացել։ Բացի այդ, ուսանողական հանրակացարանում ապրողներից մի քանիսը վարձը չեն վճարել, մարտից գնացել են տուն։ Հիմա ասում են, որ չեն ապրել, լավ, վարձը չեն տվել, դա մի կողմ, բայց մենք էլ պետությանը ասել ենք՝ այսքան վարձ ենք հավաքելու, դրա համար էլ պիտի դեռ հարկ տանք»,- ասաց Գևորգյանը։

Աղբյուր` Փաստինֆո