Փաստ ինֆո

Օրերս, Փաշինյանների ընտանիքի բազմազավակ մայրիկ Աննա Հակոբյանը /իր խոսքերն են/ տեղեկատվություն տարածեց, թե՝ հուլիսի 15-ին ամերիկահայ գործարար, «PMA Venture Capital» խմբի հիմնադիր, բարերար Ջորջ Բաղումյանի հետ հեռախոսազրույցի ժամանակ վերջինս հստակեցրել է Ա. Հակոբյանի հետ զրույց ունենալու իր ցանկությունը, թե՝ «Աննա, ես քեզ պետք է քառորդ միլիոն դոլար փոխանցեմ մեր զինվորների, մեր պաշտպանների համար»:

Սովորաբար, սփյուռքահայերը շատ են սիրում մասնակից և խորամուխ լինել իրենց բարեսիրական նախաձեռնությունների արդյունավետ օգտագործման հարցին, սակայն այս դեպքում՝ Բաղումյանը լիակատար ազատություն է տվել Ա. Հակոբյանին՝ իր մտածած ծրագրերը որպես աջակցություն հայրենիքի պաշտպաններին իրականացնելու համատեքստում, ասելով, թե վստահում է նրան և 250 հազար դոլարը կփոխանցի տիկին Աննայի հիմնադրամին, որ վերջինս որոշի՝ ինչպես այն օգտագործել ի շահ հայ զինվորի:

Այսպիսով, ըստ էության, սփյուռքահայ գործարարը վարչապետի տիկնոջը, որը պետական պաշտոնյա չէ և ի պաշտոնե չի ներկայացնում պետությունը, օժտել է պետության գործառույթով, իր վերաբերմունքով փաստելով, թե՝ այսպիսով վստահում է վարչապետին և նրա տիկնոջը՝ որպես թե՝ պետությունը դուք եք, ձեր ընտանիքն է, դուք էլ միանձնյա կամ՝ ամուսիններով որոշեք:

Ավելին, տեղի ունեցածը եթե նախադեպային է, կարել է համարել ուղղակի ակնարկ՝ ուղղված այլ սփյուռքահայ մեծահարուստների, այն համատեքստում, որ դուք մեր հաշվին փոխանցեք, մենք ծրագրեր կներկայացնենք:

Սա , կարե՞լի է ասել՝ տարարեսակն էր Աննա Հակոբյանի՝ հայաստանյան գործարարներին ուղղված կոչի: Բնականաբար, մարդիկ չեն մոռացել նրա հայտարարությունը, երբ կոչ արեց գործարարներին՝փոխանցել գումարներ իր ֆոնդերին, քանի որ ինքը նպատակային կօգտագործի: Եվ ոչինչ, որ նախկինում ինքն ու իր ամուսինը շատերի ունեցածը կեղտոտ գումարներ են համարել, հիմա, քանի որ իր նպատակը բարի է, կեղտոտ գումարները կմաքրվեն, եթե դրանք իր ֆոնդերին ուղղվեն:
Այսինքն, պետությունը մեր բոստանն է /մեր գրպանն է/, ոնց ուզենք՝ կվարենք-կցանենք /կմսխենք գումարները/:
ՈՒշագրավ է, որ հենց նույն օրերին Յուքոմի բոլոր բաժանորդները նամակ ստացան հիշյալ ընկերությունից, ուր Յուքոմը նախատեսում է ընդհանուր հաշվով 105 միլիոն ՀՀ դրամ տրամադրել ֆիքսված կապի իր բաժանորդներին՝ ներողություն խնդրելով հուլիս ամսին իրենց բաժանորդներին պատճառած անհարմարությունների՝ կապի խափանումների համար:

Միաժամանակ Յուքոմն իր բաժանորդներին, որոնց ըստ սակագնային պլանի՝ պատճառված ստրեսի հատուցումը կարող էր կազմել 500-2000 դրամ, առաջարկում էր գումարի տնօրինման բավական հետաքրքիր մասնակցային ծրագիր, այն է՝ հաղորդագրություն ստանալով ընտրել երկու տարբերակ՝ հիշյալ 500-2000-ի կարգի գումարը կամընտրությամբ փոխանցել Զինծառայողների ապահովագրության հիմնադրամին և կամ՝ ստանալ իրենց հատուցումը:
Ինքս արդեն կատարել եմ իմ ընտրությունը՝ համաձայնություն տալով փոխանցել իմ գումարը Զինծառայողների ապահովագրության հիմնադրամին և վստահ եմ, որ շատերը նույն կերպ կվարվեն:

Այս գումարը մոտավորապես այնքան է, որքան սփյուռքահայ մեծահարուստի տրամադրած գումարն էր, սակայն այս դեպքում՝ քաղաքացին Յուքոմի միջոցով իր լուման է ներդնում Զինծառայողների ապահովագրության հիմնադրամին, մինչդեռ առաջին դեպքում մասնակցայնության իսպառ բացակայության հետ գործ ունենք:
Մասնավոր անձը մասնավոր անձին, որը մեր բանակի հետ պաշտոնական որևէ առնչություն չունի /բացի՝ պարբերաբար՝ խաղաղության քարոզ կարդալը և կամուֆլյաժով զորամասերից սելֆիներ անելը/, գումար է փոխանցում և ազատություն տալիս այն տնօրինելու առումով:
Հայաստանը պետություն է, և եթե այն նպատակը, որի համար տվյալ բարերարը գումար է տալիս՝ ունի իր կոնկրետ հիմնադրամը, ապա՝ ի՞նչ իմաստ ունի վարչապետի տիկնոջը խառնելը:

Սա ի՞նչ է, սփյուռքահայի շողոքորթությու՞ն, թե՞ իմքայլական հիմնադրամի բարեկամի միջոցով հերթական ակնարկը՝ այլ սփյուռքահայերին՝ բանակին ուղղված ծրագրային գումարները Աննայի միջոցով իրականացնելու համար:

Հեղինակ՝  Արթուր Գահնապետյան
 

Աղբյուր` Փաստինֆո