Փաստ ինֆո

Տարբեր նախաքննական մարմինների վարույթում մի քանի քրեական գործ ունենք՝ նախադեպը չունեցող ծավալներ ունեցող քննություն է, և ունենք օպերատիվ տեղեկություններ, փաստական տվյալներ, որոնց վերլուծությունը վկայում է 15 տարի թաքցված և արտոնյալ տնտեսական գործունեություն իրականացնող սուբյեկտների վերաբերյալ: Այս մասին այսօր ԱԺ-ում լրագրողների հետ զրույցում ասաց ՀՀ գլխավոր դատախազ Արթուր Դավթյանը:

Նրա խոսքով՝ տնտեսական գործունեությունը հաճախ իրականացվել է շուրջ 100 ֆորմալ տնտեսական սուբյեկտների կողմից և օպերատիվ , փաստական տվյալների վերլուծությունը վկայում է այդ ամբողջ գործունեությունը մեկ -երկու կետից ղեկավարված լինելու մասին, որովհետև սխեման այնպիսին է, որ այդ գործունեության հատկապես արտոնյալ հատվածն այլ կերպ, քան կազմակերպված եղանակով չէր կարող իրականացվել:

Նրա խոսքով՝այս ծավալի քրեական գործեր դեռևս չեն քննվել:

«Այս 100-ավոր ընկերությունների տնտեսական գործունությունը, դրանց գործունեության գումարային շարժերն, ըստ էության, առերևույթ վկայում են, որ կազմակերպվել է այնպիսի եղանակով, որպեսզի երբևէ մի օր դրա բացահայտման համար լրջագույն խոչընդոտներ ստեղծվեն »,- ասաց Դավթյանը՝ հավելելով, որ դա շեշտում է, որ հանրության համար պարզ լինի այդ գործերի արդյունքների և դրանց նկատմամբ ունեցած ակնկալիքների հստակությունը:

Նրա խոսքով՝ քրեադատավարական գործիքակազմի միջոցով բոլոր փաստական տվյալները ստուգելու և արդյունքում դրանց հերքման կամ հաստատման ապացույցների ձեռք բերման անհրաժեշտություն կա:

Դավթյանը նշեց, որ փուլում՝ որքան առերևույթ հանցագործության վերաբերյալ ապացուցողական բազա կհավաքվի, այդ փուլում կսկսվեն հետապնդումներ: Ըստ նրա՝ ներկայում էլ կան որոշ անձանց նկատմամբ հետապնդումներ, ինչը վկայությունն է նրա, որ այդ դրվագներով ապացուցողական բավարար հենք ապահովվել է:

Դավթյանը հստակեցրեց, որ խոսքը վերաբերում է հարուցված քրեական գործերի մասին, որոնց մասին հրապարակումներ եղել են, օրինակ՝ Գագիկ Խաչատրյանին առնչվող քրեական գործով, Միքայել Մինասյանի նկատմամբ արդեն քրեական հետապնդում է սկսվել և այլն:

Անդրադառնալով Միքայել Մինասյանի նկատմամբ հետախուզման հայտարարմանը և այն հանգամանքին, որ նա բանականին ակտիվ է սոցիալական ցանցերում, հրապարակումներ է անում՝ Դավթյանն ասաց, որ միայն մեկ պաշտոնական տվյալ ունեն, որ Միքայել Մինասյանը ՀՀ տարածքում չի գտնվում և նրա նկատմամբ հայտարարված հետախուզումը միջազգային կոնվենցիոն կարգավորումների շրջանակներում պետք է իրականացվի գործընկեր երկրների իրավապահ մարմինների կողմից:

Աղբյուր` Փաստինֆո