Փաստ ինֆո

Այսօր ԱԺ-Կառավարություն հարց ու պատասխանի ժամանակ «Լուսավոր Հայաստան» խմբակցության ղեկավար Էդմոն Մարուքյանը դիմելով ՀՀ վարչապետ Նիկոլ Փաշինյանին անհասկանալի է որակեց, որ վարչապետը «ուժեղ» ելույթ է ունենում, ինչից հետո «Իմ քայլը» խմբակցության պատգամավոր Սիսակ Գաբրիելյանը հարց է ուղղում՝ ելույթը սրբագրելու, արդարանալու համար։

«Իմաստը ո՞րն է դրա։ Եվ նաև ուզում եմ հասկանալ կարո՞ղ է Ձեր ֆեյսբուքի էջը գողացել են, այդ ի՞նչ բան է, խորհրդարանի նիստն այդպես անլրջացնել, նման բաներ գրել։ Ես իմ ելույթում ասացի, որ այս-այս բաներն եք ասել, Դուք գլխով հաստատեցիք, ապա ես իմ գնահատականները տվեցի, հիմա դրանից հետո սրբագրել չի լինելու, դա ամբողջատիրական բնույթի ելույթ էր առ այն, որ իրավական պաշտպանության որևէ միջոց ձեռնարկողը կհամարվի հակապետական ուժ, իսկ իրավական ժողովրդավարական պետությունում ինչպե՞ս կարող է իրավական պաշտպանության միջոց կիրառողը համարվի հակապետական ուժ։ Այլակարծության տարրական հարգանք չկա։ Ինչ վերաբերում է Ձեր խոսքերին, թե մենք որ սպառնացող լինեինք և այլն, հենց այս բանավեճից հետո Կառավարության նշանակած աուդիտի շրջանակներում Վանաձորում փնտրում են ԼՀԿ-ի աշխատողներ։ Ես ուզում եմ իմանալ, ո՞վ է հանձնարարել հարցերի պլանի մեջ գրել, ԼՀԿ-ից ո՞վ կա աշխատող»,-ասաց Մարուքյանը։

Նիկոլ Փաշինյանն էլ ի պատասխան հորդորեց նայել Մարուքյանի ելույթները, տոնը, բառապաշարը Սերժ Սարգսյանի ներկայությամբ և ապա համեմատել ներկայիս ելույթների հետ։

«Այո, վայելեք այդ ազատությունը, որ հեղափոխությունը Ձեզ բերել է, գոնե ընդունեք դա։ Դուք կարո՞ղ էիք որևէ վարչապետի ներկայությամբ այդպես խոսել։ Եկեք նայենք վիդեոները։ Հովիկ Աբրահամյանի ներկայությամբ Ձեր խոսակցության տոնայնությունը, մյուսների ներկայությամբ, ու հիմա Ձեր խոսելու տոնայնությունը։ Ես հասկանում եմ, կարող է այդ աթոռից է, որտեղ Դուք նստած եք,այդպես ոգեշնչում է»,-ասաց վարչապետը։
Խոսելով Մարուքյանի մատնանշած հանձնարարականի մասին, Փաշինյանն ասաց. «Տվեք, տեսնեմ այդ ով է ինչ հանձնարարել, ես այդ հանձնարարողի հարցերը կլուծեմ։

Դուք մտածում եք, որ մենք կարող ենք այսօր ԼՀԿ-ի դեմ որևէ մեկին հանձնարարություն տա՞նք։ Ասում եմ տվեք, տանենք բռնենք, պատժենք։ Եկեք օգնենք գտնենք, ինչի՞ Դուք մտածում եք, որ ես Ձեզ պիտի սպառնա՞մ, պարոն Մարուքյան, պիտի Ձեր ավտոն վառե՞մ, Ձեր հետևից մարդ ուղարկե՞մ։ Լու՞րջ եք ասում։ Այ ուղարկողների առաջ ժպիտի մեղմ դոզայով եք խոսել։ Ես դեմ չեմ, վայելեք այս հնարավորությունը, հարձակվեք մեզ վրա...»

Մարուքյանը հակադարձեց ասելով, որ մինչ հեղափոխությունը 7 տարի շարունակ պատգամավոր է եղել, և այդ ընթացքում մեկ անգամ է Սերժ Սարգսյանը մտել ԱԺ դահլիճ, 2 ելույթի հնարավորություն է ունեցել, 2 անգամ էլ խոսել է, նայելով նրա աչքերի մեջ ասել է այն ամենն, ինչ մտածում է իր մասին։

«Դրանից առաջ վարչապետ եղել է Կարեն Կարապետյանը, էլի ասել եմ ինչ մտածում եմ, ես և Դուք էլ նույն դաշինքում ենք եղել։ Դրանից առաջ եղել է Հովիկ Աբրահամյանը, Տիգրան Սարգսյանը ու էլի նույն կերպ եմ արտահայտվել։ Ես զարմանում եմ, կարո՞ղ է իշխանությունը հիշողության հետ պրոբլեմ է առաջացնում։ Տենց բաները ո՞նց կարող եք մոռանալ։ Այդ ո՞նց եք մոռացել, այդ որտե՞ղ էինք սփրթնած, որ իրավապաշտպան էի, ամբողջ օրը բանտերում էի՝ այդտե՞ղ էի սփրթնած, թե՞ որ անկախ պատգամավոր էի այդ ժամանակ...այդ ի՞նչ վիրավորական բաներ եք ասում»,-ասաց ԼՀԿ խմբակցության ղեկավարը։

Խոսելով Վանաձորում տեղի ունեցած միջադեպի մասին, նա ասաց, որ տեղեկացնում է խնդրի մասին, ապա ավելացրեց, որ եթե չեն կարողանում գտնել, ապա դա Կառավարության խնդիրն է. «Կառավարության աուդիտ է, վրան գրած է ԼՀԿ-ից ո՞վ կա աշխատող։ Գտե՛ք, բա Ձեր կառավարությունն է, Դուք եք իշխանությունը»։
Մարուքյանը դեռ խոսքը չէր ավարտել, երբ Փաշինյանն ասաց. «Ասում ենք տվեք այդ թուղթը...», սակայն ԼՀԿ ղեկավարը շարունակեց իր խոսքն ու ասաց. «Ինչ վերաբերում է տոնայնությանը, ինչ տոնով որ մեզ սպառնում էիք ելույթի ժամանակ, այդ տոնով էլ պատասխանել եմ...»։

Մանրամասները՝ տեսանյութում։

Աղբյուր` Փաստինֆո