Փաստ ինֆո

Մենք պատրաստ ենք այդ խմբերին ընդունել, իրենց պահանջները լսել, բացատրել, բայց որքան երեկ հասկացա նրանց ոչ բոլոր հատվածներն են հակված որևէ պահանջ ձևակերպելու և դնելու, այլ պարզապես քաղաքական ակցիա են իրականացնում։ Այս մասին լրագրողների հետ զրույցում ասաց ԿԳՄՍ նախարար Արայիկ Հարությունյանը՝ անդրադառնալով իր դեմ իրականցվող ակցիաներին։

Հարցին՝ պատրաստվում է հրաժարական տալ, թե ոչ, նախարարն ասաց. «Ես պատրաստ եմ հրաժարական տալ այն ժամանակ, երբ կկարծեմ, որ իմ լիազորությունները բավարար չեմ կատարում։ Սա այդ իրավիճակը չէ»,-ասաց նախարարը։

Հարցին՝ ինչու՞ է աղմկում դաշնակցությունը, նախարարն արձագանքեց. «Ես առիթ ունեցել եմ երեկ արձագանքելու։ Նախ` ուզում եմ դիմել ոչ հայաստանցի դաշնակցականներին, նրանց ղեկավարությանը, որպեսզի տեր կանգնեն իրենց կուսակցությանը, որովհետև այն անդաստիարակ պահվածքը, որ դրսևորվում է դաշնակցությունը, պատիվ չի բերում մեր ամենահին կուսակցություններից մեկին։ Դաշնակցությունը հատկապես նախորդ տարվա իրադարձություններից հետո այլ կեցվածք պետք է դրսևորեր և հասկանար, թե ինչու մերժվեց հասարակության կողմից և փոխեր անձերին, որովհետև նրանք տապալում են դաշնակցությունը»,-ասաց նախարարը։

Նա հավելեց, որ երբ դրսում է լինում, հանդիպում է դրսում գործող հայկական կառույցների ներկայացուցիչների հետ, այդ թվում՝ դաշնակցության և տեսնում է, որ այնտեղ դաշնակցական գործընկերները շատ ադեկվատ են և պատրաստակամ են կառուցողական աշխատանքի, ինչն այստեղ չեն տեսնում։

Աղբյուր` Փաստինֆո