Փաստ ինֆո

Գլոբալ շուկաներում այսօր տիրող իրավիճակը նախևառաջ բերում է սպառման անկանոն վիճակի, այդ թվում` նվազման, ինչը նշանակում է` մենք պետք է ունենանք ֆինանսավորման բարձիկներ, որոնք տնտեսվարողներին հնարավորություն են տալիս դրանք օգտագործելով` սպառման անկանոն ռեժիմի ժամանակահատվածն անցնել առանց էական վնասների կամ կորուստների: Կառավարության այսօրվա նիստի ժամանակ այս մասին ասաց ՀՀ փոխվարչապետ Մհեր Գրիգորյանը:

Փոխվարչապետը նշեց` ձևավորել են պոտենցիալ վարկային պրոդուկտների մի շարք, որը ենթադրում է վարկերի համաֆինանսավորում, վարկերի վերաֆինանսավորում և տոկոսների սուբսիդավորում. «Հաշվի առնելով պոտենցիալ վարկառուների խնդիրներն այս իրավիճակում`դա լինելու է կա'մ ապահովման միջոցի անբավարարություն, կա'մ արժութային ռիսկ, կա'մ տոկոսադրույքի գծով ծախսեր: Մեր կարծիքով երեք խնդիրն էլ լուծել ենք օժանդակության երեք ձևերով»,-նշեց Մհեր Գրիգորյանը:

Նրա կարծիքով կունենան նաև այնպիսի վարկատեսակ, որը հնարավորություն կտա բիզնեսին on hold մնալ որոշակի ժամանակ, այսինքն` հոգալ բոլոր ծախսերը, չունենալ տոկոսային բեռ, չունենալ արժութային ռիսկ, բայց պահպանել թե' աշխատակիցներին, թե' ընթացիկ կոմունալ խնդիրները լուծել:

ՀՀ վարչապետ Նիկոլ Փաշինյանն էլ ընդգծեց` բիզնեսին առաջարկում են ճգնաժամային վարկային պորտֆելներ, որի համաձայն ֆինանսավորման 50 տոկոսն իրականացնում են առևտրային բանկերը և վարկային կազմակերպությունները, մինչև 50 տոկոսը ֆինանսավորում է կառավարությունը: Ընդ որում կառավարության ֆինանսավորումն անտոկոս է, իսկ բանկերի և վարկային կազմակերպությունների տոկոսները կառավարությունը նույնպես սուբսիդավորում է.

«Այսինքն տնտեսվարողը 0 տոկոսով ստանում է վարկային միջոցներ: Եթե ընկերությունները դժվարություններ ունեն աշխատողներին աշխատավարձ վճարելու, մենք ասում ենք` փողը կտանք, բանկերի հետ համատեղ վճարեք»,-ասաց վարչապետը` հավելելով, որ առաջարկում են այս փաթեթը դնել հանրային քննարկման, դրա արդյունքում ավելի լավացնեն նախագիծը և որպես կառավարության որոշում հաստատեն:

Աղբյուր` Փաստինֆո