Փաստ ինֆո

ՀՀ երկրորդ նախագահ Ռոբերտ Քոչարյանի պաշտպաններն այսօրվա դատական նիստում հայտարարել են, որ նախորդ նիստին չէին ներկայացել՝ որպես բողոքի նշան՝ դատավորի գործողությունների դեմ։ 

«Փաստինֆո»-ն ավելի վաղ տեղեկացրել է, որ նախորդ դատական նիստը հետաձգվել էր, քանի որ Ռոբերտ Քոչարյանի և Արմեն Գևորգյանի պաշտպանները չէին ներկայացել դատական նիստին և գրավոր տեղեկացրել, որ զրկված են իրենց իրավունքները և պարտականությունները կատարելու հնարավորությունից։ Վերջիններս մատնանշել են նախորդ դատական նիստերից մեկի ընթացքում տուժող կողմի հնչեցրած հայտարարությունը, որ, եթե իրենց վիրավորեն, ապա կընկնեն իրենց օրը, ինչը պաշտպանական կողմը դիտարկել էր որպես սպառնալիք։

Ռոբերտ Քոչարյանի պաշտպան Հայկ Ալումյանը հայտարարեց, դատական նիստին չներկայանալն իր կարծիքի արտահայտման միակ ձևն էր,որը դատարանը թողել է իրեն։

Նա նշեց, որ դատարանը որևէ կերպ չի արձագանքել տուժողի իրավահաջորդի հայտարարությանը և միայն երկու շաբաթ անց սեփական նախաձեռնությամբ փորձեց պարզել խնդիրը։

Ալումյանի խոսքով ՝ իրենց հասցեին հնչել են ատելության խոսքեր ի պատասխան՝ Կարեն Մեժլումյանի հայտարարության։ Նման պայմաններում իր կարծիքի արտահայտման միակ ամենամեղմ միջոցը դատական նիստին չներկայանալն էր։ Ապա նշեց, որ դատարանը միջնորդությունները մերժելուց բացի ունի նաև պարտականություն, որ վերջինս ապահովի պաշտպանների աշխատանքը։

Պաշտպան Արամ Օրբելյանը նշեց, որ նախորդ դատական նիստերին ներկա չի եղել՝ սեփական անվտանգությունից ելնելով։

Վերջինս հայտարարեց, որ իր հասցեին շարունակվել են նմանատիպ արտահայտությունները, նաև այլ տուժողի իրավահաջորդի կողմից։ Նրա խոսքով՝ տուժող կողմն ասել է, որ, եթե իրենք չպատժեն, ապա աստված կպատժի, ինչն անեծք է, բայց չի ցանկանում անեծքի իրավական կարգավորումներին անդրադառնալ դատական նիստի ընթացքում։

Վերջինիս խոսքով՝ դատարանը պետք է ապահովի պաշտպանների և Ռոբերտ Քոչարյանի անվտանգությունը։ Ի լրումն իր գործընկերների հայտարարության՝ երկրորդ նախագահի պաշտպանական խմբի մյուս անդամ Ռուբեն Սահակյանը նշեց, որ ինքն ունեցել է նաեւ այլ պատճառ՝ չներկայանալու դատական նիստին՝ արձանագրելով, որ դատավորը դի կատարում նաեւ ՄԻԵԴ-ի նախադեպային որոշումներով ներկայացված իրավական դիրքորոշումներն ու միջնորդությունները մերժվում են առանց պատճառաբանության։

Պաշտպան Հովհաննես Խուդոյանը նշեց, որ դատական նիստին չի ներկայացել,որովհետև չի իմացել, որ լինելու է դատական նիստ՝ ընդգծելով, որ դատական նիստն այն չէ, երբ մի խումբ մարդիկ հավաքվում և քննարկում են ինչ-որ հարց, այլ՝ պատշաճ դատավարական ընթացակարգի պահպանումը։

Վերջինս նշեց, որ պաշտպաններին պատասխանատվության ենթարկելու հարցին զուգահեռ դատարանը մտածի նաև սեփական գործողությունների վերաբերյալ ԲԴԽ դիմելու մասին։ Պաշտպանական խմբի մեկ այլ անդամ Արամ Վարդևանյանն ասաց, որ նախորդ դատական նիստերին իրեն թույլ չեն տվել խոսել։

Վերջինիս խոսքով՝ դատարանը պարտավոր էր ապահովել կարգ ու կանոնը դատական նիստերի ժամանակ և կողմերի հավասարությունը և մշտապես տուժող կողմն ինչ-որ արտահայտություններ են թույլ տալիս և, որն ավելի վատ է, այն անձանց կողմից, ովքեր նաև Փաստաբանների պալատի անդամներ են։

Հիշեցնենք, որ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Աղբյուր` Փաստինֆո