Փաստ ինֆո

Ի պատասխան ՀՀ վարչապետ Նիկոլ Փաշինյանի «100 փաստ»-երի՝ «Քաղաքացիական գիտակցություն» ՀԿ նախագահ Նարեկ Սամսոնյանը «101 փաստ» է կազմել նոր Հայաստանի մասին, որոնք, ինչպես հայտարարեց լրագրողների հետ հանդիպմանը, հանրությունը Նիկոլ Փաշինյանի շուրթերից չի լսի:

Սամսոնյանն ասաց՝ այդ փաստերը նորացվելու են, հրապարակվելու եւ տարածվելու: Սամսոնյանը թվարկեց այդ փաստերից ամենահետաքրքիրները: Այսպես, որպես առաջին փաստ նա նշեց նախարարների, փոխնախարարների եւ այլ պետական պաշտոնյաների աշխատավարձերի կրկնակի բարձրացումը Նիկոլ Փաշինյանի գաղտնի հրամանագրերով, որոնցով , ըստ Սամսոնյանի, վարչապետն օրենսդրական պահանջները շրջանցել է:

Փաստերից մյուսը արտագաղթին էր վերաբերում: 2018 թվականին, ըստ պաշտոնական վիճակագրության 18500 մարդ է արտագաղթել ՀՀ-ից, իսկ 2019 թվականի հոկտեմբերի դրությամբ ՀՀ բնակչությունը կրճատվել է եւս 11 հազար 700 մարդով: Սամսոնյանն ասաց՝ սա հնդիկների ու պակիստանցիների ներգաղթի բացասական բալանսն է:

Հաջորդ փաստը՝ Գրին քարտի խաղարկությանը 2018 թվականին ՀՀ-ից դիմել է 110 հազար 725 քաղաքացի: 2019 թվականին շարունակվել է նվազել օտարերկրյա ուղղակի ներդրումների ծավալը: Պաշտոնական տվյալներով ներդրումները նվազեն են 60 միլիոն դոլարով՝ կազմելով ուղղակի 68 միլիոն դոլար:

Հաջորդ փաստերով Նարեկ Սամսոնյանը տեղեկացրեց, որ Նիկոլ Փաշինյանի տիկնոջ՝ Աննա Հակոբյանի հիմնադրամին անանուն 10 միլիոն դրամի նվիրատվություն է կատարվել, որը կոռուպցիոն ռիսկեր է պարունակում: Նիկոլ Փաշինյանի տիկնոջ վարսահարդարն ու ոճաբանը կառավարությունում ընդունվել են աշխատանքի եւ սահմանադրական որեւէ կարգավիճակ չունեցող Աննա Հակոբյանին սպասարկելու համար բյուջեի միջոցներից աշխատավարձի, պարգեւավճարների ու օրապահիկների տեսքով ստացել են շուրջ 19 միլիոն դրամ :

Հաջորդ փաստով Նարեկ Սամսոնյանն արձանագրեց, որ «Հայաստան» համահայկական հիմնադրամին վերջին 15 տարիներին ամենաքիչ նվիրատվությունն է արվել այն դեպքում, երբ Փաշինյանը տարբեր արտասահմանյան այցելությունների ընթացքում հանդիպումներ է ունեցել հայկական համայնքների հետ , իսկ հայտնի չարթերային թռիչքով մեկնել է ԱՄՆ եւ Լոս Անջելեսում հանրահավաք անցկացրել:

«101 փաստ»-երի թվում Սամսոնյանն առանձնացրեց նաեւ այն, որ «Հայաստան» համահայկական հիմնադրամի գործադիր տնօրենի պաշտոնում նշանակվել է Հայկակ Արշամյանը, ով համատեղությամբ Նիկոլ Փաշինյանի ստեղծած ՔՊ կուսակցության հոգաբարձուների խորհրդի նախագահն է: Սամսոնյանն ասաց, որ սա քաղաքական կոռուպցիայի ցայտուն դրսեւորում է:

Նա ուշագրավ համարեց , որ «Հայաստան» համահայկական հիմնադրամի սոցիալական ծրագրերի իրականացումը վստահվել է ՔՊ հոգաբարձուների խորհրդի անդամ Մարո Մաթոսյանին եւ փոխվարչապետ Տիգրան Ավինյանի գրասենյակի ղեկավար Վարագ Սիսեռյանի մորը՝ Վերա Սիսեռյանին:
Սամսոնյանը այս փաստը եւս քաղաքական կոռուպցիայի դրսեւորում որակեց:

Մանրամասները՝ տեսանյութում

Աղբյուր` Փաստինֆո