Փաստ ինֆո

«Անկեղծ ասած, լսեցի վարչապետ խոսքը, ինձ ավելի հոգեհարազատ է խոսքի 2-րդ հատվածը, որտեղ Նիկոլ Փաշինյանը նշում է, որ անկախ կարծիքների տարբերությունից, ինքը դեմոկրատիայի կողմնակից է եւ որեւէ խնդիր չի տեսնում, որ լինի նաեւ լրատվական մեդիա, որտեղ կհնչի խոսք, որը հաճո չէ իշխանության քիմքին։ Ես չգիտեմ, ինքը դա սարկազմով է ասել, թե ենթատեքստ է եղել։ Ես սարկազմը դնում եմ մի կողմ եւ նշում եմ՝ այո՛, Հայաստանում ազատ խոսքը չպետք է գրաքննվի , այո՛, Հայաստանում ատելության խոսքը պետք է օրենսդրորեն կարգավորվի, այո՛, Հայաստանում որեւէ հեռուստաեթերից չպետք է հնչի ատելության խոսք, բռնության խոսք որեւէ քաղաքական գործչի, որեւէ հասարակ քաղաքացու հասցեին։ Սա միանշանակ է, բայց փորձ անել լրատվական դաշտը լղոզել եւ ռեպրեսիվ մեթոդներ կիրառել լրատվամիջոցների հանդեպ, որեւէ իշխանության չի հաջողվել եւ առավել եւս հիմա դա չի հաջողվելու»,-«Փաստինֆո»-ի հետ զրույցում ասաց ԱԺ ԲՀԿ խմբակցության պատգամավոր, ԱԺ մարդու իրավունքների պաշտպանության մշտական հանձնաժողովի նախագահ Նաիրա Զոհրաբյանը՝ անդրադառնալով կառավարության նիստին ՀՀ վարչապետ Նիկոլ Փաշինյանի հայտարարությանը, թե առնվազն երկու հեռուստաալիքի լոգոյի տեղը կարելի է գրել «Կոռուպցիա», կամ «Կոռուպցիա գրուպ»։

Նաիրա Զոհրաբյանը փաստ է համարում այն, որ վերջին շրջանում ազատ խոսքը Հայաստանում հայտնվել է թիրախում եւ, որ այն, որ երկրում ատելության խոսքը պետք է օրենսդրորեն զսպվի։

Հիշեցնենք, անդրադառնալով գովազդի բաշխման համակարգին, վարչապետը հայտարարեց, որ այն մոնոպոլիզացված է եւ նշեց, որ Հայաստանում կան կոնկրետ անձանց սեփականությունը հանդիսացող հեռուստաընկերություններ, որոնց լոգոյի փոխարեն, ըստ Փաշինյանի, կարելի է գրել «Կոռուպցիա», կամ «Կոռուպցիա գրուպ»։ « Հայաստանում ժողովրդավարության մակարդակն այնքան բարձր է, որ Հայաստանում նույնիսկ կոռուպցիոներների հեռուստաընկերություններ կան, առնվազն երկու հեռուստաալիքի լոգոյի տեղը կարելի է գրել «Կոռուպցիա», կամ «Կոռուպցիա գրուպ» ... Նման հեռուստաընկերության գործունեությունն իրենց համար ոչ միայն հիմնական կոռուպցիոներների շրջանակն է բացահայտում, այլև նրանց շոշափուկների ու մետաստազների»,-հայտարարեց Փաշինյանը:
«Ինչ վերաբերում է այս կամ այն հեռուստաընկերության թիկունքին կանգնած կռուպցիոներների մասին հայտարարությանը, կարծում եմ՝ եթե կան փաստեր, ապա այդ փաստերը պետք է տրամադրվեն իրավապահ մարմիններին»,-շարունակեց Նաիրա Զոհրաբյանը։

Ըստ պատգամավորի, եթե հայտարարվում է, որ Հայաստանում դատական իշխանությունն անկախ է, ապա անկախ դատական իշխանությունը պետք է զբաղվի այդ խնդիրներով։

Մեր դիտարկմանը, թե կոռուպցիոն բնույթի հանցագործություններով թե նախկին, թե գործող իշխանության ներկայացուցիչների, օրինակ, ՊՎԾ նախկին ղեկավարի, առողջապահության եւ ԿԳՄՍ փոխնախարարների վերաբերյալ հարուցված տարբեր քրեական գործերով դատարանի վճիռներ չունենք, Նաիրա Զոհրաբյանն արձագանքեց. « Ես գիտեմ, որ դատական պրոցեսը գնում է, բայց քանի որ իրենք իմ հետաքրքրությունների տիրույթում չեն եւ ես այդ գործընթացներին, այդ թվում նաեւ նախկին իշխանության տարբեր ներկայացուցիչների դատական գործընթացներին չեմ հետեւում։ Ուզում եմ հավատալ, որ մեր երկրում այլեւս քաղաքական հաշվեհարդարներ չեն լինելու, ուզում եմ հավատալ, որ մեր երկրում այլեւս սեփական թիմակցի դեմ հարուցված քրեական գործը իրական քրեական գործ է լինելու եւ ոչ թե քաղաքական շոու,այդ իսկ պատճառով, չեմ հետեւում՝ այն համոզմամբ, որ դատական գործընթացները կլինեն արդար եւ ներկա իշխանությունների դեմ հարուցված քրեական գործերը չեն լինի ընդամենը դեմոկրատական շոու բեմադրելու համար»։
Նաիրա Զոհրաբյանը զերծ մնաց գնահատականներից, թե ինչու են դանդաղում այս գործերով դատական ակտերը՝ նշելով, որ գուցե յուրաքանչյուր գործ իր քննության ժամկետն է պահանջում։

Ինչ վերաբերում է հանգամանքին, որ վարչապետը կառավարության նիստին, թեեւ անուններ չնշելով, բայց թիրախավորում է կոնկրետ հեռուստաընկերությունների, Նաիրա Զոհրաբյանն ասաց.«Ես կարծում եմ, որ մեր երկրում կան երկու կառույցներ, ովքեր ի պաշտոնե պարտավոր են եւ զբաղվում են հեռուստաընկերությունների եւ մեդիայի խնդիրներով, իսկ եթե վարչապետը կոնկրետ փաստեր ունի, այդ փաստերը պետք է տրամադրի իրավապահ մարմիններին»։

Աղբյուր` Փաստինֆո