Փաստ ինֆո

Ամուլսարի հանքի շահագործման խնդրի շուրջ կառավարության կողմից իրականացվող քայլերը որեւէ հույս չեն ներշնչում հանքի շահագործման դեմ հանդես եկող իրավապաշտպան Զարուհի Հովհաննիսյանին:

«Վարչապետը փորձում է մեղմել մինչեւ այս կատարած իր սարսափելի գրառումները՝ հատկապես տեսչական մարմնի նախկին ղեկավարի գրածի վերաբերյալ եւ իր ոչ կոմպետենտ ուղիղ եթերը: Այդ ամենը ինձ հավատ եւ հույս չի ներշնչում, որովհետեւ կոնկրետ այժմ բազմաթիվ փորձաքննություններ կան իր ձեռքի տակ եւ անգամ «Էլարդ»-ի փորձաքնննության եզրակացությունը, որը լղոզված է, խնդիրներ է վերհանում»,-«Փաստինֆո»-ի հետ զրույցում ասաց Զարուհի Հովհաննիսյանը:

Հիշեցնենք, որ ՀՀ վարչապետ Նիկոլ Փաշինյանը ֆեյսբուքյան իր էջում գրել է, որ այսօր կառավարության աշխատակազմը «Էլարդ»-ի եզրակացությունը ուղարկում է Շրջակա միջավայրի նախարարություն՝ պարզելու արդյո՞ք եզրակացության մեջ կան տվյալներ, որոնք Հայաստանի օրենսդրության համաձայն Ամուլսարի հանքի շահագործման համար Շրջակա միջավայրի ազդեցության նոր գնահատում իրականացնելու անհրաժեշտություն են առաջացնում։

Զարուհի Հովհաննիսյանի խոսքով, եթե կառավարությունը ցանկանար տեսնել խնդիրներ, դրանք կտեսներ, ուստի նոր փորձաքննությունը ուղղակի ժամանակ շահելու, կրքերը հանդարտեցնելու կամ ժողովրդի ու իշխանության միջեւ բաժանարարները մեղմելու նպատակ է հետապնդում: «30 տարում կառուցված իշխանություն-ժողովուրդ բաժանարարը, որը քանդվել էր վերջին 1 տարվա ընթացքում, դարձյալ կառուցվեց: Ժողովրդավար իշխանությունը առաջին հերթին լսում է ժողովրդին, իսկ տեղի ժողովուրդը դեմ է հանքի շահագործմանը: Կարող ես հանրաքվե անցկացնել, թող ժոովուրդը որոշի: Անձամբ եղիր Լիդիանի խոսնակը, համոզիր ժողովրդին , անձամբ մասնակցիր քարոզչությանը, հատկապես, որ քո նախընտրական ծրագրում ուղիղ ժողովրդավարության մեթոդը գովերգվում է»,-ասում է իրավապաշտպանը, միեւնույն ժամանակ շեշտելով, որ վերջին մեկ տարվա ընթացքում չենք տեսել, որ ժողովրդին հուզող որեւէ տեղական կամ համապետական հարցի շուրջ հանրաքվե անցկացվի, մինչդեռ այդ հարցերը , ըստ իրավապաշտպանի, բազմաթիվ են:

Զարուհի Հովհաննիսյանը, առհասարակ, վիիրավորական է համարում Ամուլսարի խնդրի շուրջ Նիկոլ Փաշինյանի ՝ ֆեյսբուքյան վերջին ուղիղ եթերով հնչած հայտարարությունները, որտեղ նա փորձում էր քաղաքացիներին համոզել, թե հանքի շահագործումն անվտանգ է եւ բխում է Հայաստանի շահերից: «Շատ վիրավորական է նաեւ այն պատճառով, որ նա բավականին երկար ժամանակ եղել է ԱԺ պատգամավոր եւ երբեք չի հետաքրքրվել բնապահպանական խնդիրներով եւ երբեք որեւէ ելույթ չի նվիրել Հյաաստանի բնապահպապանական իրավիճակին՝ լինելով տարբեր խմբակցությունների կազմում 2 անգամ ընտրված պատգամավոր»:

Հայաստանում բնապահպանական խնդիրները, իրավապաշտպանի խոսքով, մշտապես անտեսվել են, որի վառ ապացույցը նաեւ Թեղուտի պոչամբարի վթարային վիճակն է: Ինչ վերաբերում է Ամուլսարին, այն, ըստ Հովհաննիսյանի, ի սկզբանե, կասկածելի գործարք է եղել, ինչի մասին ոչ մեկ անգամ են բարձրաձայնել:

