Փաստ ինֆո

Զերծ կմնամ իրավական գնահատականներից, քանի որ բոլորս տեսել ենք՝ ինչ է տեղի ունեցել։ Կադրերում տեսել ենք՝ ինչ ձևով, ինչի համար է դա արվել։ Լրագրողների հետ զրույցում այս մասին ասաց «Քաղաքացիական գիտակցություն» ՀԿ նախագահ Նարեկ Սամսոնյանը՝ անդրադառնալով Նարեկ Մալյանին բերման ենթարկելու վերաբերյալ։

«Դա արվել է, որ ընդամենը գետնին պառկած նկար նկարեն, հետևաբար իրավական մասին չեմ անդրադառնա։ Սա ակնհայտ քաղաքական հետապնդում է, առավել ևս՝ գիտենք պատճառը։ Եկեք խորհրդանշական բան ֆիքսենք, Նիկոլ Փաշինյանը, լինելով բանակից խուսափած, դասալիքների կառավարության դասալիք ղեկավար, Բանակի օրով այսպիսի մասկի շոու է սարքել բանակում երկարամյա ծառայություն անցած մարդու նկատմամբ։ Այսօրվա մեջ սա ամենախորհրդանշական երևույթն է։ Եկեք համարենք, որ սա Նիկոլ Փաշինյանի յուրահատուկ վրեժն է. Դասալիքը բռնել է բանակում ծառայած մարդուն»,-նշեց Նարեկ Սամսոնյանը։

Նա նաև հավելեց, որ Նարեկ Մալյանի երեկվա հայտարարությունն ուղղակիորեն մերկացնում էր ԱԱԽ քարտուղարի հիբրիդային պատերազմն ընդդեմ Ռուսաստանի. «Նարեկ Մալյանը դրել էր մի հատված, որտեղ ԱԱԽ քարտուղարը գրել էր ամերիկացի գեներալից մի հատված, որն ըստ էության Նարեկ Մալյանի հերթական բացահայտումն էր, որ ԱԱԽ քարտուղար Արմեն Գրիգորյանը զբաղված է Ռուսաստանի դեմ հիբրիդային պատերազմով։ Այս հակառուսականության բանն էր, որ այսօր պատասխան տրվեց բանակի մասով»,-ասաց Նարեկ Սամսոնյանը՝ հավելելով, որ սպասում է՝ իրեն էլ պետք է բերման ենթարկեն։
Հարցին՝ իրեն ինչու՞ են բերման ենթարկելու, Նարեկ Սամսոնյանն ասաց. «Որովհետև քաղաքական հետապնդումը, ինչպես սիրում է ասել դասալիք Նիկոլ Փաշինյանը, պոզով-պոչով չի լինում»,-հավելեց Նարեկ Սամսոնյանը։

Նա նկատեց՝ նոր իշխանությունների շարքերն անցած նախկին օլիգարխների թիկնազորներից սպառնալիքներ են գալիս, որ զգուշանան։ Նարեկ Սամսոնյանի խոսքով ՀՀ ոստիկանությունն ամբողջությամբ բարոյալքված մարմին է. «ՀՀ ոստիկանապետի գլխավորությամբ, որը տեռորիստներին ընդունում է իր աշխատասենյակներում, մյուս տեռորիստին իր ծառայողական ավտոմեքենայով բերում-հասցնում է ոստիկանություն, գուցե թեյ էլ են խմել, բայց այն մարդուն, որն իրենց համակարգից է եղել, այսպիսի լկտի ձևով բերման են ենթարկում»,-ասաց Նարեկ Սամսոնյանը՝ ընդգծելով, որ այսօր ոստիկանությունը տեռորիստների հետ են բանակցում։

Հարցին՝ տեղյակ է արդյոք Նարեկ Մալյանը զենք-զինամթերք պահում էր, թե ոչ, Նարեկ Սամսոնյանն ասաց. «Նարեկ Մալյանը կարող է մի հատ էլեկտրաշոկ ունենար, բայց դա զենք-զինամթերք չի։ Կամ եթե ունենար էլ, կասկած չունեմ՝ դա օրինական կլիներ։ Կամ ո՞նց եք պատկերացնում այս մարդու իշխանության օրոք մենք, լինելով ընդդիմադիր, մեզ մոտ ապօրինի զենք-զինամթերք պահենք, տենց աննորմալ, անուղեղ, անմեղսունակ բան մենակ էս շենքի ներսում նստած մարդկանց մտքում կարող է անցնի»,-ասաց Նարեկ Սամսոնյանը։

Աղբյուր` Փաստինֆո