Փաստ ինֆո

Նախօրեին համացանցում տեսանյութ տարածվեց մոսկվայաբնակ  հայ գործարար Սարիբեկ Գևորգյանի մասնակցությամբ, որտեղ, իբր, գործարարը Մոսկվայի հայ համայնքի գրասենյակի ղեկավարից ներողություն էր խնդրում՝ համայնքի բնակիչների  հուզական աշխարհի վրա բացասական ներգործություն ունենալու   համար։  Տեսանյութում ներկա էին նաև այլ մարդիկ, այդ թվում նաև՝  Ռուսաստանի և Նոր Նախիջևանի հայոց թեմի առաջնորդ Եզրաս Արքեպիսկոպոս Ներսիսյանը։  

Պարզելու, թե  ի՞նչպես է Սարիբեկ Գևորգյանը  բացասական ազդեցություն ունեցել հայ համայնքի բնակիչների վրա՝ «Փաստինֆո»-ն զրուցել է գործարարի հետ։ Արդյունքում պարզվեց, որ նրան մեղադրում են Մոսկվայում  հայ- ադրբեջանական վերջին փողոցային բախումների ընթացքում  հայ առաքելական եկեղեցու  բակում հավաքվելու և համայնքի բնակիչների հետ եկեղեցում Տերունական աղոթք կարդալու մեջ։

- Պարոն Սարիբեկյան, ինչի՞ց  և ի՞նչ պատճաբանություններով են ձեր հասցեին  մեղադրանքներ հնչեցվում։ 

-  Դուք, հավանաբար, հիշում եք ծիրանի պատմությունը, երբ Հայաստանից  ներմուծված ծիրանով բեռնված  բեռնատարները ադրբեջանական որոշակի ուժերի ճնշմամբ դուրս բերվեցին Մոսկվայի «Ֆուդ սիթի» գյուղմթերքի շուկայից, որը  պատկանում է ծագումով ադրբեջանցի գործարարների։ Դրանից անմիջապես հետո բեռնատարները բերվեցին մեզ մոտ՝ «Մետաքսի ճանապարհ» կոչվող հայկական առևտրի կենտրոն (հեղ. «Մետաքսի ճանապարհ» առևտրի կենտրոնը պատկանում է գործարար Սարիբեկ Գևորգյանին), որտեղ մինչ այսօր առանց  որևէ վարձավճարի իրացվում են Հայաստանից ներմուծվող ծիրանները։ Ստացվեց այնպես, որ հայերի և հայկական ապրանքատեսակի նկատմամբ ցուցաբերված այդօրինակ անթույլատրելի և ագրեսիվ վերաբերմունքից հետո «Մետաքսի ճանապարհ» առևտրի կենտրոնի առաջ ծիրանով բեռնված բեռնատարների մի մեծ կույտ գոյացավ։ Մարդիկ՝ անակնկալի եկած չգիտեին, թե  ի՞նչ պիտի  անեին։ Բոլորով միասին,  այդ թվում նաև հայկական համայնքի բնակիչների հետ,  միասնաբար կանգնեցինք վարորդների կողքին՝ ներմուծված ծիրանն իրացնելու նպատակով,  որովհետև մթերքը փչանալու և պիտանելիությունից զրկվելու խնդիր ուներ։ Սա նաև պատվի հարց էր՝ ադրբեջանցիներին ցույց տալու համար,  որ այստեղ կա միախումբ  հայկական համայնք և, որը պատրաստ է լիովին սատար կանգնել խնդիրների առաջ հայտնված մեր հայրենակիցներին։ Ի դեպ, պետք է նշեմ, որ Հայաստանից ներմուծված  ծիրաններն իրացվեցին ոչ միայն մեզ մոտ՝ «Մետաքսի ճանապարհ»-ում, այլ նաև դրանց մի զգալի հատված մեկնեց Բուխտա, որտեղ նույնպես գյուղմթերքը  հաջողությամբ սպառում գրանցեց։ Մինչև այսօր «Մետաքսի ճանապարհ»-ում  Երևանից  ծիրանով բեռնված բեռնատարներ են գալիս և առանց վարձավճարի իրացնում իրենց ապրանքը։

