Փաստ ինֆո

«Թրանսփարենսի ինթերնեշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանը տարակուսած է, թե ինչու գործ չի հարուցվում ծխախոտի մաքսանենգության սկանդալային բացահայտումների առնչությամբ։

Ավելի վաղ տեղեկացրել ենք, որ ՌԴ իրավապահները Երևանից 40 տոննա մաքսանենգ ծխախոտ տեղափոխող ինքնաթիռ են կալանավորել: Այս լուրից հետո մամուլում և սոցիալական ցանցերում տեղեկություններ հայտնվեցին, որ սույն մաքսանենգության հետևում կանգնած է Նիկոլ Փաշինյանի կնոջ եղբայրը՝ իմքայլական պատգամավոր Հրաչ Հակոբյանը։ Դրանից հետո նույնպիսի խմբաքանակ հայտնաբերվեց Վորոնեժում, որը Ռուսաստան էր արտահանվել տնտեսական ապրանքների անվան տակ, երրորդ խմբաքանակի մասին էլ հայտարարել էր Վատիկանում ՀՀ նախկին դեսպան Միքայել Մինասյանը՝ նշելով, որ այն Վրաստանի տարածքով փորձ է արվել տեղափոխել Աբխազիա։

Առաջին-երկու խմբաքանակների հայտնաբերման աղմուկից հետո դատախազությունը հայտարարեց, որ հանձնարարել է ոստիկանությանը նյութեր նախապատրաստել։

«Ինձ համար ակնհայտ է, որ սա մաքսանենգություն է»,- «Փաստինֆո»-ին ասել էր «Թրանսփարենսի ինտերնեշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանը՝ անդրադառնալով Հայաստանից դեպի Ռուսաստան տեղափոխված ծխախոտի խոշոր մաքսանենգության դեպքերին՝ ընդգծելով, որ օբյեկտիվ քննությամբ իրավապահները պետք է պարզեն, թե ովքեր են կանգնած այդ մաքսանենգության հետեւում:

Սակայն հունիսի 5-ին հայտնի դարձավ, որ ոստիկանությունը որոշել է քրեական գործ չհարուցել՝ հանցադեպի բացակայության հիմքով։

«Ես չգիտեմ, չեմ հասկանում՝ ինչո՞ւ քրեական գործ չի հարուցվում, դա ինձ համար հանելուկ է։ Միգուցե այն պատճառով, որ չի ֆիքսվում՝ ում նկատմամբ քրեական գործ հարուցվի»,- մեկնաբանելով ոստիկանության որոշումը «Փաստինֆո»-ին ասաց Վ.Հոկտանյանը՝ ավելացնելով. «Ամեն դեպքում, պետք է ճշտել՝ Ռուսաստանի Դաշնությունում քրեական գործ հարուցվել է՞, թե ոչ, որովհետև առաջին հերթին տվյալ պարագայում խախտվել են Ռուսաստանի Դաշնության ներքին օրենքները։ Անհրաժեշտ է, որպեսզի ծխախոտի մաքսանենգության բոլոր երեք գործերով հետաքննություն իրականացվի, որովհետև միայն այդ հետաքննության արդյունքում կճշտվի արդյո՞ք հայաստանյան կողմի պաշտոնատար անձինք մեղավորություն ունեն և ինչո՞ւմ են նրանք մեղավոր»։

Վ.Հոկտանյանն արձանագրեց, որ հանցագործությունը տեղի է ունեցել Ռուսաստանի տարածքում՝ Վորոնեժ, Սոչի, Կրասնոդար քաղաքներում և սա առաջին հերթին ռուսական իրավապահ մարմինների խնդիրը պետք է լինի, դրանից բխող հետևանքներով։ «Եթե իրենք քրեական գործ հարուցեն և դրա արդյունքում ի հայտ գա, որ այստեղ ներքաշված են Հայաստանի բարձրաստիճան պաշտոնատար անձինք կամ մարմիններ, այդ դեպքում ամեն բան պարզ կդառնա և դրանից հետո միայն կորոշեն, թե այստեղ ինչ պետք է անել։ Հնարավոր է, որ քրեական գործ հարուցվի պարզապես ինչ – որ ֆիզիկական անձի կամ իրավաբանական անձ հանդիսացող որևէ տնտեսվարող ղեկավարի նկատմամբ միայն։ Իսկ թե ինչո՞ւ ռուսական կողմը քրեական գործ չի հարուցում մի նախադասությամբ՝ ինձ համար դա հանելուկ է»։

Մեր այն դիտարկմանը, թե ինչպես զենքի ապօրինի վաճառքի բացահայտման պարագայում, այս դեպքում նույնպես, միգուցե, ըստ Միքայել Մինասյանի կողմից արված հայտարարության, վարչապետը որևէ մեկի միջոցով փորձել է ռուսաստանյան կողմի հետ հարթել իրավիճակը, Վարուժան Հոկտանյանը նկատեց՝ եկեք Միքայել Մինասյանի բոլոր ասածները հալած յուղի տեղ չընդունենք. «Ես հակված չեմ Միքայել Մինասյանի խոհանոցային զրույցները որպես Ավետարան կամ վերին ճշմարտություն դիտարկել։ Պետք է հստակեցնել, թե դրանից ո՞ր մասն է ճիշտ, որը սխալ, որ մասն է մանիպուլյացիա, իսկ որը իրականություն։ Պետք է հստակեցնել նաև՝ որքանո՞վ է հավաստի այն ինֆորմացիան, թե զենքի առևտրի մեջ ներքաշված անձի՝ Դավիթ Գալստյանի մուտք արգելափակել է դեպի Ռուսաստանի դաշնություն։ Ես ունեմ շատ հիմնավոր կասկածներ, որ այդ ամենը եղել է նաև Միքայել Մինասյանի աներոջ կառավարման ժամանակ և, հենց այդ պատճառով է, որ նա այդքան հմտորեն և մանրամասնությամբ նկարագրում է զենքի առևտրի ողջ մեխանիզմը, որովհետև զենքի ապօրինի առևտուրն այնքան էլ նորահայտ երևույթ չէ։ Խնդիրն այն է՝ ի՞նչ է հիմա տեղի ունենում, արդյո՞ք սա շարունակվում է նոր իշխանությունների օրոք, թե ոչ։ Սա հասկանալու համար միայն Մինասյանի խոսքերով չպետք է առաջնորդվել։ Ինչպես մենք տեսնում ենք, այս ողջ պատմության մեջ խոսող կողմը միայն Միքայել Մինասյանն է։ Թե ինչո՞ւ վերջնական և հիմնավոր չեն հերքվում այս լուրերը ես չգիտեմ, մեղադրվող կողմին է պետք այս հարցն ուղղել։ Իրականում սա ոչ թե հերքել - չհերքելու հարց է, այլ լուրջ հետաքննություն իրականացնելու խնդիր և, նորից եմ կրկնում, առաջին հերթին հենց Ռուսաստանի կողմից, որովհետև այստեղ ավելի շատ վնաս է հասցվել հենց Ռուսաստանի, քան Հայաստանի շահերին։ Միգուցե հայ – ռուսական դարավոր բարեկամությունն է իրենց ստիպում աղմուկ չբարձրացնել։ Ամեն պարագայում սխալ է մեկ մարդու ելույթներով վերջնական եզրահանգումներ կատարել, մանավանդ, որ դեռ շատ ելույթներ կլինեն և հատկապես, իրավապահ մարմինների ելույթները՝ պաշտոնական հաղորդագրությունների տեսքով»։

Հեղինակ՝ Նվարդ Մանվելյան

Աղբյուր` Փաստինֆո