Փաստ ինֆո

Այսօրվա լրամշակումներով միջոցառումների վերաբերյալ որոշումները հրապարակելուց հետո կունենանք 8 հաստատված միջոցառում, որոնցից 4-ն ունեն սոցիալական բնույթ, 4-ը՝ տնտեսությանն անհրաժեշտ օժանդակություն ցուցաբերելու բնույթ: Այս մասին հրավիրված ասուլիսին ասել է ՀՀ փոխվարչապետ Մհեր Գրիգորյանը: 

Նրա խոսքով՝ առաջին միջոցառումը տնտեսական բնույթի է, որով թիրախավորվում է ծախսի նպատակը, ոչ թե՝ ոլորտը, որովհետև Կառավարությունը համարում է, որ այս փուլում հնարավոր է ստեղծվի իրավիճակ, որ տնտեսվարողն անհրաժեշտություն ունենա միջոցներ ներգրավվել վարկերի տեսքով, որպեսզի իրականացնի հումքի ներկրման, հարկերի վճարման սարքավորումների ներկրման, աշխատավարձերի վճարման հետ կապված ծախսեր:

Գրիգորյանի խոսքով՝ ցանկացած լավ վարկային և հարկային պատմություն ունեցող տնտեսվարող հնարավորություն կունենա օգտվել այս ծրագրից:

Փոխվարչապետը նշեց, որ առաջին միջոցառումը նախատեսում է երեք գործիք՝ համաֆինանսավորում, վերաֆինանսավորում և տոկոսադրույքի սուբսիդավորում, այսինքն՝ երեք գործիքները լուծում են այն հնարավոր դասական խնդիրները, որոնք կարող են ի հայտ գալ՝ արտարժույթի ռիսկ, տոկոսադրույքի բարձր լինելը և գրավի կամ պարտավորության կատարման ապահովման միջոցի նվազ լինելը:

Գրիգորյանի խոսքով՝ երկրորդ միջոցառումը միտված է օժանդակել գյուղատնտեսական ոլորտի ձեռնարկություններին և անհատներին, որոնք խնդիր ունեն դրամական միջոցներ ներգրավվելու: Գրիգորյանի խոսքով՝ այս դեպքում նույն տրամաբանությւոն է, սակայն համավարկավորման կոնցեպտը տարածվում է կոոպերատիվների վրա:

Փոխվարչապետի դիտարկմամբ՝ երրորդ միջոցառումն արդեն ոլորտային է և վարկային ռիսկի գնահատման խնդիրն արդեն լուծված է գործիքով:
Գրիգորյանը նշեց, որ միակ խնդիրը, որը հաստատման կամ նախապատրաստման գործընթաց կանցնի՝ տեղեկատվության իդենտիֆիկացումն է:

Անդրադառնալով սոցիալական միջոցառումներին՝ Գրիգորյանը նշեց, որ օժանդակություն կտրամադրվի այն ընտանիքներին, ովքեր ունեն մինչև 14 տարեկան երեխա, բայց ծնողները զրկվել են աշխատանքից:

Սոցիալական աջակցության մյուս միջոցառումը, որը նշեց Գրիգորյանը՝ քվազի սոցիալական է և նախ և առաջ դրամաշնորհ կտրամադրվի այն մասնավոր կառույցներին, որոնք հունվարի 1-ից մինչև մարտի 25 իրենց աշխատակիցների թիվը և աշխատավարձի ֆոնդը չեն նվազեցրել: Գրիգորյանը նշեց, որ աջակցություն կտրամադրվի նաև այն քաղաքացիներին, որոնք կորցրել են աշխատանքը՝ մարտի 13-ից մինչև մարտի 30-ն ընկած ժամանակահատվածում՝ նվազագույն աշխատավարձի չափով:

Գրիգորյանի մատնանշած սոցիալական մյուս միջոցառումը վերաբերում է հղի կանանց, ովքեր միայնակ են կամ ամուսինն է կորցրել աշխատանքը՝ կտրամադրվի 100.000 դրամի չափով միանվագ նպաստ:

Գրիգորյանը նշեց, որ օժանդակություն կտրամադրվի նաև հյուրատնային և հյուրանոցային ոլորտի, զբոսաշրջության ոլորտի, հանրային սննդի , վարսավիրանոցի և գեղեցկության սրահների, ոչ սնունդի, ալկոհոլային ապրանքների և ծխախոտի մանրածախ առևտրի ոլորտում աշխատող անձանց:

Աղբյուր` Փաստինֆո