Փաստ ինֆո

Բողոքարկել ենք Արմեն Թավադյանին կալանավորելու, ինչպես նաև մինչ այդ նրա ձերբակալման վերաբերյալ ներկայացված բողոքի կապակցությամբ միասնական դատական ակտը և տեղեկացված ենք, որ առաջին ատյանից գործը տեղափոխվել է Վերաքննիչ դատարան։ Լրագրողների հետ հանդիպման ժամանակ այս մասին ասաց «5-րդ» հեռուստաալիքի սեփականատեր Արմեն Թավադյանի պաշտպան Հովհաննես Խուդոյանը։

Նա նկատեց՝ գործողությունը, որը ենթադրում է մեկ հատոր նյութերի ֆիզիկական տեղաշարժ Կենտրոն նստավայրից մինչև Վերաքննիչ դատարան, կատարվել է շուրջ մեկ շաբաթվա ընթացքում. «Այնուամենայնիվ ակնկալում ենք՝ առաջիկա մի քանի օրերի ընթացքում կնշանակվի դատական քննություն և արդեն Վերաքննիչ քրեական դատարանում կքննարկենք թե՛ ձերբակալման, թե՛ կալանավորման իրավաչափության հարցը։ Նաև կարող է քննարկվել գրավի հարցը, որը նույնպես բողոքով ներկայացված է»,-նշեց Հովհաննես Խուդոյանը՝ հավելելով, որ այս պահին առանձին մանր գործընթացներ են կայանում դատավարական գործողությունների մասով. «Գույքի կալանքի հարցը պետք է ճշտենք՝ արդյոք գույքը կալանքի տակ է, որովհետև նման պրակտիկա ունենք նաև առգրավումների, որոնք գործի հետ առնչություն չեն ունեցել։ Ունենք առանձին միջնորդություններ, որոնք այս շաբաթվա ընթացքում նույնպես քննարկելու ենք վարույթն իրականացնող մարմնի հետ»,-ասաց Հովհաննես Խուդոյանը։

Նա տեղեկացրեց՝ միջնորդություններից մեկը քննարկվել է և մասնակի վերացվել է Արմեն Թավադյանի համար տեսակցությունների արգելքը, վերջինիս ընտանիքի անդամները կարողացել են տեսակցել։ Հովհաննես Խուդոյանն ընդգծեց՝ այս պահին առաջնահերթ է, որ իրավունքների խախտումները դադարեցվեն։

Հարցին՝ արդյոք տեսնում է արհեստական հետաձգելու միտում, փաստաբանը նկատեց՝ այն գործողությունը, որը կարող է տևել 1-2 ժամ, տևում է շուրջ մեկ շաբաթ. «Այս պարագայում խնդիր կա։ Մենք նաև որոշակի պրոբլեմ ունեցանք պայմանական օբյեկտիվ պատճառներով՝ տոնական օրերն էին խանգարում բողոքարկման ընթացքին, բայց քանի որ դա հատկապես այս գործով չէ, այդ խնդիրն ունենք բոլոր քրեական գործերով, այսինքն սա հատուկ վերաբերմունք չէր։

Չնայած բազմիցս ասել ենք՝ այն դեպքերում, երբ խոսքը գնում է անձի ազատությունը սահմանափակելու, անձին կալանավորելու մասին և՛ դատարանները, և՛ դատախազությունը, և՛ քննիչները, նույնիսկ դեկտեմբերի 31-ին կարող են դատարան ներկայանալ և անձի կալանքի հարցը քննարկել»,-հավելեց փաստաբանը։

Հիշեցնենք, որ դեկտեմբերի 19-ին ոստիկանությունը տեսանյութ էր տարածել, ըստ որի Ռոբերտ Քոչարյանի աջակիցներից մեկը Քանաքեռում գտնվող իր գրասենյակ է հրավիրել մարտի 1-ի դեպքերից տուժած անձանցից մեկին ու առաջարկել հրաժարվել տուժողի կարգավիճակից, տված ցուցմունքից և չներկայանալ դատական նիստերին՝ հայտնելով, որ պատրաստ է վճարել այն գումարը, որը պետք է պետությունը տրամադրի որպես դրամական աջակցություն։ Բացի այդ խոստացել է, որ իշխանափոխությունից հետո տուժողին կնշանակեն բարձր պաշտոնի։ Դեպքի առթիվ ոստիկանությունում քրեական գործ է հարուցվել, որով նախաքննությունը կատարվում է ՀՔԾ-ում։

«Փաստինֆո»-ն ավելի վաղ հայտնել էր, որ նախաքննական մարմինը ոստիկանության կողմից ներկայացված արարքը որակել է սուտ ցուցմունք տալու համար տուժողին կաշառելը, որ կատարվել է կազմակերպված խմբի կողմից եւ մեղադրանք առաջադրել ՀՀ երկրորդ նախագահ Ռոբերտ Քոչարյանի ենթադրյալ աջակից՝ ավելի վաղ ձերբակալված Վ.Մկրտչյանին՝ ՀՀ քրեական օրենսգրքի 340-րդ հոդվածի 4-րդ մասի 1-ին կետով, եւ նրան ազատել արգելանքից։ Փոխարենը նույն օրը ձերբակալվել է հեռուստաընկերության սեփականատեր Արմեն Թավադյանը, ապա նաեւ կալանավորվել՝ նույն մեղադրանքով։

Հեղինակ՝ Հասմիկ Կոշկարյան

Աղբյուր` Փաստինֆո