Փաստ ինֆո

«Որեւէ մեկը չի կապվել ինձ հետ, ոնց կա՝ այդպես էլ մնացել է, որեւէ տեղաշարժ չկա»,- «Փաստինֆո»-ի հետ զրույցում այս մասին հայտնեց նախկին ոստիկանապետ Ալիկ Սարգսյանը՝ անդրադառնալով «Մարտի 1»-ի գործով իրեն առաջադրված մեղադրանքին։

Նախաքննական մարմինը Ալիկ Սարգսյանի մասնակցությամբ որեւէ քննչական գործողություն չի կատարել: Թե որն է հապաղման պատճառը, նախկին ոստիկանապետը չգիտի:

«Իրենցից պետք է հարցնեք, ես որեւէ բան ասել չեմ կարող, որեւէ ինֆորմացիա չկա, ոչ մի բան: Ընտրված է խափանման միջոց՝ ստորագրություն չհեռանալու մասին, վերջ» ,-ասաց Ալիկ Սարգսյանը :

Ավելի վաղ «Փաստինֆո»-ն տեղեկացրել էր, որ Մարտի 1-ի քրեական գործի շրջանակներում մեղադրանք է առաջադրվել նախկին ոստիկանապետ Ալիկ Սարգսյանին։ Նրա նկատմամբ որպես խափանման միջոց է ընտրվել ստորագրություն չհեռանալու մասին:

Հիշեցնենք, ՀՔԾ-ում քննվող քրեական գործի շրջանակում նախկին ոստիկանապետին մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով, 314-րդ հոդվածի 1-ին և 334-րդ հոդվածի 1-ին մասերով: Ըստ առաջադրված մեղադրանքի` 2008 թվականի մարտի 1-ին և 2-ին Երևան քաղաքում տեղի ունեցած իրադարձություններից հետո Մարդու իրավունքների եվրոպական դատարանում ՀՀ կառավարության լիազոր ներկայացուցիչ, համատեղությամբ նաև 2006 թվականի մարտի 14-ից ՀՀ արդարադատության նախարարի տեղակալ, իսկ 2008 թվականի հուլիսի 2-ից՝ ՀՀ նախագահի օգնական Գևորգ Կոստանյանը և ՀՀ նախագահի օգնական, իսկ 2008 թվականի հուլիսի 2-ից՝ ՀՀ ոստիկանության պետի տեղակալ Գևորգ Մհերյանը ՀՀ նախագահ Ռոբերտ Քոչարյանի կողմից այլ անձանց հետ նախնական համաձայնությամբ կատարված առանձնապես ծանր հանցագործության՝ սահմանադրական կարգի տապալման գործիքներն ու միջոցները, ինչպես նաև հանցագործության հետքերը, այն է՝ 2008 թվականի մարտի 1-ին և 2-ին Երևան քաղաքում տեղի ունեցած իրադարձությունների ժամանակ ՀՀ ոստիկանության կողմից իրականացված անօրինական գործողությունները և ՀՀ զինված ուժերի հակասահմանադրական օգտագործման, այդ թվում՝ զինված ուժերի ծառայողների կողմից հրազենի ապօրինի գործադրման իրական հանգամանքները թաքցնելու և մարդու իրավունքների եվրոպական դատարանում ու միջազգային այլ կառույցներում տեղի ունեցածն իրավաչափ քողի ներքո ներկայացնելու խմբային շահերից ելնելով, ինչպես անձամբ, այնպես էլ այլ անձանց հետ հանցակցությամբ, չարաշահել են իրենց պաշտոնեական լիազորությունները, ՀՀ ոստիկանության մի խումբ բարձրաստիճան պաշտոնատար անձանց, այդ թվում՝ 2008 թվականի մայիսի 29-ից ՀՀ ոստիկանության պետ Ալիկ Սարգսյանի և սույն քրեական գործով նշված ժամանակահատվածում վարույթն իրականացնող մարմնի միջոցով կազմակերպել են նշված՝ առանձնապես ծանր հանցագործությունը նախապես չխոստացված պարտակելը՝ իրենց հանձնարարություններով ու ցուցումներով պաշտոնատար անձանց դրդելով պաշտոնեական լիազորությունները չարաշահելուն, պաշտոնեական կեղծիքների կատարման և ապացույցները կեղծելուն:

«Փաստինֆո»-ի հետ զրույցում Ալիկ Սարգսյանը հերքեց իրեն մեղսագրվող արարքը, ասաց՝ չէր կարող լինել այնպիսի բան, որ ինչ-որ մեկն իրեն ստիպեր ինչ-որ բան ստորագրել: «Չկա էդպիսի բան, ես չգիտեմ էդ ինչ խոսակցություններ են, ինչ ենթադրություններ են»-, ասաց նա:

Անդրադառնալով մամուլում շրջանառվող տեղեկություններին, թե գործը հարուցվել է ՀՀ ոստիկանության քրեական հետախուզության գլխավոր վարչության պետի նախկին տեղակալ Հովհաննես Թամամյանի ցուցմունքի հիման վրա, Ալիկ Սարգսյանը նշեց. «Դա ինձ չի հետաքրքրում ով կարող էր իմ դեմ ցուցմունք տալ, էդպիսի բան չի կարող լինել, ով ինչ խախտում է կատարել, թող դրա համար պատասխան տա, ես ի՞նչ կապ ունեմ դրա հետ , չգիտեմ ինչ մասին է խոսքը, ինձ հասկացեք, չեմ կարող հասկանալ ինչի մասին է այս ամենը, ի՞նչ հիմքեր ունի: Պիտի կանչեն, մի անգամ գոնե լսեմ, հասկանամ՝ ինչի մասին է խոսքը»:

Աղբյուր` Փաստինֆո