Փաստ ինֆո

ԵԿՄ նախկին նախագահ, ԱԺ նախկին պատգամավոր Մանվել Գրիգորյանին պատկանող գույքը, այդ թվում՝ Գրիգորյանի առանձնատանը հայտնաբերված ավտոմեքենաները, սնունդը Երևանի ընդհանուր իրավասության դատարանը՝ Մնացական Մարտիրոսյանի նախագահությամբ, հանձնել է երրորդ անձի՝ ԵԿՄ-ին: Այս մասին «Փաստինֆո»-ն տեղեկացավ Մանվել Գրիգորյանի պաշտպանական խմբի անդամ Լևոն Բաղդասարյանից: Նա տեղեկացրեց, որ նախորդ դատական նիստին դատարանը որոշում է կայացրել շարժական գույքի և փչացող սննդի օգտագործումը և տիրապետումը թույլատրելի ճանաչելու մասին:

«Փչացող սնունդի հետ կապված միանշանակ ընդունելի ենք համարում: Այո, օրենսդիրը նման նորմ ունի և դա պետք էր ավելի շուտ անել, այլ ոչ թե՝ սպասել տարիներով: Ինչ վերաբերում է շարժական գույքին, դա դիտում ենք ոչ իրավաչափ, քանի որ օրենսդիրը նման կարգավորում չունի, դա վերաբերում է միայն փչացող սննդին: Առավել ևս այդ շարժական գույքի սեփականատերերը տարբեր անձինք են: Նման պայմաններում դա հանձնել երրորդ իրավաբանական անձի՝ գտնում եմ ոչ իրավաչափ: Օրենքով սահմանված կարգով որոշակի գործառույթներ պաշտպանական կողմը կիրականացնի»,- նշեց Բաղդասարյանը:

Հարցին, թե արդյո՞ք դատարանի այդ որոշումը ենթակա է բողոքարկման, փաստաբանը պատասխանեց, որ դատարանն իրականացրել է անօրինական գործողություն:

«Քրեական դատավարության օրենսգիրքը պարտադիր պայման է դիտում, որ ակտը լինի որոշման տեսքով, սակայն որոշում որպես այդպիսին դատարանը չի կայացրել։ Ընդամենը գրություն է ներկայացվել երրորդ անձ հանդիսացող իրավաբանական կազմակերպությանը: Մեզ ևս տրամադրվել է օրինակը: Կարծում եմ՝ իրավական հարթության վրա դատարանը հերթական անգամ ցույց տվեց իրավական բեսպրեդելություն:

Այնքանով, որքանով Գրիգորյանի գործը գտնվում է նաև ՄԻԵԴ-ի տիրույթում, իսկ այդ գրությունով ուղղակի արգելված է բողոքարկելը՝ ներպետական ատյաններում, անկախ ամեն ինչից՝ մենք կբողոքարկենք այն, թեպետ նման օրենսդրական ընթացակարգ չկա»,- ասաց Բաղդասարյանը՝ հավելելով, որ դատարանի կողմից ներկայացված ոչ իրավաչափ որոշումները պաշտպանական կողմը կուղարկի ՄԻԵԴ:

Հարցին, թե արդյո՞ք ԵԿՄ-ն է դիմել դատարան, Բաղդասարյանը պատասխանեց. «Ենթադրում եմ, որ դիմած կլինի դատարանին: Թեպետ դրա մասին դատարանը չիրազեկեց, երևի պաշտոնական չի դիմել, հեռախոսով է դիմել, հակառակ պարագայում՝ կիրազեկեր: Ինչևէ՝ դատարանը սեփական նախաձեռնությամբ վերցրեց և փչացող սնունդը, շարժական գույքը տրամադրեց երրորդ անձի»:

Բաղդասարյանը նաև տեղեկացրեց, որ միջնորդություն էին ներկայացրել դատարան՝ խնդրելով, որ դատարանը դիմի ՀՀ առողջապահության նախարարությանը՝ կապված Մանվել Գրիգորյանի առողջական վիճակի հետ:

«Այնքանով, որքանով, որ բժիշկներն ահազանգել են, որ այլևս հնարավոր չէ Գրիգորյանի բուժումը ՀՀ-ում, ընդամենը կոնսերվացնում են վերջինիս հիվանդությունները, պաշտպանական կողմը դիմեց Առողջապահության նախարարին, որպեսզի նա, հիմք ընդունելով բժշկական էպիկրիզները, փաստաթղթերը, տա համապատասխան որոշում կամ եզրակացություն, որպեսզի Գրիգորյանը տեղափոխվի արտերկիր: Իսկ, եթե փաստաթղթերը բավարար չեն, ապա հրավիրի նոր կոնսիլիում: ԱՆ-ն գրություն ուղարկեց, որ, քանի որ գործը գտնվում է դատարանում, դիմեք դատարան: ԱՆ գործողությունը, որ անգամ գերիների նկատմամբ նման բան չեն անում, հրաժարվեց առողջապահական գործողություններ իրականացնելուց՝ պատճառաբանելով, որ գործը գտնվում է դատարանում: Դիմեցինք դատարանին՝ իրազեկելով, որ ԱՆ-ն նման անօրինություն է թույլ տվել և խնդրեցինք վարույթն իրականացնող մարմնին, որպեսզի միջամտություն ցուցաբերի և իր որոշմամբ պարտադրի ԱՆ-ին, որպեսզի վերջինս առողջապահական գործառույթն իրականացնի: Դատարանը հերթական անօրինական գործողությունն իրականացրեց և գտավ, որ այստեղ նա անելիք չունի»,- ասաց պաշտպանը:

Ընդ որում՝ դատարանը պաշտպանական կողմին միջնորդությունը մերժելու մասին որոշում չի ներկայացրել, այլ՝ բանավոր կերպով ասել է, որ նա այդտեղ անելիք չունի:

Նրա խոսքով՝ ՀՀ-ում ստեղծվել է իրավիճակ, որ անձը գտնվելով առողջական վատթար վիճակում, առավել ևս՝ փաստվում է, որ ՀՀ-ում ի վիճակի չեն վերջինիս բուժելու, որևէ պետական լիազոր մարմին, այդ թվում՝ դատական իշխանությունը, ձեռքերը լվանում է և մի կողմ է քաշվում: Բաղդասարյանը նշեց, որ դա խնդիր է ՀՀ-ում և խնդիրը միայն Մանվել Գրիգորյանին չի վերաբերում, այլ՝ ընտրովի արդարադատության խնդիրն է:

Հիշեցնենք՝ Մանվել Գրիգորյանը մեղադրվում է ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակություն կազմակերպելու մեջ:

Հեղինակ՝ Իզաբել Սահակյան

Աղբյուր` Փաստինֆո