Փաստ ինֆո

«Ինձ համար ցավալի էր տեսնել վարչապետին հուսահատ՝ այս փողոցից այն փողոցը քայլելիս: Իր վարկանիշն արդեն այն վիճակում է, որ մարդիկ չէին էլ ուզում շփվել, խոսել: Դա ինձ հիշեցրեց հայտնի ֆիլմը, երբ Վուդի Ալենի հերոսը՝ հայտնի դեմքը փողոցում ասում է՝ հիշո՞ւմ եք, ես այս մարդն եմ, ես կրում եմ ընտանեկան վարտիք: Այսօրվա Նիկոլը հիշեցնում էր այն հերոսին , որին լրատվամիջոցները մոռացել էին»,-«Փաստինֆո»-ի հետ զրույցում ասաց քաղաքագետ Գեղամ Նազարյանը՝ անդրադառնալով վարչապետ Նիկոլ Փաշինյանի այսօրվա ուղիղ եթերին եւ դրա պատճառ հանդիսացած իրավիճակին, որը երկրում ստեղծվել է կորոնավիրուսի հետեւանքով:

Քաղաքագետն ասում է՝ կառավարությունում գիտակցում են, թե ինչ իրավիճակում է գտնվում երկիրը: Գեղամ Նազարյանի խոսքով, Հայաստանում ստեղծված իրավիճակը մտահոգիչ է մի քանի պատճառներով : «Նախ եւ առաջ , խոսքը սոցիալ -տնտեսական պատկերի մասին է, որը առաջացավ թույլ տնտեսության պայմաններում արտակարգ դրության եւ կարանտինի հետեւանքով: Շատ տնտեսվարողներ ու աշխատողներ տուժեցին, որոնց համար, անգամ տարիներ են պետք հարվածից վերականգնվելու համար: Պատկերն ավելի մտահոգիչ է դառնում, որովհետեւ, ինչպես տեսնում ենք կառավարության գործելաոճից, իրենք պատկերացում անգամ չունեն, թե ինչպես պետք է օգնել տնտեսությանը »,-ասաց քաղաքագետը՝ հիշեցնելով, որ խոսքն այն կառավարության մասին է, որը խոստանում էր տնտեսական հեղափոխություն, բայց , փաստորեն, հասարակ հակաճգնաժամային քայլերի անգամ ունակ չէ:

Գեղամ Նազարյանը մտահոգիչ է համարում երկրում տիրող համաճարակային իրավիճակը՝ շեշտելով, որ փաստորեն հայտարարված արտակարգ դրությունը որեւէ արդյունք չի տվել: «Եթե այլ երկրներ արձանագրում ե նվազման միտումներ, եթե հիվանդացության եւ մահացության թվերը նվազում են, մեզ մոտ անհասկանլի թվեր են ներկայացվում՝ աճի միտում, անհասկանալի տրամաբանության միտում: Ստացվում է, որ թվերն էլ տարօրինակ են, որովհետեւ, եթե դու արտակարգ դրություն ես մտցրել, որը որեւէ արդյունք չի տալիս, դա կասկածելի է: Ինչո՞ւ մի տարածաշրջանում կա իքս թվով հիվանդ, մյուսում չկա, այնտեղ թեստավորում չե՞ք արել, թե՞ օդն է մաքուր: Ինչո՞ւ կամ ո՞վ որոշեց, որ մենք պետք է համավարակին այսպես արձագանքեինք, ինչո՞ւ մեր թույլիկ տնտեսությունը չգնաց շվեդական տարբերակով, եթե հիվանդությունը չէինք կարողանալու կանխել, գոնե տնտեսության հերը չանիծեինք»,-հարցնում է քաղաքագետը՝ շեշտելով, որ բացատրությունները պետք է տրվեն:

Նշենք, որ Հայաստանում կորոնավիրուսային վիճակագրությունը վերջին շաբաթներում աճի միտում է գրանցել: Դեպքերն արձանագրվում են հարյուրներով: Այսօր 180 նոր դեպք է գրանցվել, մահվան ելքերը 48-ն են, իսկ ընդհանուր վարակակիրների թիվը՝ 3718: Հավելենք, որ վաղը՝ մայիսի 14-ին արտակարգ դրության ժամկետն ավարտվում է եւ ըստ ամենայնի, իշխանությունը մտադիր է այն երկարաձգել: Վարչապետ Փաշինյանն այսօր նախ Ֆեյսբուքի ուղիղ եթերով քաղաքացիների հետ զրուցեց՝ կոչ անելով պահպանել կանոնները, ապա դուր եկավ փողոց՝ քայլելու , այդ ընթացքում իրեն հանդիպած քաղաքացիներին հորդորելով սոցիալական հեռավորություն պահել ու երեխաներից հետաքրքրվելով, թե գիտեն արդյո՞ք ինչ է կորոնավիրուսը:

«Երբ կառավարությունն իր գործողություններում անտրամաբանական է, ցանկացած քայլ է անհասկանալի, թե ինչու Փաշինյանը դուրս եկավ փողոց, չգիտեմ, գուցե նյարդայնացած էր եւ որոշեց քայլել ու այդպես պարպել զայրույթը»,-նշեց քաղաքագետը:

Գեղամ Մանուկյանի կարծիքով, ըստ երեւույթին կառավարությունում ԵՄ-ից աջակցություն են ակնկալել, բայց այդ հույսն էլ չի արդարացել: Կառավարության բեռը, ըստ Նազարյանի ծանր է. « Փաշինյանը հասկանում է, որ վաղը, մյուս օրը երթուղային տաքսիների վարորդները դուրս են գակու փողոց եւ իրենց երեխաների հացի փողն են պահանջելու, զբոսաշրջության ոլորտի աշխատողները, ռեստորանները, սրճարանները, բոլորը՝ կարի արտադրամասում աշխատողները»,-նշում է քաղաքագետը՝ միեւնույն ժամանակ հավելելով, որ Հայաստանում գործընթացները լինելու են քաղաքական:

«Պրոցեսները լինելու են քաղաքական , որոնք նպաստելու են նաեւ այս սոցիալական դժգոհությունների բարձրաձայնմանը, բայց բուն սոցիալական դժգոհություն Հայաստանում չի լինում, հայ ժողովրդին անհարմար է՝ իր խնդիրներով դուրս գալ փողոց»:
Ըստ քաղաքագետի, ստեղծված իրավիճակում իշխանության համար, որն ունակ չէ լուծել երկրի առջեւ ծառացած խնդիրները, ելքը մեկն է՝ հեռանալ, ինչի հնարավորությունը կառավարման խորհրդարանական համակարգը տալիս է:

«Կառավարության իրական պատկերը մենք տեսանք վերջին օրերին խորհրդարանում, երբ փողոցային քուչի բազարների մեջ են այն դեպքում, երբ երկիրը լուրջ ճգնաժամի մեջ է : Մի քանի հոգի հաստատ հասկանում են, թե ինչի տակ են եւ հասկանում են, որ այդ ռեսուրսներով դուրս չեն գալու, բայց անկեղծ եմ ասում, իրենց ձեռքը ո՞վ է բռնել, ասեք՝ ներողություն , չենք կարողանում»,-եզրափակում է քաղաքագետը:

Աղբյուր` Փաստինֆո