Փաստ ինֆո

«Լրանում է մեկ տարին այն, պահից, երբ Հայաստանի քաղաքական կյանքում հիմնական հարցը 2-րդ նախագահի շուրջ ընթացող գործընթացներն են դարձել»,- «Փաստինֆո»-ի հետ զրույցում ասել է քաղտեխնոլոգ Արմեն Բադալյանը՝ անդրադառնալով ՀՀ 2-րդ նախագահ Ռոբերտ Քոչարյանի շուրջ ծավալվող իրավական գործընթացներին:

Հիշեցնենք, Ռոբերտ Քոչարյանը շուրջ մեկ տարի է՝ մեղադրյալի կարգավիճակում է, նրան մեղադրանք է առաջադրվել «Մարտի 1-ի» գործով՝ սահմանադրական կարգը տապալելու, ինչպես նաեւ առանձնապես խոշոր չափերով կաշառք ստանալու համար։

Քաղտեխնոլոգի խոսքով, Ռոբերտ Քոչարյանի դեմ սկսված գործընթացի սկզբնական փուլում, Հայաստանի ներքաղաքական օրակարգում այլ խնդիրներ էլ կային՝ Երեւանի ավագանու ընտրություններ, հոկտեմբերի 2-ի իրադարձություններ, ԱԺ ընտրություններ, ապա՝ կառավարության կառուցվածքի ու ծրագրի ընդունում, բայց այս տարվա մայիսի 18-ի՝ դատարանների շրջափակումից հետո ամբողջ քաղաքական օրակարգը մեկ անձի շուրջ է ընթանում, բացառություն է միայն Ստամբուլյան կոնվենցիայի քննարկումը:

«Ակնհայտ է, որ երբ դատավորներից մեկը փոխեց 2-րդ նախագահի խափանման միջոց կալանավորումը, դրան հաջորդեց դատարանների շրջափակումը, ապա այդ նույն դատավորի նկատմամբ իրավական գործընթաց սկսեց: Այստեղ մեկ խնդիր կա եւ դա ոչ թե այն հարցն է, թե 2-րդ նախագահը սահմանադրական կարգը տապալե՞լ է, թե ոչ, այլ նրա շուրջ ընթացող գործընթացներն, մասնավորապես, հենց ՍԴ-ի հետ կապված: Հասկանալի է, որ այնտեղ խնդիրը ոչ թե ինչ-որ անդամ –դատավորներին է վերաբերվում, այլ այն բանին, որ իշխանությունը վստահ չէ, որ ՍԴ-ն 2-րդ նախագահի գործով իրեն հաճելի որոշում կընդունի, ուստի ՍԴ-ն վարչապետի՝ օրեցօր ձեւավորվող անձնիշխան համակարգի մեջ մտցնելու գործընթաց է գնում»,- կարծիք է հայտնում քաղտեխնոլոգը:

Ըստ Արմեն Բադալյանի, այժմ ՍԴ-ում Քոչարյանի գործը, այսպես ասած, սառեցվել է, քանի որ սպասվում է Վենետիկի հանձնաժողովի արձագանքը: Քաղտեխնոլոգը մի քանի սցենար է տեսնում. «Եթե այդ արձագանքում նշվի, որ 2-րդ նախագահին առաջադրված մեղադրանքը չի համապատասխանում Սահմանադրությանը, ՍԴ-ն, եթե նույն կազմով մնա, հնարավոր է այն համարի հակասահմանադրական եւ առաջնորդվելով դրանով, առաջին ատյանի դատարանը գործը չեղյալ հայտարարի: Մյուս տարբերակն այն է, որ մինչեւ Վենետիկի հանձնաժողովի կարծիք ստանալը վարչապետը օրինական եւ ոչ օրինական ճանապարհով կարող է փոխել ՍԴ կազմը։ Բայց այստեղ էլ խնդիր կա. անգամ այդ դեպքում, եթե գա այնպիսի կարծիք, որտեղ նշվի, որ մեղադրանքը չի համապատասխանում Սահմանադրությանը, ապա ՍԴ-ի նոր կազմն այն ընդունել-չընդունելու խնդրի առաջ է կանգնելու: Եթե հայտարարեն՝ մենք ինքնիշխան երկիր ենք, չենք ընդունում, այս դեպքում արդեն հարց կառաջանա ԵԽ հետ, որովհետեւ Վենետիկի հանձնաժողովը ԵԽ մարմին է»:

