Փաստ ինֆո

Արցախի նախագահ Բակո Սահակյանի հասցեին հրապարակային սպառնալիքներ հնչեցրած ակտիվիստ Ջիվան Աբրահամյանը ֆեյսբուքյան ուղիղ եթերով հայտարարել է, որ Էջմիածնից փոքր խմբով որոշել են գնալ Նաիրի Բ/Կ՝ համոզվելու, որ Մանվել Գրիգորյանն իսկապես գտնվում է վատ վիճակում։

«Մենք Էջմիածնից որոշեցինք փոքր խմբով գնալ Նաիրի Բ/Կ։ Եթե նա իսկապես նման խնդիրներ ունի, ուրեմն իրեն հիվանդանոցից պիտի դուրս չգրեն։ Եթե դուրս չգրեն ու իսկապես առողջական այդքան լուրջ խնդիրներ ունի, ուրեմն պետք չի ոչ մի քայլ ձեռնարկել։ Իսկ եթե պարզվի, որ Գրիգորյանը պետք է դուրս գրվի հիվանդանոցից ու ստորագրության դիմաց չբացակայելու հիմքով գնա տուն, ապա դա բացարձակապես ընդունելի չէ։ Եթե կպահեն հիվանդանոցում, դա ուրիշ»,-հայտարարել է նա։

Նա ցանկացողներին հրավիրել է միանալ իրենց ։ Հիշեցնենք, որ Երևան քաղաքի ընդհանուր իրավասության դատարանը դատավոր Մնացական Մարտիրոսյանի նախագահությամբ երեկ երեկոյան բավարարեց Մանվել Գրիգորյանի խափանման միջոց կալանքը փոխելու դատախազության միջնորդությունը:

Մանվել Գրիգորյանը գտնվում է «Նաիրի» ԲԿ-ում, նրա վիճակը ծանր է, նա միացված է արհեստական շնչառության սարքին։

Հավելենք, որ 2019 թ-ին մայիսի 25-ին Ազատության հրապարակում մի խումբ ակտիվիստների կողմից ի պաշտպանություն ՆԻկոլ Փաշինյանի իրականացված հանրահավաքի ընթացքում Ջիվան Աբրահամյանը սպառնալիք պարունակող հայտարարություններ էր արել Արցախի Հանրապետության նախագահի հասցեին:
«Էսօր, որ Բակոենք եկել են ստեղ Ռոբերտ Քոչարյանի համար երաշխիք են տվել, կարո՞ղ ա վաղն էլ տանեք Ղարաբաղ, ասեն՝ չենք տալիս, առանձին Հանրապետություն ա, կարո՞ղ ա տենց բան անեք: Էդ ժամանակ հաստատ իմացեք, հենց Ղարաբաղի ներսում ձեզ կսատկացնեն Ղարաբաղի մեր հայրենակիցները, հանկարծ չփորձեք, սա ձեզ նախազգուշացում ա, չոր կոպիտ պատասխան եք ստանալու… ես առաջինը կլինեմ, որ կոչ կանեմ, գնանք ու գլուխներդ քարով ցխենք»,- հայտարարել էր Ջիվան Աբրահամյանը:

Սպառնալիքների փաստով քրեական գործի հարուցումը մերժվել էր ՀՀ քրեական դատավարության 35-րդ հոդվածի 1-ին մասի 2-րդ կետի հիմքով:

Աղբյուր` Փաստինֆո