Փաստ ինֆո

Երևանի ընդհանուր իրավասության դատարանի Կենտրոնի նստավայրում այսօր մեկնարկեց դատավոր Դավիթ Գրիգորյանի փաստաբանի` ԱԱԾ-ի որոշման դեմ բողոքի քննությունը։

Փաստաբան Գեորգի Մելիքյանը դատարանին էր բողոքարկել Գրիգորյանի աշխատասենյակում քննչական գործողություններ կատարելիս քննիչի կողմից ենթադրյալ հանցավոր արարքներ կատարելու փաստի առթիվ քրեական գործի հարուցումը մերժելու մասին ԱԱԾ որոշումը։ Ավելի վաղ նույն որոշումը նա Դատախազությանն էր բողոքարկել, սակայն Դատախազությունը բողոքը մերժել էր հանցակազմի բացակայության հիմքով։

«Փաստինֆո»-ի հաղորդմամբ` բողոքի քննությունը մակագրվել է այն դատավորին, որը բավարարել էր Դավիթ Գրիգորյանի աշխատասենյակի խուզարկության որոշումը։ Սրանով պայմանավորված` Դավիթ Գրիգորյանի փաստաբաններից Երվանդ Վարոսյանն այսօր ինքնաբացարկի միջնորդություն ներկայացրեց նախագահող դատավորին. «Դուք, Գրիգորյանի աշխատասենյակում խուզարկություն իրականացնելու թույլատրություն տալով, օրինական եք համարել քննիչի կողմից մինչ այդ իրականացված գործողությունները։ Խուզարկություն կատարելու որոշման պահին Գրիգորյանը եղել է մեղադրյալի կարգավիճակում, և նրա նկատմամբ իրականացվել է քրեական հետանդում առանց ԲԴԽ համաձայնության, ինչի պայմաններում Դուք բավարարել եք նրա աշխատասենյակում խուզարկություն կատարելու միջնորդությունը»,–ասաց նա։ Վարոսյանը միաժամանակ ընդգծեց, որ տարօրինակ է, թե ինչու է արհեստական բանականություն ունեցող համակարգիչը բողոքը մակագրել նույն դատավորին. «Եվ սա այն պարագայում, որ Երևան քաղաքի ընդհանուր իրավասության դատարանում, գոնե Կենտրոնի նստավայրում տասնյակ այլ դատավորներ կան»։ Նախագահող դատավորն արձագանքեց` ասելով, որ մակագրման գործընթացում մարդկային գործոն չկա։ Ի պատասխան սրան` Վարոսյանը նշեց. «Մարդկային գործոն կա, ուղղակի եթե ես դրա վերաբերյալ ակնհայտ փաստերի տիրապետեի այսօր, հանցագործության մասին հաղորդում կներկայացնեի»։

Գործով դատախազ Էդգար Արսենյանը առարկեց միջնորդության դեմ` ասելով, որ պաշտպանների նշած հիմքերը սուբյեկտիվ էին, և նրանք հիմնավոր փաստարկներ չներկայացրին։ Քննիչ Սուրեն Նավոյանը միացավ դատախազի առարկությանը և միջնորդեց մերժել ինքնաբացարկի միջնորդությունը։

Այսպիսով դատարանը հեռացավ խորհրդակցական սենյակ՝ բողոքի վերաբերյալ որոշում կայացնելու։

Հիշեցնենք, որ Դավիթ Գրիգորյանն այն դատավորն է, որը մայիսի 18-ի որոշմամբ ՀՀ երկրորդ նախագահ Ռոբերտ Քոչարյանի նկատմամբ որպես խափանման միջոց էր ընտրել անձնական երաշխավորությունը։ Այդպիսի միջնորդությամբ դատարանում հանդես էին եկել Արցախի գործող եւ նախկին նախագահները, իսկ մայիսի 20-ին որոշում էր կայացրել նաեւ քրեական գործի վարույթը կասեցնելու եւ ՍԴ դիմելու մասին։

Հոււլիսի 16-ին ՀՔԾ աշխատակիցները մեկ այլ քրեական գործի շրջանակում խուզարկել էին Գրիգորյանի աշխատասենյակը եւ կնիքել այն։ Աշխատասենյակից կատարվել էին առգրավումներ։ Սրանից հետո նրա պաշտպանը հանցագործության մասին հաղորդում էր ներկայացրել ոստիկանություն, որտեղից նյութերն ուղարկել էին Դատախազություն: Դատախազությունն էլ հաղորդման հիման վրա նախապատրաստված նյութերը ուղարկել էր ԱԱԾ: Հուլիսի 30-ին Ազգային անվտանգության ծառայությունը ՀՀ քրեական օրենսգրքի 147-րդ հոդվածով և 308-րդ հոդվածով նախատեսված հանցագործությունների հանցակազմի բացակայության հիմքով քրեական գործ հարուցելը մերժելու մասին որոշում էր կայացրել:

Դավիթ Գրիգորյանին մեղադրանք էր առաջադրվել ՀՀ քրեական օրենսգրքի 314-րդ հոդվածի 1-ին մասի հատկանիշներով՝ պաշտոնատար անձի կողմից շահադիտական նպատակով կամ անձնական այլ դրդումներով կամ խմբային շահերից ելնելով պաշտոնեական կեղծիք կատարելու համար։ Նրա լիազորությունները դադարեցված են։

Հավելենք, որ հուլիսի 30-ին հայտարարությամբ էր հանդես եկել ԲԴԽ-ն՝ ասելով, որ քննիչը կատարել է ՀՀ քրեական դատավարության օրենսգրքով չնախատեսված գործողություն՝ կնիքելով դատավոր Դ. Գրիգորյանի աշխատասենյակի մուտքի դուռը:

Աղբյուր` Փաստինֆո