Արմեն Բադալյանի խոսքով, եթե անգամ Վենետիկի հանձնաժողովի կարծիքն այնպիսին լինի, որ գործը հասնի առաջին ատյանի դատարան, այն հանգուցալուծում չի ստանալու, որովհետեւ գործ ենք ունենալու երկարատեւ դատական պրոցեսի հետ: «Օրինակ, վերցնենք ՊՊԾ գրավման գործը, այն 3 տարի շարունակ քննվում է, հիմա պատկերացրեք, սահմանադրական կարգի տապալման մեղադրանքը քանի՞ տարի կքննեն, պատկերացրեք, եթե փաստաբանները պահանջեն, որ բոլոր 800 վկաները գան եւ նախաքննական ցուցմունքները կրկնեն... Բացի այդ, 2-րդ նախագահի դեմ հարուցված քրեական գործը Մարտի 1-ի գործի մի էպիզոդն է՝ սահմանադրական կարգի տապալման մեղադրանքով, բայց կա նաեւ սպանությունների էպիզոդը, կան օլիգարխների թիկնազորների ներգրավման, խանութների թալանի էպիզոդները: Այդ ամենը քննելու համար տարիներ են հարկավոր »:

Ըստ Բադալյանի, վարչապետ Փաշինյանի հայտարարությունը, թե Մարտի 1-ի գործն ամբողջությամբ բացահայտված է, իրականությանը չի համապատասխանում, որովհետեւ մարդիկ չստացան մարտի 1-ի բացահայտման հետ կապված իրենց հուզող հարցերի պատասխանները. «Ընդհանուր սխեմաներից է խոսվում՝ իշխանությունը ուժ է կիրառել, չգիտենք ով հրամայել է կրակել, չգիտենք ով կրակել է, որեւէ դետալ բացահայտված չէ, այս պահի դրությամբ մարտի 1-ի գործի բացահայտումը գտնվում է այն նույն մակարդակին , ինչ գտնվում էր 2008 թվականին»:

Քաղտեխնոլոգը գործընթացից մեկ տարի անց ակնհայտ է համարում մեկ բան՝ վարչապետն ընդգծված ցանկանում է անազատության մեջ պահել 2-րդ նախագահին: «Այս պահի դրությամբ նրա դեմ հետապնդումների մեջ քաղաքական դետալներ կան, եթե այսպես շարունակվի, որոշ ժամանակ հետո՝ ուզենք , թե ոչ, պետք է ընդունենք, որ նա քաղբանտարկյալ է, ամեն ինչ գնում է այդ ուղղությամբ: Հիմա արդեն ասում ենք՝ այս գործը իրավական չէ, այս գործը քաղաքական է՝ իրավական շղարշով, ու եթե շատ առաջ գնա այս գործընթացը գոյություն ունեցող մեխանիզմներով եւ պայմաններում, պետք է արձանագրենք, որ Քոչարյանը դառնում է քաղբանտարկյալ: ճանապարհի կեսը կարծես անցել է իշխանությունը»,- «Փաստինֆո»-ի հետ զրույցում շարունակում է Արմեն Բադալյանը՝ հավելելով, որ Ռոբերտ Քոչարյանի խափանման միջոցի փոփոխությունը ուժեղ հարված կլինի վարչապետին, որը այլեւս որեւէ խաղաքարտ չի ունենա:

«Նիկոլ Փաշինյանը 3 խաղաքարտ ուներ՝ մեկը, որ համակարգային կոռուպցիան պետք է վերացվի, նա հայտարարեց, որ վերացել է, բայց մենք չտեսանք այդ մասկի-շոուների հետեւանքները: Երկրորդ խաղաքարտը ներդրումներն էին, հայտարարվեց, թե ՀՀԿ-ն խանգարում, հիմա ունենք խորհրդարան, որտեղ ՀՀԿ-ն չկա, բայց միեւնույնն է, ներդրումներ էլ չկան, եւ 3-րդ խաղաքարտը 2-րդ նախագահի գործոնն է, եթե թեկուզ խափանման միջոցն էլ փոխվի, դա կլինի ծանր հարված Փաշինյանին , դա կնշանակի նրա 3 խաղաքարտերն էլ խփված են եւ այստեղ խնդիրը ոչ միայն անձնական այլեւ քաղաքական է, որովհետեւ ուրիշ որեւէ ասելիք վարչապետը չունի, դրա համար նա անպայման ցանկանում է անազատության մեջ պահել Ռոբերտ Քոչարյանին»:

Աղբյուր` Փաստինֆո