Փաստ ինֆո

Հայաստանում կորոնավիրուսով վարակված 270 երեխա և 23 հղի։ Մամուլի ասուլիսի ժամանակ ասաց ՀՀ առողջապահության նախարար Արսեն Թորոսյանը։

Նրա խոսքով երեխաներից միայն երկուսն ունեն թոքաբորբ և շատ թեթև են տանում. «Որևէ ծանր կամ կյանքին վտանգ սպառնացող վիճակ չկա, հետևաբար այն ընդհանուր մոտեցումը, որ երեխաները թեթև են տանում, մենք ևս մեր սեփական փորձով տեսնում ենք, բայց դա չի նշանակում, որ պետք է երեխաներին անհարկի վտանգի ենթարկենք»,-ասաց Արսեն Թորոսյանը։

Հարցին՝ այս պահին կորոնավիրուսով հիվանդներին բուժող կադրերի խնդիր կա, թե ոչ, նախարարն ասաց, որ որոշակի մասնագիտությունների գծով կադրերի խնդիր միշտ եղել է. «Խոսքը հատկապես վերակենդանացման բաժանմունքների ռեանիմատոլոգներին է վերաբերում։ Այսինքն` նրանց դեֆիցիտը եղել է մինչև կորոնավիրուսը և այսօր էլ կա։ Փորձում ենք մոբիլիզացնել առկա ռեսուրսները, նաև մտածում ենք ինչպես անենք, որ կարողանան արժանավայել հանգիստ ունենան։ Մի տարբերակ կա նրանց օգնելու։ Դրանք բժշկական համալսարանի կլինիկական օրդինատորներն են՝ ռեանիմատոլոգիայի 2-րդ և 3-րդ կուրսի և վաղը մոտ 60 հոգու հեռավար դասընթաց ենք իրականացնելու, որ հետագայում նրանց կցենք այս պահին գործող ռեանիմացիոն ծառայություններին»,-ասաց նախարարը։

Արսեն Թորոսյանը նաև հավելեց, որ բժշկական հաստատությունների անձնակազմի շրջանակում 375 վարակակիր կա, ինչը կազմում է հիվանդների մոտ 6-7 տոկոսը

Աղբյուր` Փաստինֆո