Փաստ ինֆո

Իմ ընտանիքի անդամներն այսօր ինչ-որ տրանսպորտային միջոցով տեղից տեղ են շարժվում, այդ մեքենան իմ ընտանիքի անդամի համար չէ գնված։ Այդ մեքենան գնված է պետական պահպանության ծառայության աշխատողների համար, որոնք իրականացնում են վարչապետի ընտանիքի անդամների անվտանգությունը։ Այս մասին ասաց ՀՀ վարչապետ Նիկոլ Փաշինյանը՝ իր՝ զրույց քաղաքացու հետ «Վարչապետի դստեր մեքենայի» մասին, ուղիղ եթերի ժամանակ։ 

«Օրենքով սահմանված է, որ այդ մարդիկ պետք է ունենան տրանսպորտային միջոց։ Նույն տրամաբանությամբ այն մեքենան, որով ես եմ շրջում, այդ մեքենան իմը չէ։ Այդ մեքենան պետական պահպանության ծառայությանն է, որն այդ մեքենան օգտագործում է վարչապետի անվտանգությունն ապահովելու համար, իսկ վարչապետի անվտանգությունն ապահովվում է, որովհետև այդպես սահմանված է օրենքով, որովհետև վարչապետը չի կարող հրաժարվել անվտանգությունից»,-ասաց Նիկոլ Փաշինյանը՝ հավելելով, որ ասել՝ իր ընտանիքի անդամների որևէ մեկի համար պետական պահպանության ծառայությունը մեքենա է գնել, վարչապետի խոսքով դա աբսուրդ է։
Վարչապետը նշեց, որ երբ Մարիամը վերջերս վարորդական իրավունք ձեռք բերեց, շրջում էր 2008 թվականի արտադրության Nissan qashqai է ավտոմեքենայով և պետական պահպանության այդ մեքենան նրա հետևից գնում էր։ «Ստացվում էր, որ իմ ընտանիքի անդամը շարասյունով է շրջում Երևանում և դրա համար որոշ ժամանակ անց որոշեց այդ տհաճությունից հրաժարվելու նպատակով պետական պահպանության մեքենայով շարունակել շրջել»,-ասաց Նիկոլ Փաշինյանը։
Վերջինս ընդգծեց, երբ իմացել է այն լուրը, որ 2019 թվականի մեքենա է ձեռք բերվել, զանգել է պետական պահպանության ծառայության պետի պաշտոնակատարը կատարողներին և հարցրել՝ 2019 թվականին մեքենա ձեռք բերվել է, թե ոչ։ Վարչապետին պատասխանել են, որ 2019 թվականին մեքենա ձեռք չի բերվել. «Ինձ մոտ հարց ծագեց՝ 2018թ.-ին մեքենա ձեռք բերվել է, թե ոչ և պարզվեց, որ այո, մեքենաներ են ձեռք բերվել և այդ մեքենաները ձեռք չեն բերվել իմ ընտանիքի անդամների համար։ Այդ մեքենաները ձեռք են բերվել իմ ընտանիքի անդամների անվտանգությունն ապահովելու նպատակով՝ ՊՊԾ-ի համար։ Այդ մեքենաները ձեռք են բերվել, որովհետև ՀՀ սահմանված օրենքով պարտադիր պետական պահպանության ենթակա անձանց թիվն ավելացել է, որովհետև ասեմ, եթե չգիտեք, որ նախկինում պաշտոնավարածների անվտանգությունը շարունակում են ապահովել։ Եվ էլի մարդիկ են ավելացել, որոնց պետական պահպանությունն իրականացնելը սահմանված է օրենքով։

Այդ նույնն է, որ ասեմ Մարիամ Փաշինյանի համար կալաշնիկովի ավտոմատներ են ձեռք բերվել, Մարիամ Փաշինյանի համար զրահաբաճկոններ են ձեռք բերվել, Մարիամ Փաշինյանի համար ռադիոկապ է ձեռք բերվել և այդպես շարունակ։ Այդ մեքենաները ձեռք են բերվել օրենքով սահմանված պարտադիր գործառույթն իրականացնելու համար և այսօրվա օրենքով այդ գործառույթից հրաժարվելու իրավունք չունենք»,-հավելեց Նիկոլ Փաշինյանը՝ ընդգծելով, որ այդ գործառույթի իրականացումը պարտադիր է։ Վարչապետը նկատեց՝ Հայաստանում կան մարդիկ, որոնց թվում է, թե ախռանա ունենալը և այդպես շրջելը գերագույն հաճույք է, սակայն վարչապետի խոսքով վերջին 1.5 տարվա ընթացքում իրենց ընտանիքի ամենամեծ խնդիրը կապված է այդ երևույթի հետ. «Իմ ընտանիքի անդամներն անընդհատ իմ առջև հարց են դնում, որ սա իրենց համար մեծ պրոբլեմ է։ Այս կարգավիճակն իրենց համար մեծ դիսկոմֆորտ է։ Անցած կիրակի օրը մենք ընտանիքով փախել էինք մեր հին մեքենայով և 1.5-2 ժամ շրջել ենք Երևանում մեր հին ավտոմեքենայով։ Կարծում եմ՝ կան քաղաքացիներ, որոնք նկատել են, մեզ տեսել են։

Բայց տվյալ դեպքում իմ գործողությունը կարող է մեկնաբանվել որպես օրենքի խախտում»,-նշեց վարչապետը։

Մանրամասները՝ տեսանյութում։

Հեղինակ՝ Հասմիկ Կոշկարյան

Աղբյուր` Փաստինֆո