Փաստ ինֆո

«Այսօր ցավալի ժամկետ է լրանում՝ 365-րդ օրն է այն պահից, ինչ նախագահ Քոչարյանը գտնվում է ապօրինի կալանքի տակ։ Դուք գիտեք, որ ձերբակալվել է «5-րդ ալիք» հեռուստաալիքի սեփականատեր Արմեն Թավադյանը, որը հայտնի է որպես Ռոբերտ Քոչարյանի ընկեր, նրա ընտանիքի բարեկամ»,-լրագրողների հետ ճեպազրույցում ասել է ՀՀ 2-րդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանը:

Անդրադառնալով Արմեն Թավադյանի ձերբակալությանը՝ Սողոմոնյանը նշել է. «Ընդամենը մի քանի օր առաջ, երբ հրապարակվեց այդ լուրը, թե իբր աջակիցներից մեկը փորձել է ցուցմունք փոխել, ոստիկանությունը դա սկսեց տիրաժավորել, արդեն պարզ էր, որ դա ինչ-որ գործողության նախապատրաստություն է։ Օդում կախված լուրեր կային, որ այդ տեսանյութը պատրաստվել է պարոն Թավադյանի դեմ և նրա ընտանիքի անդամների դեմ ինչ-որ գործեր սարքելու համար։ Եվ պարոն Թավադյանի մասով դա իրականություն դարձավ, նա ձերբակալվեց»:

Նա նշել է, որ 2-րդ նախագահի աջակիցներն այսօր հավաքվել են՝ ամփոփելու իրենց գործունեությունը տարվա ընթացքում: Սողոմոնյանը տեղեկացրեց, որ ավելի քան 60 հազար քաղաքացի է միացել Ռոբերտ Քոչարյանի ազատության կոչով «100-ի հայտարարությանը»:

Ըստ Վիկտոր Սողոմոնյանի, այն կոշտ արձագանքը, որը հաջորդեց մշակույթի գործիչների հայտարարությանը, պայմանավորված էր մեկ բանով՝ իշխանությունը առաջին օրվանից տարածում էր կեղծ առասպել, թե հասարակությունը ցանկանում է՝ ամեն գնով Ռոբերտ Քոչարյանը պատժվի, որ նա հասարակության մեջ ատելի մի անձնավորություն է , որ որեւէ մեկը պատրաստ չէ նրան պաշտպանել եւ , որ նրա հանդեպ կարելի է քաղաքական, իրավական հաշվեհարդար տեսնել։

«Այս հայտարարությունները ապացուցեին, որ դա բացառապես կեղծիք էր, որ նախագահ Քոչարյանը մեծ հեղինակություն ունի հասարակության մեջ։ Ես գիտեմ, որ բազմաթիվ մարդկանց զանգել են, փորձել են ահաբեկել, ֆեյքերի բանակն ուղղակի հարձակվել է արվեստի գործիչների վրա, փորձելով նրանց ամոթանք տալ։

Ես գիտեմ, որ արվեստի ու մշակույթի գործիչները սթափ մարդիկ են, շատ լավ հասկանում են, որ այդ ֆեյքերի հետևում կանգնած են վարձկաններ, որոնք այդ գործը անում են։ Սա է պատճառահետևանքային կապը այդ հայտարարության եւ իշխանության հարձակման, պարոն Թավադյանի ձերբակալության»։

Այս իրավիճակը, ըստ Սողոմոնյանի, հնարավոր չէ երկար պահել. «Ռոբերտ Քոչարյանի ապօրինի կալանքը պետք է վերացվի ու երկրում իրավակարգը վերականգնվի»:

Անդրադառնալով ՀՀ 2-րդ նախագահի մասնակցությամբ կուսակցություն ստեղծելու մասին տեղեկություններին, Վիկտոր Սողոմոնյանն ասել է, որ այս պահին նման նախագիծ չկա, բայց պարզ է, որ քաղաքական կյանքին մասնակցելու հիմնական ձեւերից մեկը դա քաղաքական միավորն : «Այսօրվա աշխարհում քաղաքական կյանքին մասնակցելու բազմաթիվ ձեւեր կան, բայց կուսակցություն ստեղծել եւ դրանով մասնակցել քաղաքական կյանքին, առավել եւս, որ մենք խորհրդարանական կառավարման մոդելով հանրապետություն ենք, կարծում եմ, շատ տրամաբանական քայլ կլինի, բայց նորից եմ կրկնում չբացառելով նման քայլի , այս պահին ինձ հայտնի չէ, որ որեւէ նախագիծ դրված է քննարկումների եւ այդ քննարկումներին բանտից մասնակցում է նաեւ նախագահ Քոչարյանը,-եզրափակել է Սողոմոնյանը:

Աղբյուր` Փաստինֆո