Փաստ ինֆո

Արցախի Հանրապետության նախագահ Բակո Սահակյանի խոսնակ Դավիթ Բաբայանի կարծիքով ցանկացած նախաձեռնություն, որն իրականացվում է օրենքի շրջանակներում է և  թույլատրելի է օրենքով՝ ողջունելի է:

‹‹Ամեն ինչ պետք է լինի օրենքի շրջանակներում, ցանկացած  նախաձեռնություն, որն առնչվում է քաղաքական, իրավական, մարդասիրական, պետականաշինության գործընթացներին, որոնք իրականացվում են օրենքի շրջանակներում, միանշանակ ողջունելի են և ցույց են տալիս, որ երկիրը կայանում է, ժողովրդավարական և իրավական է››,-‹‹Փաստինֆո››-ի հետ զրույցում ասաց Դավիթ Բաբայանը՝ անդրադառնալով  Սամվել Բաբայանի նախաձեռնած ստորագրահավաքի և ընդհանրապես Արցախում կազմակերպվող նմանատիպ նախաձեռնություններին:

‹‹Փաստինֆո››-ի հարցին, թե բացի սպասվելիք ընտրություններից ուրիշ ի՞նչ հանգամանքով կարող է պայմանավորված լինել Արցախի քաղաքական դաշտում ակտիվացումը, հնարավո՞ր է՝ այն կապ ունենա Հայաստանում տեղի ունեցած հեղափոխության հետ, Բաբայանը պատասխանեց.

‹‹Շատ դժվար է միանշանակ ասել՝ այդ զարգացումներն ու ակտիվությունը անմիջապես հետևանք է Հայաստանում տեղի ունեցած փոփոխությունների՞, թե՞ դա կարող է առանց դրանց էլ ընթանալ››:

Նա նշեց, որ Արցախում քաղաքական ակտիվացման համար որոշակի նախադրյալներ կան: Դրանցից մեկն այն է, որ 2020թ.-ին Արցախում տեղի են ունենալու նախագահական և խորհրդարանական ընտրություններ, և այս փաստն ինքնին ակտիվացման շեմ, նշաձող է, որին ձգտում են տարբեր քաղաքական ուժեր:

‹‹Քաղաքական դաշտի ակտիվացմանը ինչ-որ տեղ նպաստել են նաև օրենսդրական փոփոխությունները, նոր Սահմանադրության ընդունումը և Արցախում առաջին անգամ խորհրդարանական ու նախագահական ընտրությունները մեկ օրում տեղի ունենալը, այսինքն  սա արդեն իսկ ինքնին ակտիվացում է››,-ասաց ԱՀ նախագահի խոսնակը:

Բաբայանի խոսքով, առաջին անգամ Արցախում խորհրդարանական ընտրությունները լինելու են բացարձակապես համամասնական կարգով, այսինքն` որևէ  անհատ մեծամասնական կարգով չի կարող ինքնաառաջադրվել:

Նա նշեց, որ ինքն անձամբ կարծում է՝ դա Արցախի համար լավագույն տարբերակը չէ, բայց ժողովուրդը քվեարկել ու ընտրել է այդ տարբերակը, ինչը նշանակում է, որ եթե մեծամասնական կարգով հնարավոր չէ, հետևաբար մարդիկ պետք է կուսակցությունների ցուցակներով  առաջադրվեն և նոր կուսակցություններ ստեղծեն:

‹‹Այն անհատները, այն ուժերը, որոնք  իրենց չեն տեսնում այլ կուսակցությունների շարքերում և, հիմա տեսնում ենք, որ այդ  գործընթացն ընթանում է, ստեղծվում են նոր կուսակցություններ: Այդ կուսակցությունները  չպետք է սպասեն քարոզարշավի պաշտոնական մեկնարկին, մինչ այդ պետք է ներկայանան հանրությանը, նույնիսկ եթե ընտրությունները լինեն 5 տարի հետո, նրանք պիտի  ներկայանան հանրությանը և ցույց տան, որ քաղաքական ուժ են և բաղկացած են հետևյալ անդամներից››,-ասաց ԱՀ նախագահի խոսնակը:

Նա ընդգծեց, որ  վերոնշյալ զարգացումներն արդեն իսկ պահանջում են, որ ակտիվացում լինի, իսկ  Հեղափոխությունը որոշ ազդեցություն թողել է, բայց ասել  դա վճռորոշ է, թե ոչ, պարզապես հնարավոր չէ:

‹‹Իհարկե որոշակի ազդեցություն կա, չէ՞ որ մենք մեկ ընդհանրական հայրենիք ենք, իհարկե երկու տարբեր պետություն, բայց այդ զարգացումները մեկը մյուսին ինչ-որ տեղ ազդեցություն թողնում են, բայց հստակ ասել հնարավոր չէ, քանի որ  սա ճշգրիտ գիտություն կամ բանաձև չէ››,-շեշտեց Բաբայանը:

‹‹Փաստինֆո››-ի դիտարկմանը, որ այսօր մամուլում լուրեր էին տարածվել, թե Սամվել Բաբայանը մտադիր է փակել Արցախ տանող ճանապարհները, իհարկե այդ լուրերը հետո հերքվեցին, սակայն նման դեպքում ի՞նչ քայլերի է պատրաստ  Արցախի Հանրապետությունը, Բաբայանը պատասխանեց.

‹‹Նրա հայտարարությունը, որ նման բան չկա ողջունելի է և լավ է: Ընդհանրապես ցանկացած քաղաքական ակցիա պետք է լինի օրենքի շրջանակներում, եթե ուզում են հանրահավաք անել, ապա կա կարգ, կա համապատասխան օրենք, դիմում են համապատասխան մարմիններին: Եթե մայրաքաղաքում է՝ քաղաքապետարանին,  եթե այլ քաղաքներում է համապատասխան օղակներին: Յուրաքանչյուր  քայլ, որը կապակայունացնի իրավիճակը Արցախում, թշնամանք կառաջացնի հասարակության տարբեր ներկայացուցիչների միջև, ես չեմ կարող  դրական համարել, խոսքը բոլորի մասին է, կլինի քաղաքական գործիչ, անհատ թե պետական գործիչ››:

Հեղինակ` Սոնա Գեւորգյան