- Ուրեմն, ի՞նչն էր խնդիրը։

-         Խնդիրները ծագեցին դրանից անմիջապես հետո, երբ  Մոսկվայում սկիզբ առավ այն քաոսը, որի մասին բոլորս տեղյակ ենք՝ զանգվածային հարձակումներ հայերի և հայերին պատկանող գույքի վրա։ Առավոտյան գնում եմ աշխատանքի և դեռ տեղ չհասած,  ինձ ասում են, որ աշխատավայրիս մոտ մեծ թվով հայեր են հավաքվել  ու սպասում են ինձ։ Հասա այնտեղ,  մոտ 700- 800  մարդ էր հավաքվել, բոլորն ուզում էին  հասկանալ՝ ի՞նչ է կատարվում հայերի հետ, հայ համայնքի ներկայացուցիչների նկատմամբ և ի՞նչ պետք է անել այս իրավիճակում՝ երբ տեղի ադրբեջանցիները զանգվածաբար հարձակվում են հայերի վրա, ծեծ ու ջարդ կազմակերպում, փորձում վնասել հայերին ու նրանց պատկանող գույքը։

-  Ի՞նչ որոշում ընդունվեց։

-   Ինչպես միշտ է ընդունված եղել հայերի մոտ, ես էլ առաջարկեցի հավաքվածներին միասին գնալ Մոսկվայի հայկական եկեղեցու բակ և միասին  փորձենք տեղում հասկանալ մեր հետագա քայլերն ու դիրքորոշումը։ Կարծեմ միշտ է այդպես եղել՝ հայերը միշտ են համախմբվել  եկեղեցու  շուրջ և փորձել միասնական մի  հայտարարի գալ։ Մինչ կհասնեինք այնտեղ, մեզանից մի քանի հոգու մասնակցությամբ հանդիպում ունեցանք նաև Ռուսաստանի Դաշնությունում ՀՀ դեսպանի հետ, քննարկեցինք ստեղծված իրավիճակը։ Դեսպանի հետ մեր ունեցած հանդիպման տեսագրությունն առկա է։ Մենք նրա հետ  քննարկեցինք իրավիճակը, ասացինք, որ պատրաստ ենք անել ամեն ինչ, որպեսզի ազգամիջյան այս ագրեսիվ բախումները դադարեն և հայերին հանգիստ թողնեն։ Դեսպանը հայտնեց իր անմիջական աջակցությունը, ասաց, որ իրենք էլ հիմա զբաղված են հենց այդ խնդրի լուծման շուրջ միջոցների ձեռնարկմամբ և պատրաստ են շնորհակալությամբ սեղմել այն մարդկանց ձեռքը, ովքեր ստեղծված խնդրի շուրջ գործուն քայլեր կիրականացնեն ու երկկողմանի ծեծուջարդը կկանգնի։ Ես դեսպանին հավաստիացրի, որ ի զորու ենք լուծել այդ խնդիրը, որպեսզի ազգամիջյան ծեծուջարդը կանգ առնի։ Շատ արագ  մի քանի հանդիպումներ ունեցա ռուսաստանաբնակ հակառակ թևի ներկայացուցիչներից մի քանիսի հետ։ Չեմ կարող  և չեմ ցանկանում անուններ բարձրաձայնել, նաև ասել, թե ի՞նչ  տեսակի քննարկումներ էին դրանք, բայց այդ հանդիպումների արդյունքում ադրբեջանական կողմի ագրեսիվ վարքը բացառվեց։ Տեղի ադրբեջանցիների հարձակումներն ու ագրեսիվ վարքը  հայերի նկատմամբ կանգ առավ։ Կարծում եմ բոլորն  ականատեսն եղան, որ ինչ -որ պահից այդ բախումները շատ արագ դադարեցին։ Դրանից  հետո մենք գնացինք միանալու  մոսկվայաբնակ հայերի մեծ խմբին, ովքեր եկեղեցու բակում մեզ էին սպասում։  Եկեղեցում բոլորով միասին տերունական աղոթք բարձրացրինք առ Աստված, խնդրեցինք Աստծո բարեգթությունը։ Այս ամենից հետո ինձ համար անհասկանալի պատճառներով ես  հրավիրվում եմ  առաջնորդարան։ Ինձ ասել էին, որ այնտեղ ես հանդիպում պետք է ունենամ Եզրաս սրբազանի հետ, բայց պարզվեց, որ  հանդիպումը միայն նրա հետ չէր, այլ  մի քանի այլ մարդկանց  մասնակցությամբ  նույնպես։  Մեր միջև խոսակցություն  տեղի ունեցավ, որի մոնտաժված տեսագրությունը հայտնվել է համացանցում՝ իբր ես ներողություն եմ խնդրում ինձ մեղադրանքներ ներկայացնող և  իմ նկատմամբ հավակնություններ ներկայացնող մարդկանցից։

