Փաստ ինֆո

Նույնիսկ ԿԳՄՍ նախարարության ԽԾԲ-ական հանձնաժողովն անզոր եղավ ամբողջությամբ կոծկել Դ. Գալոյանի դոկտորականի արտագրությունները:

Ինչպես արդեն տեղեկացրել ենք, Դ. Գալոյանի գիտական աշխատանքներում Բլոգնյուզից և սիրողական այլ աղբյուրներից մեր բացահայտած բազմաթիվ արտագրությունները ստուգելու նպատակով ստեղծվել էր անթույլատրելի կազմով մի աննախադեպ հանձնաժողով, որի անդամները Դ. Գալոյանի մտերիմներն ու բարեկամներն են՝ սեփական գիտական ղեկավարը, երկարամյա անմիջական և հավատարիմ ենթական, գրքի համահեղինակը, հոր մտերիմ ընկերը և այլն (https://bit.ly/2SxI6WR):

Քանի որ ակնհայտ արտագրությունների փաստերը բազմիցս շրջանառվել են մամուլով, անգամ այդ մարդիկ հանրային ճնշման տակ պարզապես ստիպված են եղել ընդունել արտագրությունների առկայությունը:

Այժմ սպասում ենք ԿԳՄՍ նախարար Ա. Հարությունյանի գործողություններին, ով, փորձելով հիմնավորել, որ Դիանա Գալոյանի և իր տեղակալ Գրիշա Թամրազյանի մտերիմ ընկերներ լինելը (ինչպես իրենք են բնորոշում իրենց կապը) որևէ նշանակություն չունի, սեպտեմբերի 30-ին հայտարարել էր՝

- «Ցանկացած ոք, ռեկտորի պաշտոնում ով կլինի, եթե նրա մոտ արտագրությունների դեպքեր բացահայտվեն, ապա նա կլքի պաշտոնը»:

- «Ցանկացած փաստի դեպքում հետևանքները լինելու են: Բոլորը տեսել են դա իմ գործողությունների մեջ, այդ գիծը շարունակվելու է, այստեղ անձնական շահագրգռվածություն չկա և չի կարող լինել»:

Այսքան պարզունակ արտագրություններով հանդերձ՝ Դ. Գալոյանը դեռևս հոկտեմբերին ֆեյսբուքյան իր էջում հայտարարեց, թե «սկզբնաղբյուրների վերաբերյալ առկա են ԲՈԼՈՐ հղումները», և նույնիսկ համարձակվեց զրպարտություն անվանել մեր հրապարակած անառարկելի փաստերը: Այժմ, քանի որ նույնիսկ իր ընկեր-բարեկամների կազմով հանձնաժողովն է հերքել «բոլոր հղումների» առկայության մասին հայտարարությունը, նշանակում է կա երկու տարբերակ. կա՛մ Դ. Գալոյանը գիտակցաբար ստում էր, կա՛մ տեղյակ չէր իր սեփական ատենախոսությունից: Ինքնե՛րդ որոշեք, թե որ տարբերակն է ավելի զարհուրելի կրթական հաստատության ղեկավարի համար:

Աղբյուր` Փաստինֆո