Փաստ ինֆո

«Անլրջացնելը դա տեխնոլոգիա է, որով շարժվում է Հայաստանի վարչապետը։ Երբ կա բարդ իրավիճակ, պետք է այն անլրջացնել, որպեսզի այդ իրավիճակը բողոք չառաջացնի, դա տեխնոլոգիա է եւ այնպես չէ, որ Փաշինյանը նոր բան է հորինել»,-ն «Փաստինֆո»-ին ասաց հոգեբան Միհրդատ Մադաթյանը՝ անդրադառնալով ՀՀ վարչապետ Նիկոլ Փաշինյանի այսօրվա հայտարարությանը։

«Փաստինֆո»-ն տեղեկացրել էր, որ կառավարության այսօրվա նիստում վարչապետ Նիկոլ Փաշինյանը հայտարարել է, որ ԱԱԾ-ին հանձնարական է տվել պարզել որոշ շրջանակների ու սատանայի համագործակցության ձևերն ու ուղիները: Փաշինյանը, թեեւ ժպիտը դեմքին, նշել էր թե դա կատակ չէ։ «Առանց կատակի, ես էդպիսի հանձնարարական տվել եմ: Ծիծաղում եք, բայց, իրոք, եթե կա պնդում, դա անվտանգության խնդիր է», - հայտարարել էր վարչապետը, ապա դիմել ԱԱԾ տնօրենի ժամանակավոր պաշտոնակատարին, որ նա հաստատի նման հանձնարարականի առկայությունը։ Վերջինս էլ հաստատել էր. «Այո՛, իսկապես, մի քանի օր առաջ էդպիսի հանձնարարական ենք ստացել», սակայն չի հստակեցվել սատանաների վերաբերյալ վարչապետի հանձնարարությունը բանավոր է եղել, թե գրավոր։

Հոգեբանը, վերլուծելով Փաշինյանի վերջին օրերի հայտարարությունները, մասնավորապես, դրանցում նկատվող ագրեսիվությունը, նշում է, որ վարչապետի վարքը նոր չէ, նա կրկնում է հանրահավաքների ժամանակ դրսեւորած վարքագիծը։ «Այդ մարդն անում է այն, ինչ ուզում է անել, բայց միեւնույն ժամանակ կորցնում է նույն ժողովրդին, որն իրեն հավատացել է։ Փաստացի, նա խաբում է ժողովրդին եւ փորձում է այդ խաբելը ներկայացնել որպես այդ նույն ժողովրդի կամք»։

Նշենք, երեկ կառավարություն-ԱԺ հարցուպատասխանի ժամանակ վարչապետը անդրադարձավ, պետբյուջեից 20 միլիոն դրամ ֆինանսավորում ստացած «Մել» ֆիլմին, որը պատմում է ծանրամարտի Մելինե Դալուզյանի սեռափոխության եւ նրա ընկերուհու սիրո պատմության մասին եւ հայտարարեց, որ այս թեմայի հետ կապված քննադատությունները «կոռուպցիոն տաշտակից, լափամանից զրկվածների պրոպագանդա» է։

«Էդ մարդը իմ պաշտպանության ներքո է, իմ անձնական պաշտպանության ներքո, իսկ էդ կոռուպցիոներներին ոչ մի բան չի փրկելու, թալանածը կոպեկ-կոպեկ բերելու են՝ կթաքնվեն կուսակցությունների անվան տակ, ազգային արժեքների անվան տակ, հանելու ենք, հատ-հատ տանենք պատասխանատվության ենթարկենք»,-հայտարարեց նա։

Նույն նիստին Նիկոլ Փաշինյանը սպառնաց «պառկըցնել ասֆալտին» ու «պատերով տալ» բոլոր նրանց, այդ թվում քաղաքական գործիչներին ու պատգամավորներիին, ովքեր մտածում են, որ քրեական ենթամշակույթի դեմ պայքարում կոմպրոմիսներ են լինելու։

Անդրադառնալով վարչապետի ՝ սոցցանցային ակտիվությանը, սելֆիների ու լայվերի առատությանը հատկապես վերջին օրերին, Միհրդատ Մադաթյանն ասաց՝ հավանաբար ռեյտինգի հետ կապված խնդիրներ կան։ Փաշինյանը փորձում է այդ կերպ ապահովել վարկանիշը։ «Դրան էլ գումարենք, որ ունեն բազմաթիվ խնդիրներ, ժողովուրդը դժգոհ է իշխանությունից, դա արտահայտվում է եւ սուպերնախարար Արայիկ Հարությունյանի որոշումների դեմ բողոքով,եւ արտգործնախարարության մասով։ Գիտեք, որ այդ բողոքը երիտասարդներն են բարձրացնում, ոչ թե ինչ-ինչ մութ ուժեր, որոնց վրա նա բարդում է ամեն բան։

Արդեն տարի ու կես է, ինչ իրենք են կառավարում եւ ակնհայտ է , որ բոլոր լծակներն իր ձեռքում են եւ հետեւաբար մութ ուժերի մասին խոսք լինել չի կարող։ Մենք պարզապես հասկանում ենք, որ նա ձախողել է կառավարումը եւ ամեն կերպ փորձում է փրկել իրավիճակը՝ իր աթոռին մնալու համար»,-բացատրեց հոգեբանը՝ հիշեցնելով հեղափոխության օրերին Փաշինյանի արած այն հայտարարությունը, թե աթոռներից կառչած չեն ։

«Այսօր հստակ կարելի է ասել, որ այսօր բոլորը՝ եւ Արայիկ Հարությունյանը, եւ արտգործնախարարը եւ առավել եւս Նիկոլ Փաշինյանը, կառչած են իրենց աթոռներին եւ բավականին ամուր»,-եզրափակեց մեր զրուցակիցը։

Աղբյուր` Փաստինֆո