Փաստ ինֆո

Կարծում եմ, որ երեկ տեղի ունեցածը քննարկվելու է «Իմ քայլը» խմբակցությունում, ասեմ ավելին, հենց այդ պահին էլ ընդմիջման ընթացքում քննարկում եղավ, որից հետո պարոն Սիմոնյանը ներողության խոսք ասաց: Այս մասին այսօր «Փաստինֆո»-ի հետ զրույցում ասաց ԱԺ «Իմ քայլը» խմբակցության պատգամավոր Սոֆիա Հովսեփյանն ու շեշտեց, որ ոչ թե պետք է ակնկալել, որ մարդիկ ներողություն խնդրեն, այլ, որ ընդհանրապես նման բան երբեք չանեն:

Հիշեցնենք, որ երեկ ԱԺ արտահերթ նիստի ժամանակ «Լուսավոր Հայաստան» խմբակցության պատգամավոր Անի Սամսոնյանն ասել էր, թե ԱԺ փոխնախագահ Ալեն Սիմոնյանին նույնիսկ սեփական թիմում լուրջ չեն վերաբերում, ուր մնաց իրենք և ժողովուրդը լուրջ ընդունեն, ինչին պատասխանելով Ալեն Սիմոնյանը հայտարարել էր. «Տիկին Սամսոնյան, ես ամուսնացած եմ, առաջարկում եմ իմ մասին ավելի քիչ խոսել, դա տգեղ է դիտվում։ Անընդհատ իմ մոտ տպավորություն է, որ Ձեր մոտ ինչ-որ մանյակալ բան է»։

Մեր զրուցակիցն անընդունելի համարեց ԱԺ-ում երեկ տեղի ունեցած միջադեպն ու շեշտեց, որ սեռով պայմանավորված թիրախավորումը որպես վարքագիծ, որպես մտածողություն ու արարք պետք է վերացվի ոչ միայն Ազգային ժողովից, այլև առհասարակ հասարակությունից, քանի որ ինչպես ցանկացած տղամարդ, այնպես էլ ցանկացած կին ունի արժանապատվություն:

Հովսեփյանը նաև շեշտեց, որ որևէ մեկը, մասնավորապես, քաղաքականության մեջ, քաղաքական հարցեր քննարկելու, բանավիճելու ժամանակ իրավունք չունի բանավեճը տանել անձնական դաշտ, առավել ևս նեղ անձնական շերտեր, որտեղ մարդու արժանապատվությունն է ոտնահարվում:

«Ես խնդիրը չեմ անձնավորում որպես Ալեն Սիմոնյանի կամ Անի Սամսոնյանի հետ կապված միջադեպ:Սա իրապես համամարդկային խնդիր է դառնում, երբ կինը կամ տղամարդը թիրախավորվում է իր անձնական սեռային առանձնահատկություններից ելնելով: Սա շատ լուրջ խնդիր է և անընդունելի է, քանի որ այստեղ անձի արժանապատվության հարցն է»,-ասաց «Իմ քայլը» պատգամավորը:

Դիտարկմանը, թե կարծես «Իմ քայլը» խմբակցության տղամարդ պատգամավորների կողմից և առհասարակ իշխանության կողմից հաճախ են թիրախավորվում կանայք: Նախ Անդրանիկ Քոչարյանը վիրավորել էր Արփինե Հովհաննիսյանին ասելով՝ «Արփինե Հովհաննիսյանը պետք է խոսի փաստերով, իսկ պայմանական կարող է տալ իր մայրիկի և անհայտ հայրիկի անունները»: Մեկ այլ միջադեպ էլ արձանագրվել էր հենց իր նկատմամբ, երբ գործընկերը՝ նույն խմբակցությունից, ասել էր՝ «Ամուսնացիր՝ կանցնի», և հիմա էլ արդեն Ալեն Սիմոնյանի խոսքերն Անի Սամսոնյանի հասցեին, Սոֆիա Հովսեփյանի պատասխանեց. «Ես չեմ ասի, որ միայն «Իմ քայլի» պատգամավորներն են, քանի որ երեկ «Լուսավոր Հայաստան» խմբակցությունից նաև անընդունելի արտահայտություն հնչեց պայմանավորված անձի սեռով, սա ես համարում եմ հասարակական մոտեցում և սա ոչ թե Ազգային ժողովի արտապատկերն է, այլ առհասարակ հասարակության: Այս արտապատկերը պետք է վերացվի մտածողությունից, կրթությունից, ապրելակերպից: Բնական է, որ եթե նման բան կա, ապա դա ինչ-որ կերպ պետք է արտացոլվի. կլինի ԱԺ-ում, դպրոցում թե բուհում: Սա ուղղակի պետք է դուրս բերել, սակայն, ցավոք, բոլոր հասարակություններում նմանատիպ երևույթներ կան»:

Հեղինակ՝ Սոնա Գեւորգյան

Աղբյուր` Փաստինֆո