Փաստ ինֆո

«Բարձրագույն կրթության և գիտության մասին» օրինագիծը մի քանի դրույթներով որակի միտված էական փոփոխություն ունի նախորդ օրենքի համեմատությամբ։ Լրագրողների հետ հանդիպման ժամանակ նման կարծիք արտահայտեց Հայաստանի պետական տնտեսագիտական համալսարանի ռեկտորի պաշտոնակատար Դիանա Գալոյանը։

Նա ընդգծեց՝ օրինագծով ավելանում է բուհերի ինքնավարությունը, ինչը վերաբերում է նաև ակադեմիական ինքնավարությանը, քանի որ կրթական ծրագրերի մշակման առումով օրենքով խիստ չափորոշիչներ սահմանված չեն, ինչը ռեկտորի պաշտոնակատարի կարծիքով նշանակում է՝ բուհերն ավելի ճկուն կարող են լինել և հարմարեցնել իրենց կրթական ծրագրերն աշխատաշուկայի պահանջներին. «Հաջորդ դրույթը ֆինանսական ինքնավարությունն է, որը նույնպես բավական ավելացել է։ Բուհերի կողմից ազատությունը սեփական ֆինանսները կառավարելու առումով։ Եթե նախորդ օրենքի համաձայն գույքը, որը բուհինն էր և բուհը տալիս էր վարձակալության, դրանից ստացվող գումարները բուհին չէին մնում, իսկ նոր օրինագծի համաձայն՝ դրանք բուհն է տնօրինելու»,-նշեց Դիանա Գալոյանը։

Նրա կարծիքով այս օրինագծի տարբեր դրույթներով ինքնավարության էական ավելացում կա։

Թե ինչ հնարավորություններ է տալիս նոր օրինագիծը կրթական որակը բարելավելու առումով, Բրյուսովի անվան պետական լեզվահասարակագիտական համալսարանի ռեկտոր Կարինե Հարությունյանն արձագանքեց. «Օրենքը լուրջ առաջընթաց է գործող օրենքի նկատմամբ, որովհետև լուծում է տրված մի շարք հարցերի, որոնք տարիներ շարունակ քննարկվել են և բարձրագույն կրթության համակարգում հանդիսացել են խնդիրներ։ Դրանից բացի նոր զարգացումներին ուղղված հարցեր և դրույթներ են ներառված օրենքում»,-նշեց Կարինե Հարությունյանը՝ ընդգծելով, որ բարձրագույն կրթության որակին ուղղված մի շարք դրույթներ են ներառված։ Ռեկտորը նշեց, որ կարևոր նորամուծություն է այն, որ ուսանողները կարող են իրենք ընտրել ուսումնական կիսամյակում իրենց բեռնվածությունը։

Աղբյուր` Փաստինֆո