Փաստ ինֆո

Մեր երեխան առաջին դասարանում տեսել է, որ բամբաներկայով կարելի է գնահատական ստանալ, երկու բամբաներկայով կարելի է ավելի լավ գնահատական ստանալ։ Այս մասին մամուլի ասուլիսի ժամանակ ասել է ՀՀ վարչապետ Նիկոլ Փաշինյանը՝ ընդգծելով, որ կրթական համակարգը, մասնավորապես բուհական համակարգը կոռուպցիայի հենասյուներից մեկն է եղել։

«Մենք այսօր կանգնած ենք մի խնդրի առաջ, այդ ամեն ինչի արդյունքում, որ մեզ ասում են հետևյալը՝ ոնց բա բուհում հայոց լեզվի ուսուցումը պարտադիր չեք դարձնու՞մ։ Բա մեր երեխեքը որտեղ են հայերեն սովորելու։ Բոլորը մոռանում են, որ կա դպրոց, որն ավարտած և ատեստատ ունեցող մարդը պետք է տիրապետի գրական հայերեն լեզվին։ Բոլորը մոռանում են, որ կա ընդունելության քննություն, և բուհ ընդունվել առանց հայերենի իմացությունը հաստատելու, հնարավոր չի»,-ասաց վարչապետը։

Վերջինս նկատեց՝ տեխնոլոգիական ոլորտի ընկերությունները, երբ ուսանողն ավարտում է, գալիս ասում, որ մասնագետ են, դիպլոմը վերցնում դնում են դարակը, իրենց լսարան են տանում ու ասում՝ վեց ամիս այնտեղ դասընթացների գնալ, որից հետո կերևա՝ կարող է այնտեղ աշխատել, թե ոչ. «Բա սա պետական միջոցի մսխում չի՞։ Բա էդ վեց ամիսը, որ պետք է այդ աշխատողն արդեն ավելացված արժեք, արդյունք ստեղծեր, էդ վեց ամիսը, բայց էդ վեց ամսվա փողը պետությունն արդեն բյուջեով ծախսել է։ Էդ ուսանողն էլ ծախսել՝ ուսման վարձ տալով։ Էսօր էդ բուհից, էդ դասախոսից, էդ ռեկտորից ոչ մեկ պատասխան չի պահանջում։ Գիտե՞ք ինչի չի պահանջել, որովհետև ընտրությունների ժամանակ իշխանությունը զանգել է, ցուցակներ, նախընտրական հանրահավաքների ժամանակ ֆոն են դարձել էդ մարդիկ, ուսանողներին հանրապետականացրել են»,-նշեց վարչապետը։

Աղբյուր` Փաստինֆո