Փաստ ինֆո

Տավուշի մարզի Խաշթառակ համայնքում 4 և 6 տարեկան երեխաներին ծեծի ենթարկած ընտանիքը եղել է սոցիալական կազմակերպությունների, այդ թվում խնամատարության հանձնաժողովի ուշադրության կենտրոնում։ 

«Փաստինֆո»-ի հետ զրույցում Տավուշի մարզպետ Հայկ Չոբանյանն ասաց, որ երեխաները որոշ ժամանակ ապրել են «ՍՕՍ մանկական գյուղերում»,որից հետո կրկին տեղափոխվել են ընտանիք. «Ընտանիքի կազմն այնպիսին է, որ ընթացիկ հսկողության ընթացքում իրենք շատ բաներ գաղտնի են պահել։ Տպավորությունը հիմա այդպիսին է։ Երբ այս դեպքը եղավ, նոր արդեն որոշակի գաղտնի բաներ կարողացանք բացահայտել, իսկ ստուգումների ընթացքում շատ բաներ չեն երևացել։ Ընտանիքներում ներքին խոհանոցներ կան, որոնք ցավոք սրտի հասանելի չեն լինում և հիմնականում ընթացակարգերն էլ այնպիսին են, որ անպայման ընտանիքի անդամի, ղեկավարի համաձայնությունն է պետք երեխաների ճակատագրի տնօրինման հետ կապված։ Սա նաև ցույց է տալիս, որ այդ ընթացակարգերը երևի պետք է պարզեցվեն, որպեսզի արտաքին միջամտության հնարավորությունը նմանատիպ դեպքերում ավելի մեծանա, որ բանը բանից չանցնի և իրավաբանորեն ավելի չոր միջամտության հնարավորություն ունենանք»,-նշեց մարզպետը։

Հայկ Չոբանյանի խոսքով հիմնական խնդիրն ըստ էության եղել է ընտանիքի այն անդամը, ով ծեծի է ենթարկել երեխաներին և նրա խնդիրը վերացված է, քանի որ վերջինս ձերբակալվել է։ Մարզպետարանը հակված է նրան, որ երեխաները որևէ հաստատությունում վերականգնողական շրջան անցնեն. «Բանակցել ու պայմանավորվել ենք մի քանի հաստատությունների հետ, որ դուրսգրումից հետո երեխաներն, անպայման, վերականգնողական շրջան անցնեն։ Զուգահեռաբար սոցիալական ծառայությունները և կազմակերպությունները, այդ թվում հասարակական կազմակերպություններն ինտենսիվ զբաղվում են ընտանիքի վերականգնողական հարցերով և երեխաներն ընտանիք կվերադառնան միայն այն ժամանակ, երբ մենք համոզված կլինենք, որ երեխաների ճակատագրի հետ կապված որևէ մտահոգություն այլևս չենք ունենա»,-ասաց Հայկ Չոբանյանը։

Մարզպետը նկատեց՝ սա առիթ է, որ մարզում առկա մնացած դեպքերը ևս ուշադրության և միջամտության կարիք ունեն։ Հայկ Չոբանյանն ընդգծեց, որ պետք է ավելի կոշտ լինեն, քան իրավական դաշտն է այսօր այդ հնարավորությունը տալիս, որպեսզի մյուս տեղերում նմանատիպ ծայրահեղությունների չհասնի։

«Սա ծայրահեղ ծանր դեպք է առ այն, որ այն իրավիճակը, որն ունենք մեր շուրջը և այն գործիքակազմը, որով աշխատում ենք այդ ընտանիքների հետ բավարար չէ, որովհետև այդ գործիքակազմը մեզ հնարավորություն չի տվել, որ ավելի արմատական միջամտություն ունենանք այդ ընտանիքներում և ցավոք սրտի բանը հասել է այս ծայրահեղ վիճակին։ Մենք շատ ավելի արմատական պետք է լինենք։ Մարզպետարանի երեխաների պաշտպանության ստորաբաժանմանը և մարզի, մասնավորապես համայնքների երեխաների խնամատարության հանձնախմբերին այդ հանձնարարականը տվել եմ»,-ասաց մարզպետը։

Վերջինս նաև հավելեց, որ երկուշաբթի հերթական քննարկումն են ունենալու, որի ընթացքում քննարկելու են որոշակի ռիսկային գոտում գտնվող բոլոր ընտանիքների հարցերը։ Մարզպետը նշեց, որ ունենք կոնկրետ ծրագիր, որը մի քանի անգամ ավելի արմատական կլինի, քան այն վարքագիծը, որն ունեցել են մինչև հիմա։

Հիշեցնենք, որ օգոստոսի 14-ից 16-ն ընկած ժամանակահատվածում Տավուշի մարզի Խաշթառակ համայնքի 57-ամյա բնակիչը դաժանորեն ծեծել է իր 4 և 6 տարեկան թոռներին։ Երեխաները տեղափոխվել են Երևանի «Սուրբ Աստվածամայր» ԲԿ։ Նրանք երկուսն էլ շարունակում են գտնվել վերակենդանացման բաժանմունքում։ Դաժանորեն ծեծված 6-ամյա երեխայի վիճակը շարունակում է մնալ ծայրահեղ ծանր, նրա կյանքին դեռևս վտանգ է սպառնում, իսկ 4-ամյա երեխայի մոտ դրական դինամիկա կա, առկա է գանգային արյունազեղում։ Ընտանիքի մյուս 5 երեխաները, որոնք օգոստոսի 20-ին սուր էկզոգեն թունավորմամբ տեղափոխվել էին Երևանի «Մուրացան» ԲԿ գտնվում են կայուն վիճակում և նրանցից ոչ մեկի կյանքին վտանգ չի սպառնում։

Հեղինակ՝ Հասմիկ Կոշկարյան

Աղբյուր` Փաստինֆո