Փաստ ինֆո

«Դա իրավական փաստաթուղթ է, 3 ամիս պետք է սպասել, մինչեւ ուժի մեջ մտնելը, եթե այն մտավ ուժի մեծ, իրավական հարթակներում արդեն հաստատված ճշմարտություն կլինի եւ ամենատարբեր հարթակներում՝ քաղաքական, դիվանագիտական, բնականաբար , այն կօգտագործվի եւ այնտեղ ապացուցված է, որ Ադրբեջանում ոչ միայն կա հայատյաց քաղաքականություն, այլեւ կիրառվում է հայատյաց քաղաքականություն եւ դրա առթիվ որեւէ հետաքննություն չի արվում»,-«Փաստինֆո»-ի հետ զրույցում ասաց ՄԻ հարցերով միջազգային փորձագետ Արա Ղազարյանը՝ անդրադառնալով ադրբեջանցի Ռամիլ Սաֆարովի կողմից դաժանորեն կացնահարված հայ սպա Գուրգեն Մարգարյանի գործով ՄԻԵԴ-ի կայացրած որոշմանը, որով ՄԻԵԴ-ը ճանաչել է Ադրբեջանի կողմից կյանքի իրավունքի եւ խտրականության արգելքի խախտումը:

Արա Ղազարյանը բացատրեց ՝ այս որոշման, ինչպես նաեւ Մանվել Սարիբեկյանի գործով որոշման մեջ խոսվում է այն մասին, որ հետաքննությունը բացակայում է, իսկ Գուրգեն Մարգարյանի գործով որոշումը, փաստաբանի խոսքով, մեկ քայլ առաջ է: «Եթե Սարիբեկյանի գործով դատարանը ասաց, որ չի գտնում , որ ՄԻ եվրոպական կոնվենցիայի 14-րդ հոդվածի խախտում չկա, բայց այդ մասին խոսել է 2-րդ հոդվածի ներքո, իսկ այստեղ հստակ ասաց, որ 14-րդ հոդվածի խախտում կա: Սա արդեն փաստ է եւ հիմք՝ իրավաբանների համար, վկայակոչելու, որ Ադրբեջանում այդ քաղաքականությունը կա եւ այն ոչ թե տարբեր հասարակական հարթակներում է այլ պետական կառույցներում՝ հանրային կառավարման համակարգում , ինչը շատ լուրջ եզրահանգում է»,-նշեց Արա Ղազարյանը:

Փաստաբանի խոսքով, ՄԻԵԴ-ը փորձեց տարանջատել Սաֆարովին Ադրբեջանի հանրային իշխանություններից, թեեւ դատավորների չհամընկնող կարծիքում հարց է բարձրացվել , որ եթե անգամ նա չի գործել պետության հրահանգով, ապա ինչո՞ւ նրան հերոսացրեցին: «Այստեղ դատարանը պետք է ասեր, որ պետությունն իր վրա է վերցնում նրա կատարած հանցագործությունը, այսինքն, պետք է նույնականացներ, բայց դա չասաց, մյուս կողմից, կարեւորն այն է, որ դատարանն ասաց՝ խտրականություն կա եւ քննության առավ հենց Ալիեւի եւ Ադրբեջանի հանրային մյուս իշխանությունների արարքներն այն իմաստով, որ Սաֆարովի արարքն իրենց քաղաքականության հետ նույնականացվեց եւ նշվեց, որ պետք է արդյունավետ քննություն կատարել»,-բացատրեց փաստաբանը:

Արա Ղազարյանի խոսքով, այն , ինչ կարող է անել Ադրբեջանը այս որոշումից հետո, բողոքարկելն է, այնպես, ինչպես բողոքարկվեց Սարիբեկյանի գործով որոշումը . «Մեծ պալատը կորոշի՝ ընդունել, թե ոչ բողոքը, բայց պետք է նշեմ, որ բողոքարկելու համար շատ նեղ հիմք կա, Ադրբեջանը պետք է ցույց տա, որ բողոքի հիմքում ընդհանուր՝ համաեվրոպական նշանակության խնդիր է դրված եւ այդ խնդիրը սխալ է լուծվել դատարանի սխալ որոշման պատճառով: Տվյալ դեպքում նման հիմք չկա կամ պետք է բողոքը հիմնավորի նրանով, որ ՄԻԵԴ-ը կոպիտ սխալ է թույլ տվել: Այս իմաստով, Ադրբեջանը շատ նեղ, շատ փոքր հնարավորություն ունի: Սա իրավական գործընթացն է, մենք բոլորս առաջնորդվում են այն կանխավարկածով, որ ՄԻԵԴ-ը քաղաքական որոշումներ չի կայացնում, անկախ է, անաչառ է»:

Հարցին, թե որպես պետություն ինչպե՞ս կարող է օգտագործել այս նախադեպային որոշումը ՀՀ-ն ՝ որպես պետություն , Արա Ղազարյանը շեշտեց. «Ես վստահ եմ, որ կարող են օգտագործել, սա իր բնույթով այնպիսի իրավաբանական փաստաթուղթ է, որը միանշանակ, կարելի է օգտագործել: Թե ինչպես, ինչ հարթակներում, դա արդեն դիվանագետների գործն է, բայց այս ամբողջ գործընթացը արվել է հենց 2 ուղղությամբ, առաջինը, որպեսզի հնարավորինս վերականգնվեն քաղաքացիների անհատական իրավունքները եւ մյուսը՝ հանրային նպատակն է: Փաստաբանները, որոնք այդ գործը տանում էին ՄԻԵԴ, միայն անհատական իրավունքներով չէին առաջնորդվում , իրենք առաջնորդվում էին այն մտայնությամբ, որպեսզի ինչ-որ կերպ հակազդեին Ադրբեջանի վարվող հայատյաց քաղաքականությանը»:

Արա Ղազարյանը շեշտեց՝ ՄԻԵԴ որոշումը ոչ միայն հանրային այլեւ համաեվրոպական նշանակություն ունի եւ այն մասին է, որ եթե Եվրոպայի տարածքում կա պետություն, որը որպես հանրային քաղաքականություն ատելությունն է առաջ տանում, ուրեմն, ԵԽ-ի տարածքում կա լուրջ հիվանդություն եւ եվրոպական անվտանգությունը վտանգված է:

«Եվրոպական համայնքը պետք է շատ լուրջ եզրահանգումներ անի: Մենք ունենք կարեւոր փաստաթուղթ, որը ֆիքսեց այդ հիվանդությունը եւ սա նշանակում է, որ սա միայն մեր խնդիրը չէ: Եվրոպան թույլ չի տա, որ իր տարածքում այդպիսի պետություն մնա, ուրեմն, իրենք պետք է բոլոր միջոցները ձեռնարկեն, որ այդ հայատյաց քաղաքականությունը, որը անգամ դասագրքերում է քարոզվում, վերացվի: Սա , բնականաբար, քաղաքական հարթակներում քննարկման առարկա է դառնալու»,- ընդգծեց Արա Ղազարյանը՝ շնորհավորելով այն փաստաբաններին, որոնք մեծ ու կարեւոր աշխատանք են կատարել:

Աղբյուր` Փաստինֆո