Փաստ ինֆո

Ինձ զարմացնում են զավեշտի հասնող գրառումները սոցիալական ցանցերում, երբ զավեշտի են վերածում արտակարգ դրությունը։ Այս մասին ֆեյսբուքյան ուղիղ եթերի միջոցով ասաց ՀՀ առողջապահության նախարար Արսեն Թորոսյանը՝ կոչ անելով սթափ գնահատել։ 

Նախարարը նշեց, որ թվերի աճին զուգընթաց անցնելու են ավելի տնային «բուժման» համակարգի. «Երբ սիմպտոմներ չունեցող մեր քաղաքացիները գնալու են տուն և տանն են շարունակելու իրենց «բուժումը», որովհետև մեծ մասին հիմնականում բուժում անհրաժեշտ չէ։ Մենք արդեն հաստատված դեպքերի կոնտակտներին չենք մեկուսացնում հյուրանոցային վայրերում, և նրանք գնում են միայն ինքնամեկուսացման։ Ազատված հյուրանոցային տեղերը դեռևս շարունակվում են զբաղեցվել ասիմպտոմ դեպքերով, սակայն եթե մենք ամեն օր ունենանք 150 նոր դեպք և ունենանք դուրս գրված 70-80 դեպք, այսինքն` գումարային ունենանք 70-80 նոր պացիենտ ամեն օր, ապա 7-ից 10 օրվա ընթացքում մեր ասիմպտոմ քաղաքացիներին պարզապես հյուրանոցներից «դուրս ենք գրելու» և խնդրելու ենք իրենց 14 օրն անցկացնել տներում։ Երկու հանգամանք է պետք հաշվի առնել։ Առաջինը, որ կրկին սեփական պատասխանատվության բարձրացում պետք է ունենան այդ քաղաքացիները, որ չլքեն իրենց ինքնամեկուսացման վայրերը, իսկ երկրորդը, երբ մյուս մեր քաղաքացիներն օգնեն մեզ, որ վարակը չտարածվի այդ վայրերից։ Դրա համար ներդրվելու է նոր մեխանիզմ։ 119 շրջիկ խմբեր են աշխատելու, սակայն այդ հարցում մեզ համար կարևոր է բոլորի աջակցությունը»,-ասաց նախարարը՝ ընդգծելով, որ եթե ինքնամեկուսացված քաղաքացիները լքեն իրենց ինքնամեկուսացման վայրերը, ապա վտանգվում ենք բոլորս։

Նախարարը քաղաքացիներին հորդորեց լրջանալ, քանի որ այն, ինչ տեղի է ունենում, տևելու է շատ երկար. «Այսօր մի աշխատանքային հեռավար քննարկման եմ եղել աշխարհի 6 երկրների հետ, և մենք փորձով էինք փոխանակվում։ Բոլորի մոտ նույն վիճակն է, մի տեղ մի քիչ դեպքերը քիչ են, մի տեղ մի քիչ շատ են։ Վերջում մի ամփոփիչ նոտա եղավ, որ եթե նույնիսկ հայտնաբերվի այս հիվանդությունը բուժելու կամ թեթևացնելու դեղամիջոցը կամ պատվաստանյութը, միևնույն է կորոնավիրուսային համավարակի վերջը հնարավոր է տեսանելի լինի ոչ շուտ, քան 5 տարի հետո։ Սա չեմ ասում, որ վախեցնեմ կամ խուճապ տարածեմ։ Պետք է իրոք լրջանանք և մեր վարքագիծը փորձենք ճշգրտել մոտավորապես իմ ասած ժամանակաշրջանի համար։ Մենք ոչ թե պետք է վերադառնանք մեր առօրյա կյանքին, այլ պետք է ստեղծենք մեր նոր առօրյան»,-ամփոփեց Արսեն Թորոսյանը։

Մանրամասները՝ տեսանյութում

Աղբյուր` Փաստինֆո