«Ո՞վ է գնահատել այն ռիսկերը, որոնք հենց հիմա կրում են ջերմուկցիները, որոնք չեն կարողանում իրենց բիզնեսը զարգացնել, որովհետեւ այն արդեն հանքարդյունաբերական տարածք է, մարդիկ առողջարանային գոտուց խուսափում են, չեն ցանկանում այնտեղ լինել, որովհետեւ տարածաշրջանում բազմաթիվ այլ առաջարկներ կան եւ Ջերմուկը մրցունակ չի դառնում հանքի առկայության պայմաններում: Ինչպե՞ս է գնահատում վարչապետը ռիսկերը, թե ինչ ջրային ախտոտվածություն կարող է առաջանալ այնտեղ՝ ասելով, թե մի կաթիլ ջուր չի ախտոտվելու: Դա ուղղակի անհնարին բան է, չկա աշխարհում որեւէ հանքարդյունաբերական ձեռնարկություն, որը չունենա ջրի արտահոսք: Թեկուզ կառավարելի, բայց արտահոսք լինում է»,-նշում է Զարուհի Հովհաննիսյանը:

Իրավապաշտպանն ընդհանրապես խայտառակություն է որակում այն փաստը, որ իր ուղիղ եթերի ժամանակ վարչապետը բառ անգամ չասաց ԱԺ այգին ցուցարարների առջեւ փակելու եւ ոստիկանության կողմից այդ օրը ցուցարարների նկատմամբ ուժ կիրառելու մասին: «Ես ներկա եմ գտնվել այդ պրոցեսին, եթե ես ներկա չգտնվեի, հնարավոր է՝ տարակարծություններ ունենայի այն հարցում, թե ինչպես է գործել ոստիկանությունը: Այո, Հայաստանում ոստիկանությունը հերթական անգամ դարձել է մահակ կառավարող վերնախավի ձեռիքին, որովհետեւ խտրական եւ ոչ համաչափ մոտեցում ունի տարբեր տեղերում անցկացվող հավաքների նկատմամբ»:

Իրավապաշտպանը զուգահեռ է անցկացնում դատարաները շրջափակելու ՝ վարչապետի կոչի եւ բնապահպան ակտիվիստների գործողությունների նկատմամբ ոստիկանության արձագանքի միջեւ. «Ոստիկանությունը որեւէ գործողություն չկատարեց, երբ պետական շենքերը շրջափակելը եւ նրանց աշխատանքը խափանելը քրեական հանցագործություն է, իսկ օգոստոսի 19-ին, երբ շատ խաղաղ հավաք էր՝ փոքրաթիվ հանրույթով, արդեն իսկ առավոտյան ոստիկանական բավականաչափ լուրջ ուժեր էին կենտրոնացած Բաղրամյան 26-ում եւ արդեն իսկ փակված էին պարիսպները իսկ հանրույթը սեգմենտավորված էր: Մենք հերթական անգամ հիշեցինք Սերժ Սարգսյանի կառավարման ժամանակահատվածը , երբ մեզ ուղղորդում էին դեպի մետրոպոլիտենի Բաղրամյան կայարանի հատվածը եւ թույլ չէին տալիս մոտենալ Բաղրամյան 26-ին: Հետո տեղի ունեցավ ավելի սարսափելի բան, բաց այգին, որը 2018 թվականի հոկտեմբերից հայտարարվել էր հանրային տարածք, հանրության համար փակվեց, այսինքն, այգին հանրային տարածք է, երբ կարելի է պաղպաղակ ուտել, գորգ լվանալ եւ հանրային տարածք չէ, երբ այնտեղ պետք է տեղի ունենա հանրային քննարկում հանրությանը հուզող հարցերի շուրջ:

Այս ամենը, ըստ իրավապաշտպանի, առավել մտահոգիչ է այն պատճառով, որ եթե նախկին իշխանությունը չէր ճանաչում ակտիվիստների հանրույթին եւ վախենում էր այդ հանրույթից, այս իշխանությունը շատ լավ գիտի, որ այդ հանրույթը երբեւէ ապօրինի գործողություն կատարելու կամ ուժ կիրառելու ունակ չէ: «Նույն Նիկոլ Փաշինյանը այդ հանրույթների պայքարի իմաստներն է օգտագործել իր հեղափոխության ու քայլերթի ժամանակ՝ անձի ազատությունը, խաղաղությունը, ընթհանրապես, բռնության մշակույթից դուրս լինելը, օգտագործել է այդ հանրույթի դիմադրության ձեւերը եւ հիմա նույն այդ հանրույթի առջեւ փակում է որեւէ տարածք»,-եզրափակում է իրավապաշտպանը:

Աղբյուր` Փաստինֆո