- Ի՞նչ հավակնությունների մասին էր խոսք գնում։  

-   Գուցե անհավատալի թվա, բայց ինձ ասեցին, որ առաջին հերթին շատ մեծ սխալ եք թույլ տվել, որ հավաքվել եք եկեղեցում, հետո, որ Հայ առաքելական եկեղեցում Տերունական աղոթք ենք կարդացել,  իբր դրանով ես խաղացել եմ մարդկանց զգացմունքների հետ, դրդել եմ նրանց հուզական քայլերի ու  իբր թե սխալ աղոթք ենք կարդացել։ Այդ երբվանի՞ց է Տերունական աղոթքը սխալ համարվում և  խաղում մարդկանց զգացմունքների հետ կամ դրդում նրանց անհասկանալի քայլերի։ Հակառակը, Տերունական աղոթքն առ Աստված են բարձրացնում այն ժամանակ, երբ պետք է հանդարտեցնել հույզերը և  խաղաղեցնել ինչ – ինչ պատճառներով մարդկանց ներսում  գլուխ բարձրացրած ներքին վրդովմունքը։

-  Իսկապես անհավատալի մեղադրանք է՝ մարդուն դատապարտել Մայր եկեղեցում Տերունական աղոթք կարդալու  մեջ, ընդ որում՝ համենայն դեպս,  համացանցում տարածված հայտնի տեսանյութի մեջ հանդիպմանը ներկա սրբազանը կարծես լուռ էր։ Պարոն Գևորգյան, գուցե ա՞յլ խորքային պատճառներ կան, որոնց մասին դուք չեք ցանկանում  խոսել։

-  Կասեմ միայն  հետևյալը՝ ես շատ լավ եմ հասկանում, թե ուր է տանում ինձ, այսպես ասած,  նվաստացնել ցանկացողների թելը։  Բոլոր նրանց, ովքեր մեղադրանքներ են ներկայացնում իմ հասցեին, ինչպես նաև՝ նրանց  հետևում կանգնածներին, ուզում եմ տեղյակ պահել, որ այսուհետ նույնպես ևս չեմ դադարելու առաջին իսկ  անհրաժեշտության դեպքում օգնության դեպքում ձեռք մեկնել իմ հայրենակիցներին՝ կլինեն նրանք  Մոսկվայում, թե մեկ այլ տեղում։ Սա ինձ համար սկզբունքի հարց է, միշտ է այդպես եղել ու երբեք այլ կերպ չի լինելու։ Անդրադառնալով համացանցում տարածված հայտնի տեսանյութին՝ եթե կարծում են, որ առանց ինձ  տեղյակ  պահելու կարող են ինձ տեսանկարահանել և արդյունքում ինչ -որ մոնտաժված տեսանյութ տարածելով նվաստացնել կամ վարկաբեկել ինձ, ապա սխալվում են։ Եվ վերջում, չեմ զլանա նորից կրկնել այն, ինչ ասել եմ այդ հանդիպման ընթացքում, մինչև վերջ և շատ ուշադիր նրանց լսելուց հետո, ավելացնելով նաև իրենց կողմից մոնտաժի ենթարկված իմ խոսքերը, որ հետևյալն է եղել՝ եթե  ես որևէ  սխալ բան եմ արել եկեղեցում՝ Աստծո տան մեջ,  ապա պատրաստ եմ դրա համար ներողություն խնդրել, բայց բացատրեք ինձ, որ իմանամ, թե ինչո՞ւմ է եղել իմ սխալը, որի  պատասխանը ես այդպես էլ չլսեցի այդտեղ հավաքված և ինձ Տերունական աղոթք անելու մեջ մեղադրանքներ ներկայացնողներից որևէ մեկից։ Իսկ ի՞նչ եմ արել ես՝  առանց վարանելու տեր եմ կանգնել  շուկաներից հանված  հայկական բեռնատարներին, որից հետո  իմ անմիջական վերահսկողությամբ  ռեալիզացվել է  այդ բեռնատարներում եղած ամբողջ ապրանքը։ Երկրորդ՝ ես ոչ մի վայրկյան չեմ հապաղել համապատասխան քայլեր ձեռնարկել, երբ Մոսկվայում ծեծի էին ենթարկում մեր հայրենակիցներին։  

Զրուցեց Նվարդ Մանվելյանը
 

Աղբյուր` Փաստինֆո